డొల్లతనం..! ఒకప్పుడు ప్రపంచానికి నీతులు, పాఠాలు నేర్పిన బ్రిటన్ ఎడ్డిమొహం…

మొన్న బ్రిటన్ ప్రధాని లిజ్ ట్రస్ రాజీనామా చేసింది ! రాజీనామా చేయకపోతే 1922 లో చేసిన చట్టాన్ని మార్చి అయినా అవిశ్వాస తీర్మానం పెట్టి మరీ దించేస్తాము అంటూ బ్రిటన్ పార్లమెంట్ సభ్యులు బెదిరిస్తేనే విధిలేక రాజీనామా చేయాల్సి వచ్చింది లిజ్ ట్రస్ ! మరి ఇది ఎలాంటి పరిపాలన ? తనకి వ్యతిరేకంగా స్వంత పార్టీ వాళ్ళు ప్రతిపక్ష పార్టీ వాళ్ళు ఏకం అయిపోయి రాజీనామా చేయమని ఒత్తిడి తెచ్చినా ససేమిరా అంటూ పీఠం మీద ఉండడానికే నిర్ణయించుకున్న మాజీ ప్రధాని ప్రవర్తన ప్రజాస్వామ్యం కిందకి వస్తుందా ? ఇది ఎలాంటి ప్రజాస్వామ్యం ?

మూడు నెలలో ఇద్దరు ప్రధానులు, ఇద్దరు హోమ్ సెక్రటరీ [హోమ్ మంత్రి ] లు రాజీనామా చేయాల్సి వచ్చింది అంటే మీరు చెప్పుకునే ప్రజాస్వామ్యం ఎంత గొప్పదో ప్రపంచానికి తెలిసిపోయింది !

మూడు నెలల క్రితం బోరిస్ జాన్సన్ కి పరిపాలన చేతకావడం లేదంటూ రాజీనామా చేయించారు. తరువాత లిజ్ ట్రస్ బాగా పరిపాలన చేయగలదు అంటూ ప్రధాని పీఠం మీద కూర్చోబెట్టారు. ఇప్పుడు మళ్ళీ సోమవారం నుండి కొత్త ప్రధాని పదవి కోసం చర్చలు వాదోపవాదాలు మొదలవుతాయిట ! జోక్ ఏమిటంటే…. మళ్ళీ ప్రధాని పదవి కోసం బోరిస్ జాన్సన్ పోటీలోకి వచ్చాడు ! భేష్ ! మూడు నెలల క్రితం పనికిరాని వాడు ఈ మూడు నెలల్లో ఏమైనా మంత్ర విద్యలు నేర్చుకున్నాడా బోరిస్ జాన్సన్..? ఇలా మంత్రం వెయ్యగానే అలా ఆర్ధిక సమస్యలు అన్నీ మటు మాయం అయ్యేలా ?

ఇదన్న మాట బ్రిటీష్ మార్కు ప్రజాస్వామ్యం !

**********************************

పోటీలో బోరిస్ జాన్సన్ తో పాటు ఋషి శునాక్ కూడా ఉన్నాడు ఇప్పుడు ! కానీ తాను ప్రధాని పదవి నుండి దిగిపోవడానికి కారణం ఋషి శునాక్ అంటూ బహిరంగంగానే ప్రకటించాడు బోరిస్ జాన్సన్ ! మాజీ ప్రధాని లిజ్ ట్రస్ కి కూడా గట్టిగానే వార్నింగ్ ఇచ్చాడు బోరిస్ జాన్సన్ నీ మంత్రి వర్గంలో కనుక ఋషి శునాక్ కి స్థానం కల్పిస్తే అది నీకే చేటు చేస్తుంది అంటూ ! ok ! అది రాజకీయ సంబంధ పోటీ లేదా విరోధంగా భావించాలి తప్పితే ఋషి శునాక్ భారతీయ మూలాలు ఉన్న వ్యక్తి కాబట్టి వివక్ష చూపిస్తున్నాడు బోరిస్ జాన్సన్ అని అనుకోవడానికి వీల్లేదు !

******************************

అసలు సమస్య ఏమిటీ ?

