.
40 స్క్రీన్ల నుంచి 2,500 కి.. ‘హనుమాన్ అంశ్’ గ్రాండ్ సక్సెస్ వెనుక అసలు గేమ్ ఇదే! సినిమా హిట్ కావడానికి మంచి కథ ఉండాలి… ప్రేక్షకులకు నచ్చాలి… మౌత్ పబ్లిసిటీ రావాలి. ఇవన్నీ నిజమే. కానీ ఆ మౌత్ పబ్లిసిటీని బాక్సాఫీస్ వసూళ్లుగా మార్చడానికి డిస్ట్రిబ్యూటర్ కూడా ప్రేక్షకుడి వెంట నడవాలి. ఇప్పుడు ‘హనుమాన్ అంశ్’ విషయంలో అదే జరిగింది.
₹2 కోట్ల లోపు బడ్జెట్తో, పెద్దగా పరిచయం లేని నటీనటులతో, ఎలాంటి భారీ హంగామా లేకుండా ఆగస్టు 7న థియేటర్లలోకి వచ్చిన ఈ సినిమా తొలిరోజు కేవలం ₹10 లక్షలు మాత్రమే వసూలు చేసింది. తొలి వారం మొత్తం కూడా దాదాపు ₹1.08 కోట్లు. అంతే…
Ads
సాధారణంగా ఇలాంటి నంబర్లు కనిపిస్తే రెండో వారానికే థియేటర్లలో సినిమాకు ‘సెలవు’ చెప్పేస్తారు. కానీ ‘హనుమాన్ అంశ్’ కథ అక్కడితో ముగియలేదు. అసలు కథ అప్పుడే మొదలైంది.
సినిమాను దేశవ్యాప్తంగా దాదాపు 250– 300 స్క్రీన్లతో ప్రారంభించిన సినీపొలిస్ డిస్ట్రిబ్యూషన్ టీమ్ రెండో వారంలో స్క్రీన్ కౌంట్ను ఏకంగా 40 ప్రాంతాలకు కుదించింది. రెండో వారం వసూళ్లు ₹46 లక్షలే. పైకి చూస్తే ఇది మరింత దిగజారినట్టే.
కానీ ఇక్కడే ఒక ఆసక్తికరమైన విషయం కనిపించింది. స్క్రీన్లు తగ్గినా ఒక్కో స్క్రీన్కు వస్తున్న కలెక్షన్ మాత్రం గణనీయంగా పెరిగింది. అంటే సినిమా చూసేందుకు వస్తున్న ప్రేక్షకులు తగ్గలేదు… అందుబాటులో ఉన్న చోట ప్రేక్షకుల డిమాండ్ పెరుగుతోంది.
అక్కడే డిస్ట్రిబ్యూటర్ లెక్క మారింది. ‘సినిమా ఆడటం లేదు’ అనే లెక్క నుంచి… ‘సినిమాకు స్క్రీన్లు సరిపోవడం లేదు’ అనే లెక్కకు కథ మారిపోయింది.
సినీపొలిస్ వెల్లడించిన వివరాల ప్రకారం, ఏ సెంటర్లో ఆక్యుపెన్సీ నిలబడుతోందో, ఎక్కడ అడ్వాన్స్ బుకింగ్స్ పెరుగుతున్నాయో, ఏ ప్రాంతంలో డిమాండ్ తిరిగి వస్తోందో కేంద్రం కేంద్రంగా, షో షోగా విశ్లేషించారు. అవసరమైన చోట షోలు కొనసాగించారు. బుకింగ్స్ పెరిగిన చోట అదనపు షోలు ఇచ్చారు. ఇప్పటికే సినిమా తీసేసిన కొన్ని మార్కెట్లలో మళ్లీ సినిమాను ప్రవేశపెట్టారు.
అలా నెమ్మదిగా ‘హనుమాన్ అంశ్’ పరిధి పెరిగింది. 40 స్క్రీన్ల దగ్గరికి పడిపోయిన సినిమా… మళ్లీ వందలు, వేల స్క్రీన్లకు చేరుకుంది. సెప్టెంబర్ మొదటి వారానికే 2,000కు పైగా స్క్రీన్లలో ఆడింది. ఇప్పుడు ₹200 కోట్ల గ్రాస్ మార్క్ వైపు దూసుకెళ్తోంది. PTI ప్రకారం, సెప్టెంబర్ 11 నాటికి భారత్లో సినిమా గ్రాస్ వసూళ్లు ₹200 కోట్లకు చేరువయ్యాయి.
ఇదే విషయాన్ని ప్రముఖ ట్రేడ్ అనలిస్ట్ తరణ్ ఆదర్శ్ కూడా మరో కోణంలో చెప్పాడు. మొదట ‘అవారాపన్ 2’, ‘స్పైడర్ మ్యాన్: బ్రాండ్ న్యూ డే’, ‘టాక్సిక్’ వంటి సినిమాల మధ్య ‘హనుమాన్ అంశ్’కు పెద్దగా ఊపిరి తీసుకునే అవకాశం లేకపోయింది. కానీ తర్వాత డిమాండ్ పెరిగింది. అక్కడి నుంచి అసలు ఆట మొదలైంది. అంటే థియేటర్లలో సప్లై కంటే డిమాండ్ పెరిగినప్పుడు స్క్రీన్లు కూడా ప్రేక్షకుడి వైపు తిరిగాయి.
