గురుశిష్యులు ఆదుర్తి-కృష్ణల కాంబినేషన్లో 1975 లో వచ్చిన ఈ గాజుల కిష్టయ్య సినిమా వంద రోజులు ఆడింది . ప్రముఖ నటి జరీనా వహాబ్ తెలుగులో నటించిన మొదటి సినిమా ఇది . హిందీలో అప్పట్లో ఆమె పాపులర్ హీరోయిన్ . ఈమధ్య అంటే 2010 లో వచ్చిన రక్తచరిత్రలో కూడా నటించింది .
ఆదుర్తి స్వంత సినిమా కూడా ఇది . ఆదుర్తి మార్కు సినిమా . ఎమోషన్స్ , సాంగ్స్ , నీట్ ప్రెజెంటేషన్ ఉంటాయి . పెళ్ళికి ముందే బిడ్డను ప్రసవిస్తే , ఆ బిడ్డను ఇంట్లోవాళ్ళు వదిలించుకుంటానికి ప్రయత్నిస్తారు . ప్రసవం చేయించిన స్త్రీ ఆ బిడ్డను కిష్టయ్యగా పెంచుకుంటుంది . ఆ కిష్టయ్య తన కొడుకే అని తెలవటం , మేనకోడల్ని ఇచ్చి పెళ్లి చేయటం టూకీగా కధ . మధ్యలో విలన్లు , కుట్రలు మామూలేగా ! కృష్ణ , చంద్రమోహన్లు చాలా చలాకీగా నటించారు . జరీనా వహాబ్ నటన కూడా హుషారుగా ఉంటుంది .
కె వి మహదేవన్ సంగీత దర్శకత్వంలో పాటలు శ్రావ్యంగా ఉంటాయి . నవ్వులు రువ్వే పువ్వమ్మా నీ పువ్వులు నాకు ఇవ్వమ్మా సినిమాకు హైలైట్ పాట . మిగిలిన పాటలు ఇన్ని రోజులింత సొగసు ఏడ దాచుకున్నావు , వేసుకో ఈ గాజులు చూసుకో నీ సొగసులు , రేపు ఎంతో తీయనిది నేటికన్నా కమ్మనిది శ్రావ్యంగా ఉంటాయి .
Ads
ఇప్పటి తరం వాళ్ళు ఇంటింటికి తిరిగి గాజులను అమ్మేవాళ్ళను చూసి ఉండరు . బహుశా ఆ వ్యాపారం చేసేవాళ్ళు గ్రామాల్లో కూడా లేరేమో ఇప్పుడు ! మా చిన్నప్పుడు ఈ గాజులను అమ్మేవాళ్ళను ఎంతో గౌరవంగా చూసేవారు . గాజులంటే శుభానికి , సౌభాగ్యానికి ప్రతీకలు కావటం వలన వాటిని అమ్మేవారిని కూడా అలాగే గౌరవంగా చూసేవారు .
కాలక్రమంలో ఆ వృత్తి కనుమరుగై పోయింది . ఇప్పుడు మహిళలకు అవసరమైన గాజులు , బొట్లు , కాటుకలు , వగైరా అమ్మే ప్రత్యేక షాపులు కోకొల్లలు . మహిళాలోక్ , నారి వంటి పేర్లతో . ఇప్పుడు వన్ గ్రాం గోల్డ్ ఆభరణాలు , వెండి ఆభరణాల మీద గోల్డ్ కోటింగ్ , ఇమిటేషన్ జువలరీ వీర పాపులర్ అయ్యాయనుకోండి .
కృష్ణ , జరీనా వహాబ్ , చంద్రమోహన్ , అంజలీదేవి , నిర్మలమ్మ , గిరిబాబు , కాంతారావు , పుష్పకుమారి , శుభ , సాక్షి రంగారావు , సూరేకాంతం , ఛాయాదేవి , మాడా ప్రభృతులు నటించారు .
సినిమా యూట్యూబులో ఉంది . కృష్ణ అభిమానులు ఎవరయినా చూసి ఉండకపోతే తప్పక చూడండి . చూడబులే . It’s a feel good , musical cinema . #తెలుగుసినిమాలసింహావలోకనం #తెలుగుసినిమాలు ……… [ By దోగిపర్తి సుబ్రహ్మణ్యం ]
Share this Article