.
కల్యాణి… సంగీత సాహిత్య ప్రియులకు మృష్టాన్న భోజనమే ఈ సినిమా … ఓ శంకరాభరణం , ఓ మేఘసందేశం వంటి సంగీతసాహిత్యాలు . అయితే కమర్షియల్ గా ఆ సినిమాలు సక్సెస్ అయినట్లుగా సక్సెస్ కాలేదు . క్లాస్ ఆడియన్సుకు మాత్రమే గుర్తుండి ఉండాలి .
అన్నపూర్ణ ఫిలింస్ బేనరుపై మొట్టమొదటి సినిమా . అంటే అక్కినేని కుటుంబ సంస్థ . మాదిరెడ్డి సులోచన గారి రాగమయి నవల ఆధారంగా దాసరి నారాయణరావు దర్శకత్వంలో 1979 ఆగస్టులో వచ్చింది .
Ads
రమేష్ నాయుడు అద్భుతమైన సంగీతాన్ని అందిస్తే , అంతకుమించి బ్రహ్మాండమైన సాహిత్యాన్ని దాసం గోపాలకృష్ణ , సినారె , వేటూరి పోటాపోటీగా అందించారు . ఒక్కో పాట ఒక్కో ఆణిముత్యం . ఒక్కో పాట గురించి చెప్పుకుందాం .
వేటూరి వ్రాసిన నీ పలుకే త్యాగరాయ కీర్తన , నీ నడకే క్షేత్రయ పద నర్తనా , నీ పిలుపే జయదేవుని దీపికా , నీ వలపే కాళిదాసు కవితా . పాటంతా మన దేశ సాంస్కృతిక సౌరభాన్ని వెదజల్లుతుంది . బాలసుబ్రమణ్యం , సుశీలమ్మలు పాడారు . ఈ పాటలో జయసుధ శాస్త్రీయ నృత్యం చాలా బాగుంటుంది . విచిత్ర కుటుంబం సినిమాలోని ఆడవే జలకమ్మూలాడవే , అమెరికా అమ్మాయిలో పాడనా తెలుగు పాట పాటలు గుర్తుకు వస్తాయి.
మరో గొప్ప పాట సి నారాయణరెడ్డి వ్రాసిన లలిత కళారాధనలో వెలిగే చిరుదివ్వెను నేను పాట . ఈ పాట సినిమాలో మురళీమోహన్ మీద ఒకసారి , జయసుధ మీద మరోసారి ఉంటుంది . బాలసుబ్రమణ్యం , సుశీలమ్మల గాత్రంలో పాట చాలా శ్రావ్యంగా ఉంటుంది . జయసుధ పాడిన పాటలో పోతన , త్యాగయ్యలకే కడుపు నింపని కళలెందుకు అని ప్రశ్నించబడుతుంది .
మూడో పాట గుబులు పుట్టిస్తావె ఓ మల్లికా గుండెలే దోస్తావు ఓ మల్లికా . దాసం గోపాలకృష్ణ వ్రాస్తే సుశీలమ్మ , బాలసుబ్రమణ్యం పాడారు . నాలుగో పాట వేటూరి వ్రాసిందే . ఆకాశంలో హాయిగా రాగం తీసే కోయిలా జీవన రాగం విడిచావా కల్యాణి రాగం మరిచేవా పాట . వింటుంటే మన హృదయం ద్రవించిపోతుంది . బహుశా ట్రాజిక్ సాంగ్ అనుకుంటా .
ఈ సినిమా రిలీజప్పుడే చూసాను . నాకయితే సినిమాలో సీన్లు గుర్తులేవు . రిఫ్రెష్ చేసుకోవటానికి యూట్యూబులో సినిమా వీడియో లేదు . పాటల ఆడియోలు అన్నీ ఉన్నాయి . కొన్ని పాటల వీడియోలు మాత్రమే ఉన్నాయి . ఈ సినిమాను ఆరోజుల్లో చూసిన సంగీత సాహిత్య ప్రియులకే గుర్తుండి ఉండాలి . కామెంట్లలో వారే యాడ్ చేయాలి .
అయిదో పాట లేత లేత యెన్నెల్లో నీలి నీలి చీరె కట్టి నూకాలమ్మ జాతర నాడు నూతి కాడ కూర్చుంటే పాట . దాసం గోపాలకృష్ణ వ్రాస్తే యస్ జానకి పాడారు . సినిమాలో హలం మీద అని గుర్తు . ఆరోది ఏది మోసం ఎవరిది దోషం ఏది పాపం ఎవరిది లోపం . సి నారాయణరెడ్డి వ్రాసిన ఈ పాటను సుశీలమ్మ , బాలసుబ్రమణ్యం పాడారు .
ప్రధాన పాత్రల్లో మురళీమోహన్ , జయసుధ , మోహన్ బాబు , నిర్మలమ్మ నటించారు . జయసుధ అద్భుతంగా నటించిందని మాత్రం గుర్తుంది . మంచి పేరు కూడా వచ్చిందని గుర్తు . ఇంత గొప్ప కళాత్మక సినిమా యూట్యూబులో లేకపోవడం బాధాకరం . ఎవరైనా సినీప్రియులు పూనుకుంటే బాగుంటుంది .
సినిమా యూట్యూబులో లేదు కాబట్టి సినిమా చూడండని చెప్పలేను . కొన్ని పాటల వీడియోలు , అన్ని పాటల ఆడియోలు ఉన్నాయి . సంగీత సాహిత్య ప్రియులు పొరపాటున కూడా మిస్ కావద్దు . A great , unmissable musical & literary feat . #తెలుగుసినిమాలసింహావలోకనం #తెలుగుసినిమాలు ……… (దోగిపర్తి సుబ్రహ్మణ్యం)
Share this Article