బ్రహ్మోస్ మిస్ ఫైర్ కావడమా..? ఆశ్చర్యం… ఇంకేదో ఉంది… కుట్ర కాదు కదా…!!

ఒక దేశ భూభాగం నుండి ఏదైనా గాల్లోకి లేచి అది పక్కన ఉన్న దేశ భూభాగంలోని గగనతలంలోకి ప్రవేశించింది అంటే దాన్ని యుద్ధంగానే భావిస్తుంది ఆ దేశం. అయితే మన రక్షణ మంత్రిత్వ శాఖ దీని మీద వివరణ ఇస్తూ రొటీన్ చెక్ లో భాగంగా బ్రహ్మోస్ మిసైల్ మిస్ ఫైర్ అయ్యిందని, అది పాకిస్తాన్ భూభాగంలోకి వెళ్లిందని, దీని మీద విచారం వ్యక్తం చేస్తున్నట్లు ప్రకటించింది. దీని మీద హై లెవెల్ కోర్ట్ విచారణ కోసం ఆదేశాలు ఇవ్వడం జరిగింది అని తెలిపింది. హై లెవెల్ కోర్ట్ విచారణ కోసం ఆదేశించింది అంటే దీనర్ధం ఒకరు కాదు ఇద్దరు కలిసి కావాలనే చేసినట్లు అర్ధమవుతున్నది. అయితే సదరు బ్రహ్మోస్ సిస్టం నిర్వహణ ఇంచార్జ్ ఆఫీసర్ దీనికి బాధ్యత వహించాల్సి ఉంటుంది. కోర్ట్ మార్షల్ ని ఎదుర్కోవాల్సి ఉంటుంది. టెక్నికల్ ఎక్స్పర్ట్స్ నివేదిక ఇస్తుంది దీని మీద. అసలు ఆ అవసరం లేకుండానే తెలుసుకోవచ్చు ఇది కావాలని చేసిన పని అని…

ఇక పాకిస్థాన్ మిలటరీ కి చెందిన మేజర్ జనరల్ బాబర్ ఇఫ్తికార్ మాట్లాడుతూ…. మా ఎయిర్ డిఫెన్స్ సిస్టం భారత సరిహద్దుల్లోని సిర్సా దగ్గర మిసైల్ గాల్లోకి లేచిన వెంటనే అప్రమత్తం అయ్యిందని, ఆ మిసైల్ ఫ్లైట్ పాత్ ని రికార్డ్ చేస్తూ వెళ్ళిందనీ, మొదట అది భారత్ భూభాగంలోనే ఎగురుతూ, హఠాత్తుగా అది తిరిగి మా భూభాగం మీదకి రావడం గమనించామని తెలిపాడు. బ్రహ్మోస్ మిసైల్ పాకిస్తాన్ భూభాగాలోకి ప్రవేశించినప్పుడు అది భూమి మీద నుండి 12 కిలోమీటర్ల ఎత్తులో శబ్ద వేగానికి మూడు రెట్ల వేగంతో ప్రయాణించింది అని చెప్తూ… చివరికి మిసైల్ 204 సెకన్లు పాక్ భూభాగం మీద ఎగిరి పాకిస్తాన్ లోని తూర్పు పంజాబ్ ప్రావిన్స్ లోని మియా చన్ను దగ్గర పంట పొలాల్లో పడిపోయింది అని ప్రకటించాడు. మరీ అంత ఖచ్చితంగా కాకపోయినా దాదాపుగా వాస్తవానికి దగ్గరలోనే ఉన్నాయి పాక్ మిలటరీ జనరల్ చెప్పిన గణాంకాలు. పాక్ లోని భారత రాయబారిని పిలిచి తీవ్ర నిరసన తెలిపింది పాక్ ప్రభుత్వం.

అయితే తిరిగి పాకిస్థాన్ ఎందుకు దాడి చేయలేదు ?

1. చాలా కాలం క్రితమే భారత్ పాక్ ల మధ్య మిసైల్ ప్రయోగానికి సంబంధించి ఒక ఒప్పందం ఉంది. దాని ప్రకారం ఏదన్నా మిసైల్ ని పరీక్షించదలుచుకుంటే మూడు రోజుల ముందుగానే ఇరు దేశాలు ఒకరికి ఒకరు తెలియచేయాలి.

2. దీనికోసం ఒక మెకానిజం ఏర్పాటు చేయాలి. పాక్ భారత్ లు రెండూ ఈ మెకానిజం ఏర్పాటు చేసాయి కూడా.

3. పరీక్ష నిర్వహించే ప్రదేశం, సమయం కూడా తెలియచేయాలి ఇరు దేశాలు.

4 . పరీక్షించదలుచుకున్న మిసైల్ కి వార్ హెడ్ ఉందా లేదా అనే విషయం కూడా తెలియచేయాలి. ఈ ఒప్పందం ప్రకారం పరీక్ష సమయంలో ఒకవేళ మిసైల్ దారి తప్పి, వేరే దేశ భూభాగంలోకి ప్రవేశిస్తే దాన్ని యుద్ధంగా ప్రకటించకూడదు. అయితే మూడు రోజుల క్రితం బ్రహ్మోస్ మిస్ ఫైర్ అయినప్పుడు దానికి వార్ హెడ్ లేదు కేవలం మిసైల్ మాత్రమే ప్రయోగించారు. కాబట్టి పెద్దగా భయపడాల్సింది లేదు కానీ మూడు రోజుల ముందే తెలియచేయలేదు కాబట్టి అది ఒప్పంద ఉల్లంఘన అవుతుంది.

