.
ఇవి పాత రోజులు కావు… తోపు స్టార్లున్నా సరే, వారి మొహాలు చూడటానికి వేలు తగలేసి థియేటర్లకు వెళ్లే దినాలు కావు ఇవి… తీసేవాడికి చూసేవాడు లోకువ అని ఎవరైనా అనుకుంటే తిరుగులేని వాతలు పెడుతున్నాడు ప్రేక్షకుడు… రోజులు మారాయి, పర్‌ఫెక్ట్ తాజా ఉదాహరణ హైవాన్ సినిమా…
120 కోట్లు పెట్టిన సినిమా… గత శుక్రవారం దేశవ్యాప్త వసూళ్లు కేవలం 67 వేల రూపాయలు మాత్రమే… ఎంత క్లాసిక్ ఎగ్జాంపులో కదా… ఈ డిజాస్టర్‌కు అసలు కారణాలు వెతుక్కోవల్సింది ఇక ఇండస్టీయే… వివరాల్లోకి వెళ్దాం…
Ads
స్టార్లు కాదు… స్టోరీ కావాలి! ‘హైవాన్’ ఇచ్చిన పెద్ద పాఠం ఇదే..! ఒకప్పుడు థియేటర్‌కు వెళ్లడానికి హీరో పేరు చాలు. ఇప్పుడు అలా కాదు. పోస్టర్‌లో ఆ హీరో మొహం కనిపిస్తే చాలు థియేటర్లకు వెళ్లేవాళ్లు… కానీ ఇప్పుడు..?
హీరో ఎవరు? దర్శకుడు ఎవరు? ఎంత పెద్ద బడ్జెట్? ఎన్ని కోట్ల మార్కెట్? ఇవన్నీ కాదు… ప్రేక్షకుడి మొదటి ప్రశ్న ఒక్కటే… “నన్ను రెండున్నర గంటలు థియేటర్‌లో కూర్చోబెట్టే విషయం నీ దగ్గర ఉందా?”
అదే లేకపోతే ఎంత పెద్ద స్టార్ అయినా… ఎంత పెద్ద బ్యానర్ అయినా… ఎంత భారీ బడ్జెట్ అయినా… ప్రేక్షకుడు మొహం చాటేస్తున్నాడు. అందుకు తాజా ఉదాహరణ అక్షయ్ కుమార్–సైఫ్ అలీఖాన్ ‘హైవాన్’.
Haiwaan విడుదలకు ముందు కాంబినేషన్ మీద ఆసక్తి ఉంది. దాదాపు 18 ఏళ్ల తర్వాత అక్షయ్–సైఫ్ కలిసి నటించడం, పైగా దర్శకుడు ప్రియదర్శన్ కావడం… 2016లో వచ్చిన మలయాళ హిట్ Oppamకు హిందీ రీమేక్ కావడం… ఇవన్నీ కలిపితే పేపర్ మీద సినిమా బాగానే కనిపించింది. కానీ థియేటర్‌లో ప్రేక్షకుడి తీర్పు వేరుగా వచ్చింది.
మొదటి రోజు సుమారు ₹2.79 కోట్లు. మొదటి వారం మొత్తానికి ₹8.68 కోట్లు మాత్రమే. ఇక రెండో శుక్రవారం పరిస్థితి మరింత షాకింగ్… ₹66,838! మొదటి వారం గురువారంతో పోలిస్తే ఏకంగా 98.62 శాతం పతనం. ఇది కేవలం మరో సినిమా ఫెయిల్యూర్ కాదు. ఇండస్ట్రీకి ఇది ఒక సిగ్నల్.
ఎందుకంటే ‘హైవాన్’లో స్టార్లు ఉన్నారు. పెద్ద దర్శకుడు ఉన్నాడు. థ్రిల్లర్ జానర్ ఉంది. గతంలో విజయవంతమైన కథ ఉంది. అయినా ప్రేక్షకుడు ఎందుకు రాలేదు? ఇక్కడే అసలు విషయం ఉంది.
ప్రేక్షకుడికి ఇప్పుడు “ఎవరు నటించారు?” కంటే “ఏం చూపిస్తున్నారు?” ముఖ్యం.
యాక్షన్ సినిమా కావచ్చు.
డివోషనల్ సినిమా కావచ్చు.
హిస్టారికల్ సినిమా కావచ్చు.
హారర్ కావచ్చు.
క్రైమ్ థ్రిల్లర్ కావచ్చు.
ఫ్యామిలీ డ్రామా కావచ్చు.
జానర్ కాదు… ప్రెజెంటేషన్ ముఖ్యం.
కథలో కొత్తదనం ఉందా?
స్క్రీన్‌ప్లే బిగువుగా ఉందా?
ఒక్కసారి కూర్చుంటే తర్వాత ఏం జరుగుతుందో తెలుసుకోవాలనే ఆసక్తి కలుగుతోందా?