ఇప్పటికిప్పుడు మంత్రం వేసినట్లు బ్రిటన్ ఆర్ధిక సమస్య సమసిపోవాలి ! రాత్రికి రాత్రే ఇలాంటి సమస్యలు ఏ దేశంలో కూడా పరిష్కరించబడలేదు ఇప్పటి వరకు ! ఈ విషయం సదరు బ్రిటన్ పార్లమెంట్ సభ్యులకి తెలియదని కాదు కానీ సమస్య వెంటాడుతున్న తీరు వాళ్ళని తీవ్రంగా కలవరపెడుతున్నది! అందుకే దిక్కు తోచక ప్రధాని నాయకత్వం మీద మల్ల గుల్లాలు పడుతున్నారు ! కేవలం చర్చలలో నేను ఇలా చేస్తాను అని ఒకరు, కాదు నేనయితే అలా చేస్తాను అని ఒప్పించినంత సుళువు కాదు ఇప్పుడు బ్రిటన్ ని వెంటాడుతున్న సమస్య ! కానీ వాళ్ళ విధానం కావొచ్చు లేదా సంప్రదాయం కావొచ్చు చర్చలలో ఎవరు ఎలాంటి విధానాలు పాటిస్తాము అని హామీ ఇస్తారో వాటిలో మంచిది అనుకున్న వాళ్ళకి ప్రధానిగా అవకాశం ఇస్తారు.

కోవిడ్ పాత్ర !

కోవిడ్ వల్ల యూరోపులో ఎక్కువగా నష్టపోయింది బ్రిటన్ ! లాక్ డౌన్ల మీద లాక్డౌన్లు విధించి కోవిడ్ ని నీయంత్రించారు కానీ దాని వల్ల ఉత్పాదకత పడి పోయి ఆర్ధిక సమస్యలు వచ్చాయి ! కోవిడ్ భూతం పోయింది అనుకోని ఇక అంతా బాగుంది అనే సమయానికి పనిచేసేవాళ్ళ కొరత ఏర్పడింది. ఎవరు వచ్చి బ్రిటన్ లో పనిచేస్తారో అని ఎదురుచూపులు. పైకి బాగానే కనిపిస్తూ వచ్చినా లోలోపల కుళ్లడం మొదలుపెట్టింది కానీ దానిని బయట పడకుండా జాగ్రత్త పడ్డారు. అది ఇప్పుడు తన వాసనని వెదజల్లుతున్నది బాగా కుళ్లిపోయి !

బ్రెగ్జిట్ [యూరోపియన్ యూనియన్ నుండి బయటికి రావడం ] మరో పెద్ద కారణం ! ఎంతో మర్యాదస్తులు అని పేరుపడ్డ బ్రిటన్ బ్యూరోక్రాట్లు మూడేళ్ళ క్రితం యూరోపియన్ యూనియన్ పార్లమెంటులో చాలా హీనంగా ప్రవర్తించారు. అప్పట్లో యూరోపియన్ యూనియన్ నుండి బ్రిటన్ వైదొలగడానికి ముందు పార్లమెంట్ లో చర్చ జరిగిన సమయంలో బ్రిటన్ ప్రతినిధులు పెద్దగా అరుస్తూ మేము యూరోపియన్ యూనియన్ లో ఉండము, మాకు మేము విడిగా ఉంటాము అంటూ పెద్దగా కేకలు వేస్తూ, విషయం మీద మాట్లాడుతున్న జర్మనీ ప్రతినిధి ప్రసంగానికి మాటి మాటికి అడ్డు తగులుతూ హేళన చేశారు ! విసుగెత్తిన సదరు జర్మన్ ప్రతినిధి మీ అసలు స్వరూపం బయటపెట్టుకుంటున్నారు అంటూ ఘాటుగా సమాధానం చెప్పాడు.

