.
కమల్‌హాసన్ ఓ పాత వివాదాన్ని మళ్లీ గోక్కుంటున్నాడా..? సీఎం విజయ్‌కు కూడా ఓ పరీక్ష పెడుతున్నాడా..? డీఎంకే మద్దతుతో రాజ్యసభ ఎంపీ అయ్యాడు కదా, ఆ డీఎంకే స్టాలిన్ సూచనతోనే ఓ పాత వివాదాస్పద టైటిల్‌తో సినిమా ప్రకటించాడా..? 23 ఏళ్ల తరువాత ఆ టైటిల్ మళ్లీ ఎందుకు తెరమీదకు వస్తోంది..?
( గోపు విజయకుమార్ రెడ్డి )… 2003 చివరలో కమల్ హాసన్ తన దర్శకత్వంలో తెరకెక్కిస్తున్న గ్రామీణ నేపథ్యంలో సాగే యాక్షన్ చిత్రానికి ‘సండియార్’ (Sandiyar) అనే టైటిల్‌ను ప్రకటించారు. ఈ సందర్భంగా చేతిలో సంప్రదాయ తమిళ ఆయుధమైన అరువాళ్ (కొడవలి) పట్టుకున్న కమల్ హాసన్ పోస్టర్లు అప్పట్లో తీవ్ర చర్చకు దారితీశాయి.
Ads
అయితే, సినిమా టైటిల్ ప్రకటించిన వెంటనే తమిళనాడులో రాజకీయ, సామాజిక వివాదం మొదలైంది. ముఖ్యంగా దక్షిణ తమిళనాడులోని కుల ఆధారిత సంఘాలు, రాజకీయ సంస్థలు ఈ టైటిల్‌పై తీవ్ర అభ్యంతరం వ్యక్తం చేశాయి. ‘సండియార్’ అనే పదం ఆధిపత్య కులాల దౌర్జన్యాన్ని, కుల ఆధారిత రౌడీయిజాన్ని ప్రోత్సహించేలా ఉందని వారు ఆరోపించారు.
ఈ వ్యతిరేకతకు నాయకత్వం వహించింది దళిత అనుకూల రాజకీయ పార్టీ పుదియా తమిళగం అధినేత డాక్టర్ కె. కృష్ణస్వామి.
సినిమా టైటిల్‌తో పాటు కమల్ హాసన్ అరువాళ్ పట్టుకున్న పోస్టర్లు కూడా కుల ఆధారిత హింసను, అరువాళ్ సంస్కృతిని మళ్లీ ప్రోత్సహించే ప్రమాదం ఉందని కృష్ణస్వామి అభ్యంతరం వ్యక్తం చేశారు. ఇలాంటి చిత్రీకరణ దక్షిణ తమిళనాడులో ఇప్పటికే సున్నితంగా ఉన్న సామాజిక పరిస్థితులను మరింత ఉద్రిక్తం చేస్తుందని ఆయన హెచ్చరించారు.
ఈ నిరసనలు క్రమంగా తీవ్రరూపం దాల్చాయి. తేని వంటి దక్షిణ తమిళనాడు జిల్లాల్లో సినిమా షూటింగ్‌కు కూడా అడ్డంకులు ఎదురయ్యాయి. చిత్రబృందానికి వ్యతిరేకత పెరగడంతో పాటు రాజకీయ ఒత్తిడి కూడా అధికమైంది.
అప్పట్లో తమిళనాడు ముఖ్యమంత్రిగా ఉన్న జయలలిత ప్రభుత్వం ముందు శాంతిభద్రతల సమస్య తలెత్తింది. షూటింగ్ కొనసాగితే ఆందోళనలు, అడ్డంకులు ఎదురయ్యే అవకాశం ఉందని, చిత్రబృందం భద్రతకు ఇబ్బందులు కలగవచ్చని పరిస్థితులు సూచించాయి. ఈ నేపథ్యంలో వివాదాస్పద టైటిల్‌ను మార్చుకోవాల్సిందిగా చిత్ర నిర్మాతలపై ఒత్తిడి పెరిగింది.
చివరకు భారీ ఆర్థిక పెట్టుబడులు, షూటింగ్ ఏర్పాట్లు, నిర్మాణ వ్యయాలను దృష్టిలో ఉంచుకుని కమల్ హాసన్ వెనక్కి తగ్గారు. ‘సండియార్’ అనే టైటిల్‌ను తొలగించి, సినిమాలోని ప్రధాన పాత్ర పేరు ఆధారంగా ‘విరుమాండి’గా సినిమా పేరును మార్చారు. ఇప్పుడు అదే ఆ వివాదాస్పద టైటిల్ ‘సండియార్’ పేరుతోనే కమలహాసన్ కొత్తగా మళ్లీ సినిమాను ప్రకటించాడు…
2004లో ‘విరుమాండి’ పేరుతో ప్రేక్షకుల ముందుకు వచ్చిన ఈ చిత్రానికి కమల్ హాసనే రచయిత, దర్శకుడు, కథానాయకుడు. విడుదల అనంతరం ఈ సినిమా మంచి వాణిజ్య విజయాన్ని అందుకోవడంతో పాటు, తన కథనం, నటన, దర్శకత్వం, గ్రామీణ నేపథ్యంలోని సామాజిక వాస్తవికతతో ప్రత్యేక గుర్తింపు సంపాదించుకుంది. ముఖ్యంగా దక్షిణ తమిళనాడులో ఈ సినిమా కాలక్రమేణా ఒక కల్ట్ క్లాసిక్‌గా నిలిచిపోయింది.
ఒక సినిమా టైటిల్ చుట్టూ మొదలైన రాజకీయ, సామాజిక వివాదం చివరకు తమిళ సినీ చరిత్రలో గుర్తుండిపోయే ‘విరుమాండి’ చిత్రానికి దారితీసింది.
ఇది తెలుగు లో పోతరాజు సినిమాగా రీమేక్ అయ్యింది.. ఒక్కసారీ సమరసింహ రెడ్డి, నర్సింహా నాయుడు, చెన్నకేశవరెడ్డి లాంటి సినిమాలు మన దగ్గర ఎటువంటి ఇష్యూ క్రియేట్ చెయ్యలేదు.. అక్కడ మాత్రం చిన్న సినిమా టైటిలే ఏకంగా గవర్నమెంట్ ఇన్వాల్వ్ అయ్యేలా చేసింది…
Share this Article