ఎవరు కాంగ్రెస్..? ఎవరు బీఆర్ఎస్..? ఎవరు తెలంగాణా..? ఎవరు ఆంధ్రా..? అంతా మిథ్య..!!

ఎవరు కాంగ్రెస్ ? ఎవరు BRS ? ఎవరు TDP ? ఎవరు BJP ? ఎవరు తెలంగాణ బిడ్డ ? ఎవరు ఆంధ్రా బిడ్డ ? అంతా మిధ్య నాయనా . మా ఖర్మ నాయనా మా ఖర్మ .

చూడండి . కౌశిక్ రెడ్డి . 40 ఏళ్ల కుర్రాడు . క్రికెట్ ప్లేయర్ . 2018 ఎన్నికల్లో కాంగ్రెస్ అభ్యర్థిగా TRS అభ్యర్థి ఈటెల రాజేందర్ పై పోటీ చేసి ఓడిపోయాడు . 2021 లో TRS లోకి జాయిన్ అయ్యాడు . శాసన మండలికి నామినేట్ చేస్తే ఆనాటి గవర్నర్ తమిళసై ఆమోదించలేదు . MLA ల కోటాలో ఏకగ్రీవంగా MLC గా ఎన్నికయ్యారు . 2023 లో హుజురాబాద్ నుండి BRS MLA గా ఎన్నికయి భగవంతుని దయ వలన అక్కడే ఉన్నాడు .

ఇక గాంధీ గురించి . 63 ఏళ్ళు . 2014 ఎన్నికల్లో శేర్లింగంపల్లి నుండి TDP అభ్యర్థిగా గెలిచి , తర్వాత కాలంలో BRS/TRS లోకి జంపారు . 2018 , 2023 ఎన్నికల్లో BRS టిక్కెట్ మీద గెలిచారు . సాంకేతికంగా ఇద్దరూ ప్రస్తుతం BRS లోనే కొలువై ఉన్నారు .

ఓ రెండు నెలల కింద కాంగ్రెస్ / రేవంత్ రెడ్డి ఆపరేషన్ ఆకర్ష్ ప్రోగ్రాంలో కాంగ్రెస్ కండువా కప్పుకున్నారు . ఏమంత హడావుడి ? కండువా అవసరం ఏముంది !? ఇప్పుడు నయా ట్రెండ్ ఏమిటంటే ప్రతిపక్ష పార్టీ నుండి అధికార పక్షంలోకి వెళితే , కండువాల ప్రహసనం లేదు . ముఖ్యమంత్రి గారి సుందర రూపం నచ్చి , వారి ప్రభుత్వానికి మద్దతు పలుకుతున్నాం అని ముసిముసి నవ్వులు నవ్వుతూ ప్రకటించటం . నో విడాకులు . నో తాళిబొట్టు తెంచటం . ఓన్లీ వివాహేతర సహజీవనం . భలే బాగుంది . ఇది కదా అభివృద్ధి అంటే .

ముందు అర్జెంటుగా ఈ దరిద్రపు ఏంటి డిఫెక్షన్ చట్టాన్ని రద్దు చేసి పడేయాలి . అప్పుడు అధికారికంగానే అధికార పార్టీ లోకి జంపొచ్చు . అయినా ప్రజలు కూడా ఏం పట్టించుకోవడం లేదు . ఇలా వివాహేతర సహజీవనాన్ని జనం కూడా సరదాగానే ఎంజాయ్ చేస్తున్నారు .

గతంలో TRS కాంగ్రెస్ , టిడిపిలను చక్కగా ఖాళీ చేసింది . ఆంధ్రాలో YSRCP నుండి 23 మందిని టిడిపి ఎత్తుకొచ్చేసి , నలుగురు మంత్రుల్ని కూడా చేసిపడేసింది . దేశ ప్రజాస్వామ్య చరిత్రలో చారిత్రాత్మక ఘట్టం .

2019 ఎన్నికల తర్వాత జగన్ కూడా టిడిపి నుండి ఎత్తుకొచ్చుకున్నాడు . పాపం ! KCR లాగా ఎత్తుకొచ్చేయటంలో రేవంత్ కృతకృత్యుడు కాలేకపోతున్నాడు . BRS లెజిస్లేచర్ పార్టీని చీల్చలేకపోయాడు . కెసిఆర్ కెసిఆరే . ఘట్టి బుర్ర . అందుకని రేవంత్ జంపాసురులకు పదవులు కట్టబెడుతున్నారు . సవాలక్ష అవుడియాలు .

మండదూ ? కాలదూ ? ఇప్పుడు అదే జరిగింది . కౌశిక్ రెడ్డిని వదిలారు . కుర్రాడు కదా ! స్పీడులో ఉన్నాడు . ఏక్ దమ్మున BRS MLA ని కృష్ణా జిల్లా వాడిని చేసాడు . తెలంగాణా దెబ్బ రేపు చూపుతాను కాసుకో అన్నాడు . ఇప్పుడు ఆంధ్రా నుండి జనం వెళ్ళి BRS- కాంగ్రెస్ నాయకుడు గాంధీ తరఫున యుధ్ధం చేయాలి . సిధ్ధమా !? (ఇదంతా కొంతకాలంగా తెలుగు రాష్ట్రాల్లోని పరిణామాల గురించే… అంతకుముందు వైఎస్ చీల్చిన విధంబు, ఇతర రాష్ట్రాల్లో బీజేపీ ఏకంగా పార్టీలనే లేకుండా చేసిన వైనంబు, ప్రభుత్వాల్ని కూల్చిన దూకుడు గట్రా చర్చించలేదని గమనించగలరు…) (దోగిపర్తి సుబ్రహ్మణ్యం)