.
Subramanyam Dogiparthi …… చిరంజీవికి ఫిలింఫేర్ అవార్డుని తెచ్చిపెట్టిన సినిమా 1984 సెప్టెంబరులో వచ్చిన ఈ ఇంటిగుట్టు సినిమా . ఫైట్స్ , డాన్సుల పరంపరలో వచ్చిన ఇంటి కధాచిత్రం ఈ ఇంటిగుట్టు . వంద రోజుల ఫంక్షన్ గుంటూరులో 1985 జనవరి ఒకటో తారీఖున జరిగింది .
తమిళంలో 1964 లో వచ్చిన MGR , బి సరోజాదేవిల సూపర్ హిట్ సినిమా పనక్కర కుడుంబం సినిమాకు రీమేక్ మన తెలుగు సినిమా .
Ads
1958 లో వచ్చిన యన్టీఆర్ ఆ ఇంటిగుట్టు కథ ఈ సినిమా కధ ఒకటి కాదు . ఆ ఇంటిగుట్టు కధాంశమైన పిల్లల మార్పిడి ఆధారంగా వచ్చిందే మొన్నటి అల వైకుంఠపురంలో సినిమా…
ప్రముఖ నిర్మాత డి వి యస్ రాజు నిర్మాణంలో , కె బాపయ్య దర్శకత్వంలో వచ్చిన ఈ హిట్ ఇంటిగుట్టు సినిమాలో నళిని , సుహాసిని , రావు గోపాలరావు , అల్లు రామలింగయ్య , సత్యనారాయణ , గిరిబాబు , నూతన్ ప్రసాద్ , కాకినాడ శ్యామల , ప్రభాకరరెడ్డి , అన్నపూర్ణ , చంద్రమోహన్ , జయమాలిని , రావి కొండలరావు , సారధి ప్రభృతులు నటించారు . భారీ తారాగణం .
చిరంజీవి నటన గురించే ప్రత్యేకంగా చెప్పుకోవాలి . Settled నటనను కూడా బాగా చేయగలనని మరోసారి రుజువు చేసుకున్నారు . చిరంజీవితో రెండో సినిమా నళినికి . చాలా సినిమాల్లో హీరోయినుగా వేసిన సుహాసిని ఈ సినిమాలో చెల్లెలుగా నటిస్తుంది . అల్లు , సత్యనారాయణల అల్లరే అల్లరి . అలాగే చంద్రమోహన్ , సుహాసిని , జయమాలినిల ట్రయాంగ్యులర్ అల్లరి కూడా సినిమాలో బాగుంటుంది .
ఆస్తి కోసం మూర్ఛ రోగి అయిన భార్యను , బిడ్డను చంపించేందుకు విఫల యత్నం చేస్తాడు రావు గోపాలరావు . ఆ గుట్టును అడ్డంగా పెట్టుకుని అల్లు రామలింగయ్య , ఆయన చెల్లెలు కాకినాడ శ్యామల రావు గోపాలరావుని బ్లాక్ మెయిల్ చేస్తుంటారు . ఆ వలయాన్ని ఛేదించి తాను ప్రేమించిన రావు గోపాలరావు కూతురిని హీరో పెళ్ళి చేసుకోవటంతో సినిమా ముగుస్తుంది . రొటీన్ స్టోరీయే.
1980 s లో చక్రవర్తి ఎన్ని సినిమాలకు సంగీతాన్ని అందించాడో ! ఈ సినిమాకు కూడా ఆయనే సంగీతాన్ని అందించారు . వేటూరి సాహిత్యం రొమాంటిగ్గా ఉంటుంది . స్త్రీ పురుషుల మధ్య చెడుగుడు పోటీలో చెడుగుడు చెడుగుడు పాట హుషారుగా ఉంటుంది . అలాగే చంద్రమోహన్ , సుహాసిని డ్యూయెట్ లేపవే లేపవే లేపాక్షి చెయ్యిచ్చి లేపవే మీనాక్షి పాట కూడా గోలగోలగా బాగుంటుంది .
చిరంజీవి , నళిని డ్యూయెట్లు బాగుంటాయి . ఓ వాన పాట కూడా ఉంటుంది . కొత్త కొత్త ఆకలి , నవ్వితే నవ్వింది ఊరూవాడా , లేత లేత చీకటి పాటలు వేటూరి వారి మోడల్లోనే ఉంటాయి . వెరైటీ వెరైటీ అని సాగే క్లబ్ డాన్సులో చిరంజీవి డాన్స్ అదరగొట్టేస్తుంది . శేషు , సలీంలు డాన్సుల్ని కంపోజ్ చేసారు .
వాన పాట అచ్చంగా హిందీ బ్లాక్ బస్టర్ నమక్ హలాల్ సినిమాలోని అమితాబ్, స్మితాపాటిల్ వానపాటకు కాపీలా ఉంటుంది… ఆజ్ రపట్ జాయేతో… సేమ్, తోపుడు బండి మీద స్టెప్పులు, రొమాన్స్…
A neat , feel good , entertaining , family-centric , action movie . యూట్యూబులో ఉంది . చిరంజీవి అభిమానులు , నళిని అభిమానులు ఉంటే వాళ్ళూ , చూడతగ్గ సినిమాయే . #తెలుగుసినిమాలసింహావలోకనం #తెలుగుసినిమాలు
Share this Article