మందే ఒక ముందొచ్చిన, ముద్దొచ్చే ముహూర్త సందర్భం… ఇది మందు భాష…

అయినా…మందు భాషకు ఏ సాధారణ వ్యాకరణ సూత్రాలు; భాషా నియమాలు; ఉచ్చారణ సంప్రదాయాలు, భాషోత్పత్తి నిర్ణయాలు; వ్యవహార సిద్ధాంతాలు పనిచేయవు.

లక్ష రూపాయల నగదు చేయలేని పనిని వెయ్యి రూపాయల బాటిల్ చేయగలదు అన్నది అనుభవజ్ఞుల మందు నీతి.

ఆనందానికి- మందు.
విషాదానికి- మందు.
పెళ్లికి- మందు.
చావుకు- మందు.
కలయికకు- మందు.
వీడ్కోలుకు- మందు.
ఉబుసుపోకకు- మందు.
ఊరికే- మందు.
డబ్బుకు- మందు.
మందుకు- మందు.
ముందుకు- మందు.
వెనుకకు- మందు.
పక్కకు- మందు.
పైకి కైపెక్కడానికి- మందు.
పైకి పోవడానికి- మందు.
కింద పడ్డానికి- మందు.
లేవలేక- మందు.
ఏడవలేక- మందు.
ఏడుస్తూ- మందు.
మర్యాదకు- మందు.
అమర్యాద- మందు.
ఆతిథ్యానికి- మందు.

ఎంత రాతి గుండెలయినా బాటిల్ ను చూడగానే కరిగి చుక్కలు చుక్కలు కావాల్సిందే.

బయట వ్యవహారంలో ఒకరినొకరు కొట్టుకుంటే…ఫలానా ఆయన ఫలానా ఆయన్ను కొట్టాడు అంటారు. “వారు మందు కొట్టారు” అని మద్యం తాగడానికి మాత్రమే వాడే ఒక భాషా నియమం ఎలా పుట్టిందో నాకు అంతుబట్టడం లేదు. నేను మందు కొట్టకపోయినా… కొన్ని వేల మందు కొట్టుడు పార్టీల్లో చూశాను కాబట్టి…బహుశా మద్యం తాగడానికి ముందు మందు బాటిల్ ను చేత్తో తడతారు లేదా కొడతారు…అందువల్ల ఆ కొట్టడం కాస్త “మందు కొట్టడం” అయి ఉండాలని నా ఊహ. లేదా…మెడిసిన్ మందు, మద్యం మందు మధ్య తేడా తెలియాలని ఏ పుణ్యపురుషులో “మందు కొట్టడం” అన్న మాటను కనుక్కుని పుణ్యం కట్టుకుని ఉండాలి. అందువల్ల మనం ఆసుపత్రి మందులు వేసుకుంటామే కానీ…కొట్టం. లిక్కర్ మందు కొట్టాక…ఆసుపత్రి మందు కొట్టకపోయినా…వేసుకో! అని లోపల లివర్ పిలుస్తూనే ఉంటుంది. అది వేరే విషయం!

తెలంగాణ భద్రాద్రి కొత్తగూడెం జిల్లా గానుగపాడులో దండోరా వేశారు. దాని సారాంశం ఏమిటంటే-
” మా బెల్ట్ షాపులోనే ఊరి జనం మద్యం కొనుక్కుని తాగాలి. ఫలానా బెల్ట్ షాపులో కొనుక్కుని, మందు కొట్టినట్లు తెలిస్తే…అయిదు వేల రూపాయలు జరిమానా విధిస్తాం. ఖబడ్దార్“

అని అంతకు ముందు వీరు కూడా చాటింపు వేశారట!

ఆహా!
…ఇది వింటుంటే గొంతులో చిల్డ్ బీర్ చల్లగా, మెల్లగా చుక్క చుక్క దిగుతున్నట్లు ఎంత హాయిగా ఉందో కదా?
రెడ్ వైన్ మెల్లగా మత్తు ఎక్కిస్తున్నట్లు కిక్కుగా ఉంది కదా?
ఓల్డ్ మాంక్ న్యూ ఫిలాసఫీ చెబుతున్నట్లు వీనులవిందుగా ఉంది కదా?
డైరెక్టర్స్ స్పెషల్ త్రీ డి దృశ్యం కనిపిస్తోంది కదా?
బ్యాగ్ పైపర్స్ కోటి గొట్టాలు ఒకేసారి గుండెలో మోగినట్లు చెవులకు ఇంపుగా ఉంది కదా?
ప్రజాస్వామ్య దేశంలో అత్యంత పారదర్శకతకు వేసిన బ్లాక్ లేబుల్ లా ఉంది కదా?

శ్రీశ్రీ అన్నాడు-
“శేషేన్‌ శేషేన్‌!
నీ పొయెమ్సు చూసేన్‌
అవి బహు పసందు చేసేన్‌
అది పద్యమా!
ఫ్రెంచి మద్యమా!”

“గానుగపాడు మద్యమా!
అది ఫ్రెంచి పద్యమా?”

-పమిడికాల్వ మధుసూదన్
madhupamidikalva@gmail.com