ఈ శతాబ్దంలో మహిళాధిక్కారానికి చిరునామా ఫూలన్ దేవి… పసి వయసులోనే చిత్రహింసల కొలిమిలో ఛిద్రమైన ఆమె జీవితాన్ని, చేసిన బ్రతుకు యుద్దాన్ని కొన్ని తరాలు పాడుకునే చరిత్రను మన కళ్ళముందే నిలిపింది… చంబల్‌లోయను రక్తసిక్తం చేసిన ఠాగూర్ల తలల్ని గ్రామ కోట గుమ్మానికి వేలాడదీసిన సాహసి.., తిరుగుబాటుతో చేసిన సాహసోపేతమైన గాంగ్‌వార్‌… ఆ అరాచక మీర్జాపూర్ నుండి దేశ చట్టసభకు వెళ్లి గర్జించిన ఆమె ఈ తరపు స్త్రీ పోరాటానికి, మహిళా అస్తిత్వానికి మరోపేరు… అలాంటామెను కూడా విలన్‌గా చిత్రించడం ఒక్క తెలుగు సినిమా లోకానికి మాత్రమే తెలిసిన విద్య…
గోపిచంద్ మలినేని దర్శకత్వంలో రవితేజ, శృతిహాసన్, వరలక్ష్మి శరత్ కుమార్లతో తీసిన క్రాక్ సినిమా మంచి చెడులు బెేరీజు నాకనవసరం… స్థూలంగా మాఫియా, లోకల్ గ్యాంగ్‌వార్, క్రైమ్, పరువు హత్య నేపధ్యంలో… ఒక కానిస్టేబుల్ లోకల్ గాంగ్ లీడర్ బిడ్డను చేసుకుంటే ఒక సర్కిల్ ఇన్‌స్పెక్టర్ ఒక మాఫియా డాన్‌ను, మరొక చిలకలూరిపేట లెవల్ విలన్లను నాలుగు పీకి జైలులో వేయడం ప్రధాన కథ… పరువు హత్యకు ప్రేరేపించే భార్యతో హీరో ‘‘చూడడానికి శ్రీదేవిలా ఉన్నావ్, చేష్టలు పూలన్ దేవిలా ఉన్నాయి’’ అంటాడు… ఈ డైలాగ్ మాత్రమే కాదు… నల్లమల అడవుల్లో ఒంగోలు సర్వి తోపుల్లో బ్రతికే యానాదుల జీవితాలను అత్యంత అమానవీయంగా చూపించాడు…
ఇంతకాలం హాస్యానికి తెలంగాణ భాషను, క్రూరత్వానికి రాయలసీమ రెడ్లను రెప్లికా చేసిన తెలుగు సినిమా ఇప్పుడు తన గురిని ఒంగోలు, వేటపాలెం బాపట్ల యానాదుల వైపు మరల్చింది… యానాదుల్ని క్రూరులుగా, అనాగరికులుగా, హంతకులుగా… గాడిద రక్తాన్ని తాగి క్రూరంగా హత్యలు చేసే అమానవీయ మనుషులుగా చూపి గోపీచంద్ మలినేని తన ఒంగోలు వీరత్వాన్ని చాటుకున్నాడు…
Ads
దశాబ్దాలుగా అదే తప్పుడు సూత్రీకరణ తెలుగు తెరను ఏలుతోంది… కులాలను, ప్రాంతాలను వీరత్వానికి, అజ్ఞానానికి, హంతకులకు చిరునామా ఇంతకాలం వలసవాద చరిత్రకారులే చేశారు. ఇప్పుడు ఆ పని తెలుగు సినిమా చేస్తోంది… ఆ సినిమా తీసిన దర్శకుడు ఒంగోలు వాసి… ఇంటర్ చదివి చరిత్రను ఔపొసన పట్టిన సదరు డైరెక్టర్ మలినేని జ్ఞానం ఈ సినిమాలో ప్రతి ఫ్రేమ్ లో కనబడుతోంది…
తెరనిండా రక్తాన్ని, హింసనూ, పరువు హత్యనూ, మాఫియా, డాఫీయా, విలనిజాన్నీ కలిపి కాక్‌టైల్ చేసిన సినిమా క్రాక్… మూడు నాలుగు ఆంగ్ల సినిమాలు కట్ అండ్ పేస్ట్ చేసి వండిన బాహుబలికి వెయ్యి కోట్ల ఇచ్జిన కట్టప్పల కాలం కదా..? మా ఖమ్మంలో ఇపుడు ఈ సినిమా నాలుగు స్క్రీన్‌లలో ఆడుతోంది… లాక్ డౌన్ తాళాలు తీసి… తెరలు, బీర్లు , బార్లు, బార్లా తీసి బడులను మాత్రమే మూసేసిన పవిత్ర కాలాన… కాళ్ళు కట్టేసి, కట్టడి చేసి మార్కెట్‌ని నిస్తేజం చేస్తున్న పాలకుల పుణ్య కార్యాల నడుమ ఈ సినిమా బాగానే కాసులు వెనకేసి, రాష్ట్ర ఖాజానాను నింపేందుకు సిద్ధం అయిన పాడుకాలంలో విడుదలైన మహా విప్లవాత్మక మైన ఒంగోలు గిత్త లాంటి సినిమా… పేరు క్రాక్… ఇది నిజంగా పిచ్చికి పరాకాష్ట… #KRACK…….. By… గుఱ్ఱం సీతారాములు…
Share this Article