5. మిసైల్ పరీక్ష నిర్వహించే ప్రదేశం ఇరు దేశాల సరిహద్దులకి కనీసం 70 కిలోమీటర్ల దూరంలో ఉండాలి. సిర్సా పట్టణం పాకిస్తాన్ సరిహద్దు నుండి 110 కిలోమీటర్ల దూరంలో ఉంది.

6. మానవ తప్పిదం అనేది అబద్ధం. కావాలనే చేసింది అనడానికి ఉదాహరణ చెప్తాను. గతంలో అమెరికాకి చెందిన TOMHAWLK క్రూయిజ్ మిసైల్ అసలు పేలకుండానే మధ్యలోనే తక్కువ ఎత్తునుండి కూలిపోయింది టెక్నికల్ గ్లిచ్ వల్ల. అయితే ఏ మాత్రం లోపలి భాగాలు చెడిపోకుండా దొరికిన తోమ్హాక్ క్రూయిజ్ మిసైల్ ని తరువాత లాబొరేటరీ కి తీసుకెళ్ళి దాని డిజైన్ ని కాపీ చేసి స్వంతంగా క్రూయిజ్ మిసైల్ ని తయారు చేసుకోగలిగింది పాకిస్థాన్.

7. ఇప్పుడు మన బ్రహ్మోస్ మిసైల్ కూడా పూర్తిగా ద్వంసం అవకుండా కేవలం ఇంధనం అయిపోవడం వలన కూలిపోయింది ఎందుకంటే దానికి వార్ హెడ్ లేదు. ఒకవేళ వార్ హెడ్ ఉండి ఉంటే దానివల్ల మొత్తం మిసైల్ ద్వంసం అయి ఉండేది కానీ వార్ హెడ్ లేకపోవడం వలన అలా జరగలేదు.

8. ఇప్పుడు అదే బ్రహ్మోస్ ని అన్నీ కాకపోయినా ఏదో ఒక భాగం పాకిస్తాన్ కి క్లూ ఇచ్చినట్లయింది. అంటే ఇది కావాలనే చేసిన ప్రయత్నంగా భావించవచ్చు. మీరు ఈ పోస్ట్ తో జత చేసిన ఫోటోలని [పాక్ మిలటరీ రిలీజ్ చేసినవి ] చూస్తె వాళ్ళు చాలా పిన్ point యాక్యురేట్ గా ఆ ఫోటోలోని భాగాలని ఒరిజినల్ మిసైల్ తో పోలుస్తూ కామెంట్ చేసారు. అందుకే ఇది విద్రోహ చర్య అంటున్నాను.

9. ఏదన్నా ఇలాంటి సంఘటన జరిగినప్పుడు పూర్తి వివరాలు తెలుసుకోకుండా సోషల్ మీడియాలో పోస్ట్ పెట్టకూడదు. అది హఫీజ్ సయీద్ మీద ప్రయోగించారని ఒకరు, లేదు పాక్ ఎయిర్ డిఫెన్స్ సిస్టం పని చేస్తున్నదో లేదో అని తెలుసుకోవడానికి ప్రయోగించారు అంటూ వింత పోస్టులు పెడుతున్నారు.

10. పాక్ ఎయిర్ డిఫెన్స్ పని చేస్తున్నదో లేదో తెలుసుకోవడానికి 16 కోట్ల విలువ చేసే బ్రహ్మోస్ మిసైల్  ప్రయోగించరు… దానికోసం 5 లక్షలు విలువ చేసే హై స్పీడ్ డ్రోన్ ని ప్రయోగిస్తారు. మిసైల్ ఏది అయినా కావొచ్చు దాని విలువ వార్ హెడ్ తో పోల్చకూడదు. వార్ హెడ్ విలువ చాలా తక్కువగా ఉంటుంది. మిసైల్ విలువ వార్ హెడ్ కంటే చాలా ఎక్కువ ఉంటుంది.

మనం ఒక కీలకమయిన విషయం గుర్తించట్లేదు ఇక్కడ. బ్రహ్మోస్ మిసైల్ ప్రయోగం జరిగింది ఈ నెల 9 న అయితే 5 రాష్ట్రాల ఎన్నికల ఫలితాలు వెలువడింది మరుసటి రోజు… అంటే మార్చి 10 న… రెండు దేశాల మధ్య యుద్ధ వాతావారణం సృష్టించడానికా..? పనిలో పనిగా ఏవో కొన్ని స్పేర్ పార్ట్స్ బ్రహ్మోస్ కి సంబంధించి పాకిస్థాన్ కి అందించడానికా? ఇలాంటి కీలకమయిన విషయాలు వదిలేసి మీ కామెడీ పోస్టులు ఎందుకు ? ఏదన్నా సంఘటన జరిగితే వెంటనే ఎలక్ట్రానిక్ మీడియాలో, ప్రింట్ మీడియాలో ఇలాంటి బ్రేకింగ్ పోస్టులు పెట్టాలనే ఆలోచన మానుకుంటే దేశానికి మంచిది. ఇలాంటి ఘటనల మీద పూర్తి వివరాలు వచ్చే వరకు వేచి చూసి ఆ తరువాత పోస్ట్ పెట్టండి…