………. By…. పార్ధసారధి పోట్లూరి ….. బలూచ్ లిబరేషన్ ఆర్మీ [BLA] పాకిస్థాన్ మిలటరీ కాంప్ మీద దాడి చేసి 170 మంది పాక్ సైనికులని చంపేశారు ! 02-02-2022, బుధవారం రోజున బలూచిస్థాన్ స్వాతంత్ర్యం కోసం పోరాడుతున్న బలూచ్ లిబరేషన్ ఆర్మీకి చెందిన పోరాట యోధులు బలూచిస్థాన్ లో ఉన్న నోష్కి [Noshki ] మిలటరీ కాంప్ మీద దాడి చేశారు. పాకిస్థాన్ ఫ్రాంటియర్ కార్ప్స్ [Pakistan’s Frontier Corps (FC) ] కి చెందిన సైనికులని చంపేశారు. బుధవారం మొదలయిన మెరుపు దాడి శుక్రవారం వరకు అంటే 72 గంటలపాటు కొనసాగింది. నోష్కి మిలటరీ కాంప్ మీద కాకుండా ఇంకో మిలటరీ కాంప్ అయిన పంజ్గుర్ [Panjgur ] FC కాంప్ మీద కూడా BLA దాడి చేసింది. ఈ రెండు కాంప్ ల మీద జరిగిన దాడులలో మొత్తం 170 మంది సైనికులు మరణించినట్లు BLA ఒక ప్రకటనలో తెలిపింది. 72 గంటల పాటు జరిగిన ఈ దాడిలో మరణించిన తమ సైనికుల మృత దేహాలని తీసుకెళ్లడంలో విఫలమయ్యింది పాక్ ఆర్మీ అంటే అర్ధం చేసుకోవచ్చు దాడి ఎంత భీకరంగా జరిగిందో !
పాకిస్తాన్ కి చెందిన ప్రముఖ పత్రిక ‘డాన్ ‘ శుక్రవారం మధ్యాహ్నం వరకు ఆ ప్రాంతంలో భారీ పేలుడు శబ్దాలతో దద్దరింది అని పేర్కొంది. పాక్ ఆర్మీ తన యుద్ధ హేలీకాప్టర్లని వాడాల్సి వచ్చింది అంటే దాడి తీవ్రత ఏమిటో తెలిసిపోతున్నది. బలూచ్ లిబరేషన్ ఆర్మీ ఆ రెండు మిలటరీ కాంప్ లలో ఉన్న మహిళలని, పిల్లలని మానవ కవచాలుగా వాడుకొని పాక్ సైనికులు తమ మీద ఎదురుదాడి చేయకుండా 72 గంటల పాటు విధ్వంసం సృష్టించారు. ఈ దాడిలో BLA 8 మంది యోదులని కోల్పోయింది. అయితే చనిపోయిన వారు 170 మంది పాక్ సైనికులతో పాటు మరో 100 మంది దాకా తీవ్రంగా గాయపడ్డట్లు తెలుస్తున్నది. అయితే దాడుల తీవ్రతని గుర్తించిన పాక్ ప్రభుత్వం వెంటనే విద్యుత్ సరఫరాతో పాటు ఇంటర్నెట్ సేవలని నిలిపివేసింది.
Ads
ముహూర్తం ?
సరిగ్గా పాక్ ప్రధాని ఇమ్రాన్ ఖాన్ వింటర్ ఒలంపిక్స్ ప్రారంభ వేడుకల కోసం చైనా వెళ్ళిన రోజే ఈ దాడులు మొదలవడం అంటే బలూచిస్తాన్ లో చైనా ప్రాబల్యాన్ని మేము ఒప్పుకోము అంటూ చేసిన హెచ్చరిక దాడిగా అభివర్ణిస్తున్నారు విశ్లేషకులు! ఇక ఇమ్రాన్ ఖాన్ కి మరో అవమానం ఎదురయ్యింది బీజింగ్ లో. వింటర్ ఒలంపిక్స్ ప్రారంభ వేడుకల కోసం చైనా వచ్చిన వ్లాదిమిర్ పుతిన్ ఇమ్రాన్ ఖాన్ తో సమావేశం అవ్వడానికి నిరాకరించాడు. అంతకు ముందు పాక్ విదేశాంగ శాఖ ఉన్నత స్థాయి అధికారులు రష్యా విదేశాంగ శాఖ అధికారులతో ఫోన్ లో మాట్లాడి ఎలాగయినా పుతిన్ ఇమ్రాన్ ల సమావేశం అయ్యేట్లు చూడమని అభ్యర్ధించారు. కానీ పాకి అధికారుల విజ్ఞప్తిని తోసిపుచ్చారు రష్యన్ విదేశాంగ అధికారులు. అయితే దీని మీద పాకిస్తాన్ విదేశాంగ కార్యాలయం భారత్ విదేశాంగ శాఖ మంత్రి జయశంకర్ పుతిన్ తో ఇమ్రాన్ సమావేశం అవ్వకుండా అడ్డుకుంటున్నాడు అంటూ విమర్శలు చేసింది.