ఇది ‘హనుమాన్ అంశ్’ విజయాన్ని మరింత ఆసక్తికరంగా చేస్తోంది. ఎందుకంటే ₹2 కోట్ల సినిమాకు మొదటి వారంలో ₹1 కోటి కూడా పెద్దగా అనిపించదు. కానీ అదే సినిమాకు ఐదో వారంలో దేశవ్యాప్తంగా వేల షోలు నడుస్తూ ఉండటం మాత్రం అసాధారణం. సెప్టెంబర్ 4 నాటికి ఒకరోజే దాదాపు 5,400 షోలు, ఆ తర్వాతి ఆదివారం 7,300కు పైగా షోలు నమోదయ్యాయంటే ప్రేక్షకుల డిమాండ్ ఏ స్థాయిలో పెరిగిందో అర్థమవుతుంది.
ఇక్కడ ఇంకో విశేషం ఉంది… సినిమా మొదట హిందీలో వచ్చింది. కానీ ఇప్పుడు విజయాన్ని ఒక భాషకు పరిమితం చేయకుండా ఇతర భాషల ప్రేక్షకుల దగ్గరకు తీసుకెళ్లే ప్రయత్నం మొదలైంది. తెలుగు వెర్షన్ను ప్రముఖ దర్శకుడు త్రివిక్రమ్ శ్రీనివాస్ సమర్పిస్తున్నాడు. ఫార్చ్యూన్ ఫోర్ సినిమాస్ తెలుగు థియేట్రికల్ రిలీజ్ను చేపడుతోంది. సెప్టెంబర్ 18న తెలుగు వెర్షన్ గ్రాండ్గా విడుదల కానుంది.
అంతేకాదు… సౌత్లో మరిన్ని భాషల్లోకి డబ్బింగ్ చేస్తున్నట్టు నిర్మాత నమ్రతా సింగ్ వెల్లడించింది. సినిమా అంతర్జాతీయ విడుదల కూడా సెప్టెంబర్ 11 నుంచే మొదలైంది. అమెరికాలో ఇంగ్లిష్ సబ్టైటిల్స్తో ప్రదర్శనలు మొదలయ్యాయి. అంటే మొదట పెద్దగా పట్టించుకోని సినిమా ఇప్పుడు దేశీయ మార్కెట్ను దాటి విదేశీ ప్రేక్షకుల ముందుకూ వెళ్తోంది.
అంటే ‘హనుమాన్ అంశ్’ కథలో మరో ఆసక్తికరమైన మలుపు ఉంది. మొదట సినిమా కోసం థియేటర్లు వెతుక్కున్నారు. ఇప్పుడు సినిమా కోసం థియేటర్లు వెతుక్కుంటున్నాయి. అదీ ₹2 కోట్ల బడ్జెట్తో తీసిన సినిమాకు!
ఇంకా నిర్మాతలు సినిమా విజయాన్ని కేవలం థియేటర్లకే పరిమితం చేయడం లేదు. ‘హనుమాన్ అంశ్’ థీమ్తో గేమ్, కామిక్ బుక్ వంటి ఇతర ఫార్మాట్లపైనా పని చేస్తున్నామని నిర్మాతలు చెబుతున్నారు. సినిమా థియేటర్లను చిన్నపాటి ఆధ్యాత్మిక అనుభవంగా మార్చే ప్రయత్నాలు కూడా చేస్తున్నామని చెప్పారు— కొన్ని చోట్ల హనుమాన్ చాలీసా, బాబా చిత్రాలు, ప్రసాదం వంటి కార్యక్రమాలను కూడా చేపట్టినట్టు వెల్లడించారు.
- ఇక కథలో మరో ఆసక్తికరమైన ట్విస్ట్ ఏమిటంటే… ఈ సినిమా ఇప్పుడు ఒక సాధారణ హిట్ మూవీగా కాకుండా, ‘వర్డ్ ఆఫ్ మౌత్ ఎలా ఒక చిన్న సినిమాను భారీ బాక్సాఫీస్ ఫెనామినన్గా మార్చగలదు?’ అనే కేస్ స్టడీగా మారుతోంది.
సినిమా మొదటి వారం చూసి తీర్పు ఇచ్చుంటే ‘హనుమాన్ అంశ్’ కూడా వందల సినిమాల్లాగే థియేటర్ల నుంచి వెళ్లిపోయేది. కానీ ప్రేక్షకుల స్పందనను చదివారు. స్పందన ఉన్న చోట షోలు ఉంచారు. స్పందన పెరిగిన చోట షోలు పెంచారు. స్పందన తిరిగి వచ్చిన మార్కెట్లలో సినిమా మళ్లీ పెట్టారు.
అంటే ఈ విజయానికి ‘బాబా కృప’ ఒక కారణమని భక్తులు నమ్మవచ్చు. కానీ బాక్సాఫీస్ పరంగా చూస్తే మరో పేరు కూడా చెప్పాల్సిందే… సినిమా డిమాండ్ను సరిగ్గా చదివిన డిస్ట్రిబ్యూషన్! అందుకే 40 స్క్రీన్ల దగ్గరికి వెళ్లిన సినిమా… ఇప్పుడు 2,000 దాటింది. ₹10 లక్షల ఓపెనింగ్ తీసుకున్న సినిమా… ₹200 కోట్ల తలుపు తడుతోంది.
ఇది కేవలం ‘హనుమాన్ అంశ్’ కథ కాదు. ప్రేక్షకుడిని తొందరగా తక్కువ అంచనా వేయకూడదని చెప్పే బాక్సాఫీస్ కథ కూడా!
Share this Article