.
రాఖీకి ర్యాంప్ లుక్ ఎందుకు..? దారితప్పుతున్న క్రియేటర్లు…
పండుగల్ని కూడా ‘క్రియేటివిటీ’ పేరుతో మార్చేస్తున్నారా..?
రక్షాబంధన్ అంటే అన్నాచెల్లెళ్లు, అక్కాతమ్ముళ్ల మధ్య అనుబంధాన్ని గుర్తుచేసే పండుగ. ఇంట్లో పూజ, తిలకం, రాఖీ, మిఠాయి… ఇవన్నీ కలిసిన ఓ కుటుంబ వాతావరణం. కానీ ఇప్పుడు ఆ పండుగ విశిష్టత కూడా యాడ్ క్రియేటర్ల చేతిలోకి వెళ్లింది. అక్కడ సంప్రదాయం కంటే ‘కాన్సెప్ట్’, సందర్భం కంటే ‘గ్లామర్’, భావోద్వేగం కంటే ‘వైరల్’ ముఖ్యం అవుతున్నాయా అన్న ప్రశ్నలు తలెత్తుతున్నాయి.
Ads
తాజాగా బాలీవుడ్ నటి కృతి సనన్ నటించిన ఓ రక్షాబంధన్ యాడ్పై సోషల్ మీడియాలో మొదలైన చర్చ చూస్తే ఇదే అనిపిస్తుంది.
ఇది ప్రముఖ జువెలరీ బ్రాండ్ GIVA రూపొందించిన ప్రకటన. ‘Furever Sibling’ పేరుతో రూపొందించిన ఈ క్యాంపెయిన్ ఉద్దేశం కూడా స్పష్టమే. మనుషుల మధ్య అన్నాచెల్లెళ్ల బంధంతో పాటు పెంపుడు జంతువులనూ కుటుంబ సభ్యులుగా చూపించడం. అందులో భాగంగానే కృతి మొదట తన సోదరుడికి రాఖీ కట్టి, ఆ తర్వాత పెంపుడు కుక్కకు కూడా రాఖీ కడుతుంది. ఈ ప్రచారం వెనుక GIVA తన కొత్త Pet Collectionను కూడా ప్రమోట్ చేస్తోంది. (గతంలోనూ కొందరు సెలబ్రిటీలతో సేమ్ యాడ్స్ చేసింది)…
కాన్సెప్ట్లో తప్పేముంది? … అసలు ఇక్కడే ఒక ఆసక్తికరమైన అంశం ఉంది. పెంపుడు జంతువులు కుటుంబంలో భాగమేనని చెప్పడం కొత్త ఆలోచన కాదు… చాలామంది వాటిని నిజంగానే కుటుంబ సభ్యుల్లా చూసుకుంటున్నారు… కాబట్టి ఆ భావాన్ని రక్షాబంధన్తో అనుసంధానించడం మార్కెటింగ్ పరంగా అర్థం చేసుకోగలిగిన ప్రయత్నమే…
అయితే యాడ్ చూసిన ప్రేక్షకుడి దృష్టిని అక్కడి నుంచి మరొక విషయం లాగేసింది… కృతి సనన్ ధరించిన దుస్తులు… ఆఫ్-వైట్ రంగులో బ్రాలెట్ తరహా బ్లౌజ్, దానిపై కేప్, కింద డ్రేప్డ్ స్కర్ట్. ఫ్యాషన్ షోలోనో, ఫ్యాషన్ ఫొటోషూట్లోనో కనిపించే తరహా ఆధునిక ఇండో- వెస్ట్రన్ లుక్… అదే దుస్తులతో ఆమె సోదరుడికి రాఖీ కడుతున్న దృశ్యం సోషల్ మీడియాలో చర్చకు దారితీసింది… అసలు సందర్భం ఏమిటి..? ఆ డ్రెస్ సెన్స్లెస్నెస్ ఏమిటి..?
“రక్షాబంధన్ యాడ్లో ఇలాంటి దుస్తులా?”, “తిలకం ఎక్కడ?” అంటూ రకరకాలుగా నెటిజనం ట్రోల్ చేస్తున్నారు… మరికొందరు మాత్రం కృతికి మద్దతుగా నిలిచారు… దుస్తుల విషయంలో ప్రతి ఒక్కరికీ తమ అభిప్రాయం, చాయిస్ ఉంటుందని, ఆధునిక ఫ్యాషన్ను సంప్రదాయ పండుగలో చూపించినంత మాత్రాన దాన్ని తప్పుబట్టాల్సిన అవసరం లేదని వాదించారు…
అంటే ఇది కేవలం కృతి సనన్ డ్రెస్ వివాదం కాదు… ఇది అంతకంటే పెద్ద ప్రశ్న… పండుగ అంటే ఏదైనా ‘క్రియేటివ్ కాన్వాసే’నా? ప్రకటనల ప్రపంచంలో ఒక సూత్రం ఉంది.
కంటికి నదురుగా కనిపించాలి.
జనంలో చర్చకు రావాలి.
అది వైరల్ కావాలి.
