.
Subramanyam Dogiparthi ….. జయసుధ మార్క్ సినిమా ఇది . ఇల్లాలి కోరికలు టైటిల్… శృతిమించిన ఆత్మాభిమానాలు , ఇగోల కారణంగా భార్యాభర్తలు విడిపోవటం , వయసు వేడి తగ్గాక పిల్లలో , పెద్దోళ్ళో , ఏదో పరిస్థితుల్లో కలపడం వంటి కధాంశంతో కుప్పలుకుప్పలు సినిమాలు వచ్చాయి .
అలాంటి సినిమాయే అయినా మహిళా ప్రేక్షకుల అభిమాన హీరో శోభన్ బాబు సినిమా కావడంతో వంద రోజులు ఆడింది . పెళ్ళిచూపుల నాడే తన డిమాండ్లకు ఓకే చెప్పించుకుని పెళ్ళికి ఒప్పుకుంటుంది హీరోయిన్ జయసుధ .
Ads
ఆ డిమాండ్లకు భిన్నంగా హీరో ప్రవర్తించడంతో విడిపోతారు . కవలపిల్లల్లో ఒకరిని హీరో ఎత్తుకుపోయి పెంచుకుంటాడు . ఆరేళ్ళ తర్వాత ఇద్దరు కవలలు , హీరో ముసలి తల్లిదండ్రులు కలిసి భార్యాభర్తల్ని కలుపుతారు . టూకీగా ఇదీ కధ .
సందేశం ఏమిటంటే భర్తలు సిగరెట్లు కాలుస్తున్నా , అప్పుడప్పుడు మందు కొడుతున్నా భార్యలు చూసీచూడనట్లు వదిలేయాలి . సినిమా మధ్యలో జమున , హరనాథ్ లేత మనసులు సినిమా గుర్తుకొస్తుంది . కవలల్లో ఒకరు ఆ సినిమాలో కూడా అరవ కూచి . యాదృచ్చికంగా రెండు సినిమాలలోనూ డాక్టర్ సూర్యాకాంతమ్మే .
సినిమా కధను ఉషశ్రీ అందిస్తే డైలాగులను పరుచూరి బ్రదర్స్ వ్రాసారు . జి రామమోహనరావు దర్శకుడు . చక్రవర్తి సంగీతంలో పాటలు థియేటర్లో శ్రావ్యంగానే ఉంటాయి .
హీరో తల్లిదండ్రులుగా సత్యనారాయణ , నిర్మలమ్మ నటించారు . ఇలాంటి పాత్రలు వాళ్ళిద్దరికీ కొట్టిన పిండే . ఆరేసుకోబోయి పారేసుకున్నాను హరీ అంటూ సినిమా పాటలతో ఓ పాట కూడా పాడతారు . సరదాగా ఉంటుంది .
వేటూరి వ్రాసిన అమ్మ వినవే తల్లి వినవే బుధ్ధి వచ్చె నాకు బుజ్జగించవే , టిక్ టిక్ టిక్ గడియారం పన్నెండయ్యింది , తొందరగుంది తొందరగుంది రావే ముద్దుల గుమ్మా డ్యూయెట్లు బాగుంటాయి . మూడు పాటల్నీ వేటూరే వ్రాసారు . ఆత్రేయ వ్రాసిన బాటలు వేరైనా బాటసారులు ఒకటే నడకలు పాట కూడా శ్రావ్యంగా ఉంటుంది .
ఇతర పాత్రల్లో ప్రభాకరరెడ్డి , నూతన్ ప్రసాద్ , కె విజయ , శుభ , హరిబాబు , గిరిబాబు , రోహిణి , సువర్ణ ప్రభృతులు నటించారు . తరచూ టివిలో కూడా ఏదో ఒక చానల్లో వస్తూ ఉంటుంది . సినిమా యూట్యూబులో ఉంది . శోభన్ బాబు , జయసుధ అభిమానులు చూడవచ్చు . #తెలుగుసినిమాలసింహావలోకనం #సినిమా_కబుర్లు #తెలుగుసినిమాలు
Share this Article