తెలుగు బుల్లితెర సూపర్ స్టార్ ఎవరు..? చెప్పడానికి వేరే ఆప్షనే లేదు…! సుడిగాలి సుధీర్..!! కాస్త సమీపంలో ప్రదీప్ కనిపిస్తాడు కానీ… ప్రదీప్ బేసిక్‌గా యాంకర్… కామెడీ టైమింగు, సున్నితంగా డీల్ చేయడం గట్రా బాగుంటుంది, కానీ అంతకుమించి పోలేడు… కానీ సుధీర్… రియల్ పర్‌ఫార్మర్..! యాంకరింగు, డాన్సులు, కామెడీ, మ్యాజిక్, సింగింగ్, స్టంట్స్… వాట్ నాట్… ఏదంటే అది చేయగలడు… తెలుగు టీవీకి రజినీకాంత్ తను…! మరి అలాంటి వాడిని ఈటీవీ ఎందుకు దూరం పెట్టింది…? కాస్త వివరంగా చెప్పుకుందాం…
మూడునాలుగు రోజులుగా నడుస్తోంది ఈ చర్చ… కావాలనే రోజా తనను పక్కకు పెట్టేసింది… కాదు, కాదు, మల్లెమాల టీంతోనే ఏదో గొడవ అయ్యిందట… ఇక ఈటీవీకి సుధీర్‌కు కనెక్షన్లు కట్టయినట్టే… ఇలాంటి వ్యాఖ్యలు ఎన్నో వినిపిస్తున్నాయి… అబ్బే, సుధీరే మెల్లిగా ఈటీవీకి దూరం జరిగాడు అనేవాళ్లూ కనిపిస్తున్నారు… ఒక్కసారి సుధీర్ తత్వం చూద్దాం…
Ads
తను ఆకలితో తిరిగిన రోజుల్లో చిన్నాచితకా పేమెంట్లకు ఇదే ఈటీవీలో, ఫిలిమ్ సిటీలో మ్యాజిక్ షోలు చేశాడు… ఎప్పుడూ ఈటీవీ నుంచి బయటికి రావడానికి ప్రయత్నించలేదు… చివరకు నాగబాబు, పాత జబర్దస్త్ డైరెక్టర్లు టెంప్ట్ చేసినా తిరస్కరించాడు… తను స్నేహశీలి… కొన్నేళ్లు గెటప్ సీను, ఆటో రాంప్రసాద్‌తో కలిసి చేసే స్కిట్లే దానికి ఉదాహరణ… ముగ్గురూ ఏదో సినిమా కూడా చేశారు… రష్మితో ఏడెనిమిదేళ్లుగా దోస్తీ… హైపర్ ఆది, విష్ణు, ప్రదీప్… దాదాపు అందరూ ప్రేమిస్తారు తనను…
ఈటీవీలో పోవేపోరా, ఢీ, జబర్దస్త్ చేస్తుంటాడు… అడపాదడపా సినిమాల్లో ఒకటీఅరా పాత్రలు వేసినా సరే… ఈటీవీని మాత్రం వదులుకోడు… దాంతో ఉన్న రిలేషన్ ఒక కారణమైతే.., ఈటీవీ పాడిబర్రె వంటిది, నెలనెలా నమ్మకమైన పేమెంట్ ఉంటుంది… వేరే ఏ టీవీలోనూ సుధీర్ కనిపించడు, వెళ్లడు… అటూఇటూ అనే డ్రామాలు కూడా ఉండవ్… అసలు ఈటీవీలో కూడా ఏదైనా ప్రత్యేక ప్రోగ్రామ్ ప్లాన్ చేశారంటే సుధీర్ ఉండాల్సిందే… మరి ఈ స్థితిలో సుధీర్ను ఎందుకు పక్కన పెట్టారు..?
డీజే అని ఇయర్ ఎండ్ స్పెషల్‌లో సుధీర్ ఉన్నాడు… తన రష్మితో ‘నవ్వింది మల్లెచెండు’ అనే పాటను ఇరగదీశాడు… ఏదో స్కిట్ చేశాడు… కానీ వచ్చే సంక్రాంతికి ప్లాన్ చేసిన ‘అత్తో అత్తమ్మ కూతురో’ అనే ప్రోగ్రాంలో మాత్రం సుధీర్ లేడు… ఆ ముగ్గురు దోస్తులనూ విడదీశారు… ఆటో రాంప్రసాద్ రోహిణితో జతకట్టాడు… హైపర్ ఆది, వర్షిణి సరేసరి… కొత్తగా ఇమాన్యుయెల్, వర్ష లవ్ ట్రాకు ఒకటి స్టార్టయింది కదా, వాళ్లూ ఉన్నారు… బట్, సుధీర్- రష్మి లేకుండా షో ఏమిటి..?