**********************************

Brexit పేరుతో EU నుండి బయటికి వచ్చిన తరువాత బ్రిటన్ దృష్టి ప్రపంచంలో ఉన్న పెద్ద మార్కెట్ల మీద పెట్టింది. తమ ఉత్పత్తులని మార్కెట్ చేసుకోవడానికి అనువయిన దేశాలలో భారత్ మొదటి స్థానంలో ఉంచింది బ్రిటన్ ! ప్రతిపాదనలు ఒక కొలిక్కి వచ్చే సమయంలో కోవిడ్ వల్ల అది ఆగిపోయింది! అప్పటికే ప్రమాద ఘంటికలు మోగుతున్న సమయం అది ఆర్ధికంగా. అసలు యూరోపియన్ యూనియన్ నుండి బయటికి వచ్చిందే స్వంతంగా తమ ఉత్పత్తులని స్వేచ్ఛగా అమ్ముకోవాలని ! ఫ్రీ ట్రేడ్ అగ్రిమెంట్ [FTA] పేరుతో తమకి అనుకూలంగా నియమావళిని రూపొందించుకొని ప్రతిపాదనలు చేసింది భారత్ తో ! వాటిని సవరించి ఇరు దేశాలకి ప్రయోజనకరంగా తుది మెరుగులు దిద్దే క్రమంలో బోరిస్ జాన్సన్ రాజీనామా చేయాల్సి వచ్చింది !

ఐరన్ లెగ్ లిజ్ ట్రస్ – బ్రోవర్మన్ లు !

ఇలా ప్రధానిగా ప్రమాణ స్వీకారం చేసిందో లేదో బ్రిటన్ రాణి చనిపోయింది ! ఆ కార్యక్రమం ముగియడానికి 10 రోజులు పట్టింది ! ఇక మళ్ళీ స్వేచ్చా వాణిజ్య అగ్రిమెంట్ కోసం కసరత్తు చేస్తున్న తరుణంలో సుయేలా బ్రవర్మన్ భారతీయుల మీద తీవ్ర ఆరోపణలు చేసింది ! స్వేచ్చా వాణిజ్యం పేరుతో భారతీయులకి విచ్చలవిడిగా బిజినెస్ వీసాలు ఇస్తే వాళ్ళు ఇక్కడే ఉండిపోతారు అంటూ వివాదాస్పద వ్యాఖ్యలు చేసింది సుయేలా బ్రవర్మన్ ! అయితే అటు లిజ్ ట్రస్ ఇటు సుయేలా బ్రవర్మన్ లు ఇద్దరూ లెఫ్టిస్ట్ లే ! ఇది తెలిసీ ఎందుకు ఎన్నుకున్నట్లు ?

మరో విషయం ఏమిటంటే… గత జనవరి నెలలో లిజ్ ట్రస్ రష్యన్ విదేశాంగ మంత్రి లేవరోవ్ కి కలిసింది. కొద్ది రోజులకే రష్యా ఉక్రెయిన్ మీద దాడి మొదలుపెట్టింది ! రెండేళ్ల క్రితం ఇదే లిజ్ ట్రస్ చైనాని చూసి చాలా నేర్చుకోవాలి అంటూ మెచ్చుకుంది. బ్రిటన్ పాఠశాలలో చైనా అధికార భాష అయిన మాండరీన్ ని ప్రవేశపెట్టాలి అని డిమాండ్ చేసింది కూడా ! మరి అలాంటప్పుడు భారత్ తో స్వేచ్చా వాణిజ్యం పేరుతో అగ్రిమెంట్ ని పూర్తి చేయడానికి సహకరిస్తుంది అని ఎలా అనుకున్నారు బ్రిటన్ పార్లమెంట్ సభ్యులు ?

తెలివిగా సుయేలా బ్రవర్మన్ చేత వివాదాస్పద వ్యాఖ్యలు చేయించి తనకేమీ తెలియనట్లుగా నటించింది లిజ్ ట్రస్ ! బ్రిటన్ కనుక పూర్తి స్థాయి FTA ని అమలులోకి తెస్తే అది పరోక్షంగా చైనాకి నష్టం ! అసలే కోవిడ్ వల్ల ఎగుమతులు తగ్గి విలవిలలాడుతున్న చైనాకి బ్రిటన్ తన లిస్ట్ లో నుండి చేజారడం ఇష్టం లేదు! కానీ పార్లమెంట్ సభ్యులు విషయాన్ని అర్ధం చేసుకొని గత పదిహేను రోజులుగా ఒత్తిడి తెస్తూనే ఉన్నారు కానీ వెళుతూ వెళుతూ అగ్రిమెంట్ ఆలస్యం అయ్యేలా చేసి వెళ్ళిపోయింది ! ప్రస్తుతం బ్రిటన్ నుండి మేధో వలస ప్రారంభం అయినట్లుగా తెలుస్తున్నది !