ఇంటర్వెల్ వరకు లాక్కెళ్లగలుగుతున్నారా?
క్లైమాక్స్ వరకు ప్రేక్షకుడిని పట్టుకోగలుగుతున్నారా?
అదే ఇప్పుడు అసలు పరీక్ష. ఏం చెబుతున్నావనే కాదు, ఎలా చెబుతున్నావనేదీ ముఖ్యమే.
‘హైవాన్’పై వచ్చిన సమీక్షల్లో కూడా ఇదే తరహా సమస్యలు కనిపించాయి. కథకు మంచి అవకాశం ఉన్నప్పటికీ స్క్రీన్‌ప్లే సాగదీయడం, పేసింగ్ బలహీనంగా ఉండటం, థ్రిల్ ఆలస్యంగా రావడం వంటి అంశాలను పలువురు విమర్శకులు ప్రస్తావించారు.
అంటే… స్టార్ పవర్ ప్రేక్షకుడిని థియేటర్ గేటు వరకు తీసుకురావచ్చు. కానీ సీట్లో కూర్చోబెట్టేది స్టోరీ మాత్రమే. ప్రజెంటేషన్ మాత్రమే.
సినిమా మొదలయ్యాక హీరో ఎంట్రీకి విజిల్స్ వేయడానికి వచ్చే వీరాభిమానులు ఉంటారు. వాళ్లను మినహాయిస్తే సాధారణ ప్రేక్షకుడు ఇప్పుడు చాలా క్లియర్‌గా ఉన్నాడు. “నా డబ్బులకు, నా రెండున్నర గంటల సమయానికి నువ్వేం ఇస్తున్నావు?” అదే ప్రశ్న.
అందుకే చిన్న సినిమాలు అనూహ్యంగా పెద్ద విజయాలు సాధిస్తున్నాయి. పెద్ద సినిమాలు అనూహ్యంగా కుప్పకూలుతున్నాయి. బడ్జెట్ చిన్నదా పెద్దదా అన్నది కాదు… ఆలోచన ఎంత కొత్తది, దాన్ని తెరపై ఎంత బలంగా చెప్పావు అన్నదే తేడా.
మరో ఆసక్తికరమైన విషయం ఏమిటంటే… ప్రేక్షకుడు ఇప్పుడు ఒక జానర్‌కు బానిసగా కూడా లేడు.
నిన్న డివోషనల్ చూస్తాడు.
రేపు యాక్షన్ చూస్తాడు.
మరుసటి రోజు చిన్న సినిమా చూస్తాడు.
అవసరమైతే కొత్త భాష సినిమా కూడా చూస్తాడు.
కానీ బోర్ కొట్టించే సినిమాను మాత్రం క్షమించడం లేదు.
ఇది OTTల ప్రభావం కూడా కావచ్చు. ప్రపంచంలోని ఎన్నో రకాల కంటెంట్ ప్రేక్షకుడి మొబైల్‌లోకి వచ్చేసింది. ఒక కథను చూడాలంటే థియేటర్‌కే వెళ్లాల్సిన రోజులు పోయాయి. అందుకే థియేటర్ అనుభవానికి ఇప్పుడు మరింత బలమైన కారణం కావాలి.
“ఈ సినిమా థియేటర్‌లోనే చూడాలి” అనే ఫీలింగ్ కలిగించాలి.
అది విజువల్స్ కావచ్చు.
అది యాక్షన్ కావచ్చు.
అది భక్తి కావచ్చు.
అది ఎమోషన్ కావచ్చు.
అది నవ్వు కావచ్చు.
లేదా కేవలం ఒక అద్భుతమైన కథ కావచ్చు. చివరకు ఓ మంచి సాంగ్ కూడా కావచ్చు.
ఏదైనా సరే… ప్రేక్షకుడిని పట్టుకోవాలి.
అందుకే ‘హైవాన్’ ఎంత పెద్ద డిజాస్టర్ అనేది పక్కన పెడితే, ఈ ఫలితం మాత్రం పెద్ద తలకాయలు ఆలోచించాల్సిన విషయం.
హీరో డేట్లు దొరికాయి కాబట్టి సినిమా తీయడం కాదు.
బడ్జెట్ ఉంది కాబట్టి ఖర్చు చేయడం కాదు.
పాన్ ఇండియా మార్కెట్ ఉందని పోస్టర్లు వేయడం కాదు.
ఇద్దరు పెద్ద హీరోలను ఒకే ఫ్రేమ్‌లో పెట్టడం కూడా కాదు.
ముందు కథ కావాలి.
ఆ కథను నమ్మే స్క్రీన్‌ప్లే కావాలి.
ఆ స్క్రీన్‌ప్లేను ప్రేక్షకుడికి అందించే ప్రెజెంటేషన్ కావాలి. మిగతావన్నీ ఆ తర్వాతే.
Share this Article