.
వాహనం కనిపిస్తే చాలు… నానారకాల చలాన్లతో జనాన్ని బాదే ప్రభుత్వాలు, ప్రత్యేకించి పోలీసు- రవాణా శాఖ అనేక ప్రమాదాలకు, ప్రాణనష్టాలకు కారణమైన ఓ కీలకాంశాన్ని ఎందుకు విస్మరిస్తున్నాయి… తెలియక కాదు, తెలియనట్టు నటిస్తూ..! అనేక ప్రాణాలను తీస్తున్న ఆ కారణం… ఎల్ఈడీ హైబీమ్ హెడ్లైట్లు…
ఒకప్పుడు రాత్రి ప్రయాణం అంటే వెన్నెల వెలుగులో, చల్లని గాలిని ఆస్వాదిస్తూ సాగే ప్రశాంతమైన అనుభూతి. కానీ నేడు సీన్ మారింది. రాత్రి 7 గంటలు దాటిందంటే చాలు, వాహనదారులు రోడ్డు మీదకు రావాలంటేనే భయపడుతున్నారు. దీనికి కారణం ఎదురుగా వచ్చే వాహనాల నుంచి వెలువడే “LED.. కళ్లను పొడుస్తూ చొచ్చకొచ్చే కాంతి…
Ads
కంపెనీల పోటీ… వాహనదారుల తిప్పలు!
గతంలో కార్లకు సాధారణ హాలోజెన్ (Halogen) బల్బులు వచ్చేవి. వాటి వెలుతురు పసుపు రంగులో ఉండి, కళ్లకు అంతగా ఇబ్బంది కలిగించేది కాదు. కానీ ఇప్పుడు ట్రెండ్ మారింది. కార్ల తయారీ కంపెనీలే పోటీ పడి మరీ బేస్ వేరియంట్ నుంచి టాప్ వేరియంట్ వరకు అత్యంత శక్తివంతమైన వైట్ LED హెడ్లైట్లను ఇస్తున్నాయి.
కంపెనీలు తమ కార్ల లుక్ పెంచడానికి, ‘ప్రీమియం’ ఫీచర్గా ప్రమోట్ చేసుకోవడానికి ఈ లైట్లను అమరుస్తున్నాయి. కానీ, ఈ లైట్ల తీవ్రత (Intensity) భారతీయ రోడ్లకు, ఇక్కడి ట్రాఫిక్ పరిస్థితులకు సరిపోతుందా లేదా అనే విషయాన్ని కంపెనీలు గాలికొదిలేశాయి. దీనికి తోడు కొంతమంది వాహనదారులు చాలీచాలక అదనంగా ‘ఆఫ్టర్ మార్కెట్’ మోడిఫైడ్ LED కిట్లను కూడా బిగించుకోవడంతో రోడ్లు నరకప్రాయంగా మారుతున్నాయి.
తాత్కాలిక అంధత్వం (Flash Blindness)
కంపెనీలు ఇస్తున్న ఈ హై-బీమ్ LED లైట్లు నేరుగా కళ్లలో పడగానే కంటి రెటినాపై తీవ్ర ప్రభావం పడి, కనీసం 3 నుంచి 5 సెకన్ల పాటు ఏమీ కనిపించని ‘బ్లైండ్ స్పాట్’ ఏర్పడుతోంది.
“గంటకు 60-80 కి.మీ వేగంతో వెళ్లే వాహనానికి ఆ 5 సెకన్ల అంధత్వం చాలు… ప్రాణాలు గాల్లో కలవడానికి. ఆ గ్యాప్లో వాహనం రోడ్డు పక్కకు దూసుకెళ్లినా, డివైడర్లను గుద్దేసినా లేదా ముందున్న మనిషిని, వాహనాన్ని గుద్దేసినా ప్రాణాంతక ప్రమాదాలు జరుగుతున్నాయి.”
మాయమైన ఆ ‘బ్లాక్ స్టిక్కర్’ నిబంధన
గుర్తుందా? ఒకప్పుడు ప్రతి వాహనం హెడ్లైట్ మధ్యలో ఒక నల్లటి చుక్క లేదా సగం వరకు నలుపు రంగు స్టిక్కర్ ఉండేది. లైట్ ఫోకస్ నేరుగా ఎదుటివారి కళ్లలో పడకుండా భూమి వైపు లేదా కిందకు ప్రసరించడమే ఆ నిబంధన ముఖ్య ఉద్దేశ్యం. కానీ ఇప్పుడు కంపెనీలు ఇస్తున్న కొత్త మోడల్ కార్ల స్టైలిష్ డిజైన్ల సాకుతో ఈ విధానాన్ని పూర్తిగా పక్కన పెట్టేశారు. ఫలితంగా రోడ్లపై లైట్ల మధ్య యుద్ధం జరుగుతోంది తప్ప, ప్రశాంతమైన ప్రయాణం సాగడం లేదు.
ఎవరు ఎక్కువ ఇబ్బంది పడుతున్నారు?
ద్విచక్ర వాహనదారులు…: హెల్మెట్ గ్లాసుపై చిన్న గీతలు ఉన్నా, ఎదురుగా వచ్చే కార్ల LED వెలుగు పడగానే అది వెయ్యి ముక్కలై కాంతిని విరజిమ్ముతుంది. దాంతో దారి అస్సలు కనిపించదు.
వృద్ధులు & కళ్లజోడు వాడేవారు…: కంటి చూపు కొద్దిగా మందగించిన వారికి, క్యాటరాక్ట్ సమస్యలు ఉన్నవారికి ఈ అధిక తీవ్రత గల తెల్లటి కాంతి భరించలేని నరకాన్ని చూపిస్తోంది…
పరిష్కారం ఎక్కడ ఉంది?
కార్ల కంపెనీలపై నియంత్రణ…: ఆటోమొబైల్ సంస్థలు కేవలం ‘లుక్స్’ కోసం కాకుండా, రోడ్డు భద్రతను దృష్టిలో ఉంచుకుని కాంతి తీవ్రతను (Lumens) నియంత్రించేలా ప్రభుత్వం నిబంధనలు తీసుకురావాలి. ఇండియాకు సరిపోయే ‘వార్మ్ వైట్’ లేదా నియంత్రిత కాంతి నియమాలను కంపెనీలు పాటించేలా చేయాలి.
RTO తనిఖీలు…: నిబంధనలకు విరుద్ధంగా మార్కెట్ లో దొరికే చైనా మేడ్ అత్యంత శక్తివంతమైన LED బల్బులను అమర్చుకునే వారిపై భారీ జరిమానాలు విధించాలి.
హై-బీమ్ వాడకం తగ్గించాలి…: నగరాలు, గ్రామాల లోపల కేవలం ‘డిమ్మర్’ (Low Beam) మాత్రమే వాడాలనే అవగాహన డ్రైవర్లలో కలగాలి.
చివరి మాట: సాంకేతికత అనేది ప్రయాణాన్ని సుఖవంతం చేయాలి కానీ, పక్కవాడి ప్రాణాల మీదకు తీసుకురాకూడదు. కార్ల కంపెనీలు ఫీచర్ల పేరిట ఇస్తున్న ఈ “కళ్లు పొడిచే కాంతి”పై రవాణా శాఖ తక్షణమే స్పందించి, పాత నియంత్రణలను లేదా సరికొత్త నిబంధనలను అమల్లోకి తెస్తుందని ఆశిద్దాం!
Share this Article