ఇప్పుడు ఈ మూడు సాధించడానికి క్రియేటర్లు సంప్రదాయ సందర్భాలనూ కొత్తగా ప్యాకేజింగ్ చేస్తున్నారు… అది తప్పనిసరిగా చెడ్డ విషయం కాదు… కాలంతో పాటు పండుగల ప్రదర్శన కూడా మారుతుంది… కానీ మార్పు పేరుతో పండుగకు ఉన్న సహజమైన సందర్భాన్ని, సౌందర్యాన్ని కూడా పూర్తిగా మర్చిపోతేనే సమస్య…
రక్షాబంధన్లో ఆధునిక దుస్తులు ఉండకూడదని ఎవరు చెప్పారు? ఎవరూ చెప్పలేదు. అలాగే ప్రతి మహిళ తప్పనిసరిగా చీర కట్టుకుని, పూజా తాళి పట్టుకుని మాత్రమే రాఖీ కట్టాలన్న నియమమూ లేదు. కానీ ఒక ప్రకటనను తయారు చేసేటప్పుడు “ఇది ఏ సందర్భానికి సంబంధించిన యాడ్? ఎలా పద్ధతిగా ప్రజెంట్ చేయాలి?’’ అనే సోయి కనిపించడం లేదు కొందరు క్రియేటర్లలో…
- రక్షాబంధన్ యాడ్లో గ్లామర్ ఉండొచ్చు. ఫ్యాషన్ ఉండొచ్చు. ఆధునికత ఉండొచ్చు. కానీ ఆ పండుగకు సహజంగా ఉండే కుటుంబ భావోద్వేగాన్ని దుస్తులు, కెమెరా యాంగిల్స్, గ్లామర్ పూర్తిగా మింగేస్తే మాత్రం ప్రేక్షకుడు అసలు విషయాన్ని మరిచిపోతాడు.
ఇక్కడ అదే జరిగింది. యాడ్ చూసిన చాలామంది GIVA ఆభరణాల గురించి మాట్లాడలేదు. ‘Furever Sibling’ కాన్సెప్ట్ గురించి కూడా మాట్లాడలేదు. కృతి డ్రెస్ గురించే మాట్లాడారు. మార్కెటింగ్ పరంగా ఇది కూడా ఒక రకమైన విజయం కావచ్చు… ఎందుకంటే యాడ్ గురించి అందరూ మాట్లాడుతున్నారు…
కానీ బ్రాండ్కు మరో ప్రశ్న కూడా ఉంటుంది….
“మనం గుర్తుండిపోవాలనుకున్నది ఏది?
బ్రాండ్?
ప్రోడక్ట్?
కాన్సెప్ట్?
లేక వివాదం?”
ఇదే అసలు విషయం. కానీ వ్యక్తిగతంగా కృతిని తప్పుపట్టడం ఎంతవరకు కరెక్ట్..?
ఈ యాడ్లో కృతి కనిపించింది కాబట్టి మొత్తం బాధ్యత ఆమెదేనని చెప్పడం సరికాదు… ఒక కమర్షియల్ యాడ్లో దుస్తులు, లొకేషన్, కాన్సెప్ట్, డైలాగ్, విజువల్ ట్రీట్మెంట్… ఇవన్నీ సాధారణంగా బ్రాండ్, ఏజెన్సీ, క్రియేటివ్ టీమ్ కలిసి నిర్ణయిస్తాయి…
కాబట్టి అసలు ప్రశ్న “కృతి ఇలాంటి బట్టలు ఎందుకు వేసుకుంది?” కంటే, “రక్షాబంధన్ కోసం ఇలాంటి లుక్ను క్రియేటివ్ టీమ్ ఎందుకు ఎంచుకుంది?” అని ఉండాలి… ఎందుకంటే హీరోయిన్ను గ్లామర్గా చూపించాలనుకుంటే వంద సందర్భాలున్నాయి… కానీ అన్నాచెల్లెళ్ల బంధానికి ప్రతీకగా నిలిచిన పండుగను ఎంచుకున్నప్పుడు ఆ సందర్భానికి తగిన సున్నితత్వం కూడా ఉండాలి…
కుక్కకు రాఖీ కట్టడం కూడా తప్పేనా? అది మాత్రం పూర్తిగా వేరే విషయం. GIVA ఈ క్యాంపెయిన్ను మొదటి నుంచే పెంపుడు జంతువులను ‘ఫ్యామిలీ’లో భాగంగా చూపించడానికి రూపొందించింది. కాబట్టి కుక్కకు రాఖీ కట్టడం యాదృచ్ఛికంగా పెట్టిన సీన్ కాదు. అది మొత్తం క్యాంపెయిన్లో భాగం.
దానితో ఎవరికైనా ఏకీభవించకపోవచ్చు. కానీ దాన్ని ‘పండుగను అవమానించడం’ అని తేల్చేయడం కంటే, సంప్రదాయ బంధాన్ని కొత్త కుటుంబ నిర్వచనంతో కలపాలన్న బ్రాండ్ ప్రయత్నంగా చూడటం సరైనది… అయితే ఆ కొత్త ఆలోచనను చెప్పే క్రమంలో దుస్తుల ఎంపికే ప్రధాన చర్చగా మారిపోయింది…
అక్కడే క్రియేటర్లు కొంచెం ఆగి ఆలోచించాల్సిన అవసరం కనిపిస్తుంది…
ప్రతి కొత్తదనం క్రియేటివిటీ కాదు.
ప్రతి షాక్ విలువైన మార్కెటింగ్ కాదు.
ప్రతి వైరల్ కంటెంట్ మంచి కంటెంట్ కాదు.
పండుగల విషయంలో మరీ ముఖ్యంగా… ఎందుకంటే అవి కేవలం క్యాలెండర్లోని తేదీలు కావు… కొన్ని భావోద్వేగాలు, ఆచారాలతో ముడిపడి ఉంటాయి… ఆ భావోద్వేగాన్ని గౌరవిస్తూ కొత్తగా చెప్పగలిగితే అది నిజమైన క్రియేటివిటీ..!!
Share this Article