ప్రముఖ జియో పొలిటకల్ విశ్లేషకుడు మార్క్ కిన్రా [Mark Kinra] గారి విశ్లేషణ : (మార్క్ కిన్రా సౌత్ ఆసియా దేశాల సంస్కృతి, రాజకీయ విషయాల్ని చాలా కాలంగా గమనిస్తూ విశ్లేషిస్తున్నారు. ముఖ్యంగా బలూచిస్తాన్ సమస్య మీద మరింత ఎక్కువగా దృష్టి పెట్టి విశ్లేషిస్తున్నారు…) ఆయన మాటల్లో : ‘‘పాకిస్థాన్ ప్రభుత్వం,సైన్యం తమ దేశంలో ఏది జరిగినా అది పక్క దేశాల మీదకి నెట్టి వేసి చేతులు దులుపుకోవడం సర్వ సాధారణం. బలూచిస్థాన్ లోని నోష్కి [Noshki ], పంజ్గుర్ [Panjgur ] FC కాంప్ ల మీద BLA చేసిన దాడులు చాల ముందస్తు ప్రణాళికతో చేసినవే. ఇమ్రాన్ చైనా పర్యటనని అదనుగా చూసి మరీ దాడులు చేయడంలో ఉద్దేశ్యం చాలా స్పష్టంగా కనపడుతున్నది. బలూచిస్తాన్ లోని గ్వాదర్ పోర్ట్ ని చైనాకి అప్పచెప్పడం సహించలేక బీఎల్ఏ ఎప్పటి నుండో అటు చైనా సైన్యం మీద, ఇటు పాకిస్థాన్ మీద దాడులు చేస్తూ వస్తున్నది. దీనికి కారణం తమ ప్రాంతాన్ని నిర్లక్ష్యం చేసి తమ వనరులని చైనాకి కట్ట బెట్టడం మీద తీవ్ర ఆగ్రహం…. కానీ ఇప్పటి ఈ దాడుల మీద భారత్ కి చెందిన రా [RAW ] హస్తం ఉన్నది అంటూ ఆరోపణలు చేయడం హాస్యాస్పదం!’’
సమస్యకి మూలం పాకిస్థాన్ కి తెలుసు కానీ ఎప్పుడూ భారత్ ని బూచిగా చూపించడం ఒక నిత్య కృత్యమయిన అజెండా… దాంతో తమ పౌరులని పక్క దారి పట్టించడంలో సఫలం అవుతున్నది. జనవరి 25 -26 తేదీలలో కేచ్ అనే ప్రదేశంలో బలూచ్ యెధులు 10 మంది పాక్ సైనికులని మట్టుపెట్టాయి. ఈ ఘటన తరువాత పాకిస్థాన్ కి చెందిన ISPR [Inter-Services Public Relations] సంస్థ బలూచ్ లో దాడులకి కారణం భారత్ మరియు ఆఫ్ఘనిస్థాన్ దేశాలని, సూత్రదారులు భారత్ లో ఉన్నారని ఆరోపించింది. ఈ ISPR అనేది చైనాలోని అక్కడి ప్రభుత్వ మౌత్ పీస్ గ్లోబల్ టైమ్స్ లాంటిది.
భారత్ – ఇరాన్ – ఆఫ్ఘనిస్థాన్
ప్రస్తుత దాడులకి ఈ మూడు దేశాలు కారణం అంటూ పాక్ సైన్యం దుమ్మెత్తి పోస్తున్నది. సరే, పాక్ ISI సరిగ్గానే ఊహిస్తున్నది. బలూచిస్తాన్ సమస్యకు బ్రిటీష్ వాళ్ళ హయాంలోనే బీజం పడ్డది. అప్పట్లో బ్రిటీష్ ఇండియా సరిహద్దులు ప్రస్తుత పాకిస్థాన్ లోని ఫష్తూన్ జనాభా అధికంగా ఉన్న నార్త్ వెస్ట్ ఫ్రాంటియర్ తో పాటు పష్టూనిస్తాన్ ప్రాంతాలు ఆఫ్ఘనిస్థాన్ కి చెందినవే అయినా అవి బ్రిటీష్ india భాగంలో ఉండేవి. 1947 లో దేశ విభజన సమయంలో బలూచిస్తాన్ ప్రాంతం భూస్వాముల అధీనంలో ఉండేది. వాళ్లకి తమ ప్రాంతం పాకిస్థాన్ లో కలవడం ఇష్టం లేదు.