రోజా మోనార్క్… గతంలోలాగా ఒకరినో ఇద్దరినో గెస్టుల్ని తెచ్చి పక్కన పెట్టుకోలేదు… తనొక్కతే… మొన్న ఏదో సందర్భంలో తను లేకపోతే నటి సంగీతను తీసుకొచ్చి నడిపించారు ఒక షో… ఇక ఇప్పుడు తను, తన కమెడియన్లు… అంతే… ఆ భారీ కాయంతో పాపం స్టెప్పులు వేస్తూ అలిసిపోతూ పాట్లు పడిందే తప్ప ఇంకెవరినీ ఎంటర్‌టెయిన్ చేయలేదు… ప్రదీప్, పూర్ణ కూడా కనిపించారు… కానీ సుధీర్ లేడు… ఎందుకు..? తనను కావాలనే అవాయిడ్ చేశారు…
కావాలని అవాయిడ్ చేశారనేది నిజం… దానికి మల్లెమాల టీం కారణమా..? రోజా కారణమా..? పక్కనపెట్టండి… ఈటీవీ ప్రేక్షకులు, సుధీర్ ఫ్యాన్స్ ఊహించలేని పరిణామం ఇది… ఐనా సరే ఎక్కడా సుధీర్ నోరుజారి ఎవరినీ నిందించలేదు… తనను పక్కన పెట్టారు సరే, అందరికీ ఏం చెప్పారు..? ‘‘ప్రతి షోలో సుధీర్ పాపులర్ అవుతున్నాడు, సెంటర్ ఆఫ్ అట్రాక్షన్ అవుతున్నాడు, తనే హైలైట్ అవుతున్నాడు… అందుకని బ్రేక్ ఇస్తున్నాం…’’ అనే సాకు చెబుతున్నారు… ఇది మరీ దరిద్రం… ఇదీ నిజంగా సుధీర్ను అవమానించడం… ఐనా సరే.., రాంగ్ మెసేజ్ పోవద్దనే భావనతో ‘సంక్రాంతి స్పెషల్’ షూటింగ్ జరుగుతున్న చోటికి కూడా వచ్చాడు తను… కడుపు రగిలిపోయి ఉంటుంది ఫాఫం...
ప్రదీప్ మరీ లౌక్యం… అనసూయ మరీ ఎక్కువ… కానీ అనుకోకుండా రోహిణితో రాంప్రసాద్, ఏదో రైతు విషాద స్కిట్‌లో గెటప్ సీను… ఒంటరిగా రష్మి… ప్రొమో చూస్తుంటేనే విచిత్రంగా ఉంది…
ఎవడైనా సరే, ఒక హీరోయిక్ పర్సనాలిటీని వాడుకోవాలని చూస్తారు తప్ప… పాపులర్ అవుతున్నాడని పక్కన పెడతారా..? తనేమైనా మల్లెమాల సంస్థలో జీతగాడా..? తను పాపులర్ కావాలని కోరుకుంటే తప్పేమిటి..? పాపులర్ అయితే తప్పేమిటి..? పోనీ, తన పక్కన వెలవెలపోతున్నామని మిగతా యాక్టర్లు ఫిర్యాదులు చేశారా..? లేదు కదా… తను అందరితోనూ బాగానే ఉంటాడు కదా… సరే, ఈ దిక్కుమాలిన సమర్థన ఏదో ఏడుస్తున్నారు… మరి జబర్దస్త్, ఢీ నుంచి కూడా తీసేయండి… సుధీర్ బతకలేకపోడు కదా… పోనీ, సుధీర్‌లో పొగరు పెరిగింది, తలెగరేస్తున్నాడు, బాగా నెత్తికి ఎక్కిపోయింది అనుకుందామా..? సుధీర్‌కు అది కూడా చేతకాదుగా… మరెందుకు సుధీర్ను అవమానిస్తున్నారు..?
అయ్యో, సుధీర్ను ఎవడూ తీసేయలేదురా బాబూ… ఇదుగో 8న ప్రసారం కాబోయే ఎక్సట్రా జబర్దస్త్ ప్రోమోలోని ఫోటో… ఆ ముగ్గురూ మళ్లీ కనిపిస్తున్నారా లేదా..? అనేది ఓ ఈటీవీ మిత్రుడి జవాబు… మరి సంక్రాంతి షోకు ఎందుకు కాకుండా పోయాడు..? అవునూ, ఈ ఎక్సట్రా జబర్దస్త్ షూటింగు, సంక్రాంతి షోకు ముందు జరిగిందా..? తరువాత జరిగిందా..? ఫాఫం, సుధీర్‌తో ఆడుకుంటున్నారు…!!
Share this Article