బ్రిటన్ మోడీ పర్యటన కోసం ఎందుకు ఎదురుచూస్తున్నది ? బ్రిటన్ దేశంతో పాటు ఫ్రీ ట్రేడ్ అగ్రిమెంట్ ఇటు యూరోపియన్ యూనియన్ తోనూ మరియు కెనడాతోనూ ఒప్పందం చేసుకోబోతున్నారు… అలాగే యూరోపు తో పాటు కెనడాలో పర్యటించబోతున్నారు. ఫస్ట్ కం ఫస్ట్ ప్రిఫరెన్స్ అనేది ఎప్పుడూ ఉంటుంది. యూరోపుతో పాటు కెనడాతో చేసుకోబోయే ఒప్పందాలలో ఏ ఏ వస్తువులు దిగుమతి చేసుకుంటుందో వాటిని బ్రిటన్ నుండి దిగుమతి చేసుకోదు భారత్ ! కాబట్టి యూరోపు, కెనడా కంటే ముందే మోడీ బ్రిటన్ లో పర్యటించాలని చూస్తున్నది కేవలం ఫస్ట్ కం ఫస్ట్ ప్రిఫరెన్స్ కోసం ! అందుకే అంత ప్రాధాన్యం !

చివరిగా ….

భారతీయ మూలాలు ఉన్నాయి అని మనం సంతోషిస్తాము కానీ ఆయా దేశాలకి వలస వెళ్ళి అక్కడ స్థిరపడ్డ భారతీయులు తరువాతి తరం వారు కూడా అక్కడి సంస్కృతి, సాంప్రదాయాలని పుణికిపుచ్చుకున్నారు… అలాగే వాళ్ళ లో కలిసిపోయారు. కొంతమంది రాజకీయ రంగ ప్రవేశం చేసినా ఆయా దేశాలని ప్రేమిస్తూ వచ్చారు కానీ భారత దేశానికి చేసింది ఏమీ లేదు ఉండబోదు ! ఒక్క ఫిజీ దేశంలో మాత్రం రాజకీయ సంక్షోభం ఏర్పడినప్పుడు భారత్ సహాయం కోరిన సందర్భం ఉంది. కాబట్టి భారత మూలాలు ఉన్నవారు ప్రధానులు లేదా అధ్యక్షులు అయినా ఆయా దేశాల పట్ల భక్తిని ప్రదర్శిస్తారు తప్పితే మన దేశానికి మేలు చేస్తారు అనుకోవద్దు. రేప్పొద్దున ఋషి శునాక్ ప్రధాని అయినా అతను బ్రిటన్ దేశ క్షేమం కోసమే చూస్తాడు తప్పితే భారత దేశ క్షేమం కోసం ఏమీ చేయడు.

కృష్ణా జలల కోసం అలమట్టి డ్యామ్ ఎత్తు పెంచిన సందర్భంలో రాయచూరు పరిసర ప్రాంత రైతులు తెలుగు వారే అయినా ఆంధ్రా రైతులతో గొడవలకి దిగిన విషయం మరిచిపోయారా? కావేరీ నదీ జలాల విషయంలో కర్ణాటకలోని మాండ్యా జిల్లాలోని తమిళనాడు సరిహద్దుల వద్ద కావేరీ డెల్టా కింద వ్యవసాయం చేస్తున్న తమిళ రైతులు కన్నడ రైతుల పక్షాన నిలబడి ఆందోళన చేశారు. తమిళనాట స్థిరపడ్డ తెలుగువారు ఇంట్లో తెలుగులో మాట్లాడుకుంటున్నా మైకు ముందు పెట్టి మాట్లాడమంటే మేము తమిళులము అని గర్వంగా చెప్పుకుంటారు ! అందుచేత కమలా హారిస్ కావొచ్చు, ఋషి శునాక్ కావొచ్చు ఆయా దేశాల ఉన్నత పదవులని అలంకరించినా వాళ్ళ దేశ ప్రయోజనాలకి అనుగుణంగా నడుచుకుంటారు తప్పితే మన దేశం గురించి ఏ మాత్రం పట్టించుకోరు… నిజానికి అలా కోరుకోవడం తప్పు కూడా !