బ్రిటీష్ అధికారి డ్యూరాండ్ పష్తో భాష మాట్లాడే ప్రాంతాన్ని విడగొట్టి పాకిస్థాన్ లో కలిపే విధంగా ఆఫ్ఘన్, పాకిస్థాన్ దేశాల మధ్య డ్యూరాండ్ రేఖ పేరుతో సరిహద్దులు నిర్ణయించాడు. కానీ అప్పట్లో ఆఫ్ఘన్ లు దీనిని తిరస్కరించారు. ఎప్పటికయినా పష్తో భాష మాట్లాడే ప్రాంతం మొత్తాన్ని ఆఫ్ఘనిస్తాన్ లో కలుపుకోవాలి అనే కోరిక ఇంకా అలానే ఉండిపోయింది. అందుకే బలూచ్ లిబరేషన్ ఆర్మీ కి మద్దతు ఇస్తున్నది తాలిబాన్ ప్రభుత్వం. ఆయుధాలతో పాటు దాడులు చేసి తిరిగి తమ భూభాగంలోకి వచ్చి ఆశ్రయం పొందడానికి వీలు కల్పిస్తున్నారు తాలిబన్లు.
మరోవైపు ఇరాన్ కూడా ఎప్పటి నుండో ప్రత్యేక బలూచిస్తాన్ దేశం కోసం డిమాండ్ చేస్తున్న వాళ్ళతో తీవ్ర ఇబ్బందులు ఎదుర్కుంటున్నది… అయితే ఈసారి వాళ్లకి మద్దతు ఇస్తున్నది. ఆయుధాలతో పాటు దాడులు చేసి వెనక్కి వచ్చి ఇరాన్ లో ఆశ్రయం పొందుతున్నారు BLA యోధులు. ప్రత్యేక బలూచిస్తాన్ దేశం డిమాండ్‌తో ఇరాన్ లోని కొంత ప్రాంతం కూడా ఉంది. కానీ ప్రస్తుతానికి BLA ఆర్మీని పాకిస్థాన్ మీద దృష్టి పెట్టేందుకు సహకరిస్తున్నది ఇరాన్… తద్వారా తాత్కాలికంగా తమ జోలికి రాకుండా ఉంటారు అనే ఉద్దేశ్యంతో! గత మూడు నెలలుగా BLA దాడులు పెరిగిపోవడానికి కారణం ఇరాన్, ఆఫ్ఘన్ తాలిబన్లు ఇస్తున్న ప్రోత్సాహం వల్లనే.
తాలిబాన్ల వైఖరిలో మార్పుకి కారణం ?
పాకిస్తాన్ నీడలో ఉన్నంత వరకు ఆఫ్ఘనిస్తాన్ కి అంతర్జాతీయ మద్దతు మరియు ఆర్ధిక సహాయం దొరకదు అని తాలిబన్లు తెలుస్కున్నారు. దాంతో క్రమంగా పాకిస్తాన్ నుండి దూరంగా జరుగుతున్నారు. దాని ఫలితమే BLA దాడులు తీవ్రతరం కావడానికి కారణం. ఈ దాడిలో BLA గ్రనేడ్ లాంచర్లు, రాకెట్ లాంచర్లు ఉపయోగించినట్లు తెలిసింది. ఇవి ఆఫ్ఘన్ లో అమెరికా వదిలి వెళ్ళిన ఆయుధాలు అయి ఉండవచ్చు… అలాగే అధునాతన అమెరికన్ స్నైపర్ రైఫిల్ ని కూడా BLA వాడినట్లు తెలుస్తున్నది. ఇవన్నీ కూడా తాలిబన్లు ఇచ్చి ఉండవచ్చు. ఇక బలూచిస్తాన్ లోనే ఉన్న గ్వాదర్ పోర్ట్ దగ్గర చైనా సైన్యానికి చెందిన 10 వేల మంది సైనికులు కాపలాగా ఉన్నా, అక్కడ కూడా తరుచూ గెరిల్లా దాడులు చేసి పారిపోతున్నారు BLA పోరాట యోధులు. ఇది ఇప్పట్లో ఆగేలా లేదు…
Share this Article