ఆపండీ… ఓ అరుపు…! ఆగుతుంది… పెళ్లి కాదు… చిరంజీవి ఉరి..!!

.

హీరో పాత్ర పేరు సత్యం . అడేవన్నీ అబధ్ధాలే . ప్రతి అబధ్ధం దేవుడి మీద ప్రమాణం చేసి చెపుతాడు చాలామంది రాజకీయ నాయకులు రాజ్యాంగం మీద ప్రమాణం చేసినట్లు . అసలీ సినిమాకు పెట్టవలసిన అసలుసిసలైన పేరు అబధ్ధాలకోరు లేదా అబధ్ధాలరాయుడు .

కానీ వంద రోజులు ఆడిన సక్సెస్ సినిమాకు ఆ కోతలరాయుడు పేరు సూటబుల్ కాదని ఎలా అంటాం . జనం ఏది రైటంటే అదే రైట్ . హీరోగా నిలదొక్కుకోవటానికి కష్టపడుతున్న రోజుల్లో వచ్చిన సినిమా . యూత్ కి చిరంజీవిని బాగా కనెక్ట్ చేసిన ఎర్లీ సినిమాలలో ఇదొకటి . డాన్సుల్ని ఇరగతీసాడు .

బయట జల్సాబాబు , ఇంట్లో అందరికీ గారాల బాబు , అందరికీ మాయమాటలు చెపుతూ పబ్బం గడుపుకుంటూ ఉంటాడు . ఆ క్రమంలో హీరోయిన్ని కూడా వంచించుతాడు . హీరోయిన్ గర్భవతి అవుతుంది . తండ్రి పరువు కోసం కావాలని చేయని హత్య కేసులో ఇరుక్కుని ఉరిశిక్ష వేయించుకుంటాడు .

ఆఖరి క్షణంలో స్టాప్ అనే సినిమా కేకతో ఉరిశిక్ష ఆగిపోయి జన జీవన స్రవంతిలోకి వస్తాడు . చిరంజీవి ఇలా ఆఖరి క్షణంలో ఉరికంబం నుండి స్టాప్ కేకతో రెండు సార్లు బయటపడ్డాడు . ఒకసారి ఈ సినిమాలో మరోసారి అభిలాష సినిమాలో .

తమ్మారెడ్డి నిర్మాతగా వచ్చిన ఈ సినిమాకు దర్శకుడు కె వాసు . డైలాగులను సత్యానంద్ వ్రాసారు . చక్రవర్తి మార్కు పాటలు పడలేదు . అయినా శ్రావ్యంగానే ఉంటాయి . ఎండా వానా పాట చిరంజీవి , మాధవి మీద బాగానే ఉంటుంది . జాలాది వ్రాస్తే బాలసుబ్రమణ్యం , యస్ పి శైలజలు పాడారు . పువ్వులోయ్ పువ్వులు అనే క్లబ్ సాంగ్ చిరంజీవి , మంజుభార్గవి మీద ఉంటుంది . బాలసుబ్రమణ్యం కేకలతో , చిరంజీవి డాన్సుతో కుర్రాళ్ళకి బాగా నచ్చింది . సి నారాయణరెడ్డి వ్రాసారు .

మంజుభార్గవి బాగా నలిగిపోయిన పాట గో గో గో మిస్టర్ గో . ఈ మంజుబార్గవినేనా కె విశ్వనాథ్ శంకరాభరణంలో మనకు చూపింది అని అనిపిస్తుంది . ఈ పాటను చక్రవర్తే వ్రాసారు . నాలుగో పాట కాస్త బయట కూడా హిట్టయింది ఒక నెలవంక చిరు గోరింక బర్త్ డే పాట . చిరంజీవి , బేబీ తులసి మీద బాగుంటుంది . జాలాదే ఈ పాటనూ వ్రాసారు . టైటిల్ సాంగ్ అయిదోది . కోతలరాయుడు అంటూ కేకలతో బాలసుబ్రమణ్యం , ఆయన బృందం పాడారు .

చిరంజీవి , మాధవి , హేమసుందర్ , నిర్మలమ్మ , మంజుభార్గవి , గిరిబాబు , కె విజయ , శైలజ (యస్ పి శైలజ కాదు) , సారధి , కె వి చలం ప్రభృతులు నటించారు . వంద రోజులు ఆడిన ఈ సినిమా చిరంజీవి జైత్రయాత్రలో ఓ మైలురాయి . 1979 సెప్టెంబరులో వచ్చిన ఈ సినిమా ఫుల్ చిరంజీవి సినిమా .

యూట్యూబులో ఉంది . చిరంజీవి అభిమానులు ఎవరయినా చూసి ఉండకపోతే వెంటనే చూసేయండి . An entertaining movie . #తెలుగుసినిమాలసింహావలోకనం #తెలుగుసినిమాలు …… (దోగిపర్తి సుబ్రహ్మణ్యం)