.
అఖిల్ అక్కినేని– జైనాబ్ రావ్జీ దంపతుల మధ్య వయసు తేడాపై సోషల్ మీడియాలో కొందరు ట్రోలింగ్ చేస్తున్నారు. అది మనం నిన్న చెప్పుకున్నాం, ఆమె ఎవరో కూడా ముచ్చటించాం… అయితే అదే సోషల్ మీడియాలో బాలీవుడ్ సెలబ్రిటీల విషయానికి వస్తే మాత్రం ఇదే అంశాన్ని చాలామంది పెద్దగా పట్టించుకోరు. అసలు ప్రేమకు, పెళ్లికి వయసు అడ్డుకాదని చెప్పుకునే వారు కూడా సందర్భానుసారం డబుల్ స్టాండర్డ్స్ చూపిస్తుంటారనే చర్చ ఇప్పుడు నడుస్తోంది.
దీనికి బాలీవుడ్లోనే ఎన్నో ఉదాహరణలు ఉన్నాయి. ముఖ్యంగా మలైకా అరోరా, సుస్మిత సేన్ వ్యక్తిగత జీవితాలు తరచూ వార్తల్లో నిలుస్తుంటాయి. వీరిద్దరూ తమకంటే చాలా చిన్న వయసు ఉన్న వ్యక్తులతో రిలేషన్షిప్లో ఉన్న సందర్భాలు ఉన్నాయి.
Ads
52 ఏళ్ల మలైకా అరోరా గతంలో సల్మాన్ ఖాన్ సోదరుడు అర్బాజ్ ఖాన్ను వివాహం చేసుకుంది. వారికి అర్హాన్ అనే కుమారుడు ఉన్నాడు. 2017లో ఇద్దరూ విడాకులు తీసుకున్నారు. ఆ తర్వాత మలైకా, నటుడు అర్జున్ కపూర్తో ప్రేమలో పడింది. ఇద్దరి మధ్య దాదాపు 12 ఏళ్ల వయసు తేడా ఉండటం అప్పట్లో పెద్ద చర్చగా మారింది. కొన్ని సంవత్సరాల పాటు కలిసి కనిపించిన ఈ జంట 2024లో విడిపోయినట్లు వార్తలు వచ్చాయి.
ఇప్పుడు మలైకా పేరు మరోసారి వార్తల్లోకి వచ్చింది. ముంబైకి చెందిన ప్రముఖ వజ్రాల వ్యాపార కుటుంబానికి చెందిన హర్ష్ మెహతాతో ఆమె డేటింగ్ చేస్తున్నట్లు బాలీవుడ్ మీడియాలో ప్రచారం జరుగుతోంది. హర్ష్ వయసు 33 సంవత్సరాలు కాగా, మలైకా వయసు 52. అంటే ఇద్దరి మధ్య దాదాపు 19 ఏళ్ల తేడా ఉంది. ఇటీవల విమానాశ్రయాల్లో, ప్రైవేట్ పార్టీల్లో ఇద్దరూ కలిసి కనిపించడం, తాజాగా బాంద్రాలో జరిగిన ఓ ప్రైవేట్ ఈవెంట్కు ఇద్దరూ హాజరవడం ఈ డేటింగ్ రూమర్లకు మరింత ఊతమిచ్చింది. అయితే ఈ వార్తలను మలైకా గానీ, హర్ష్ గానీ అధికారికంగా ధృవీకరించలేదు. ఏజ్దేముందిరా, వాడు వజ్రాల వ్యాపారి, అది చాలదా…
మరోవైపు మాజీ విశ్వసుందరి సుస్మిత సేన్ కూడా తనకంటే చిన్న వయసు ఉన్న వ్యక్తులతో రిలేషన్షిప్ల కారణంగా ఎన్నోసార్లు వార్తల్లో నిలిచింది. ముఖ్యంగా మోడల్ రోహ్మన్ షాల్తో ఆమె ప్రేమ వ్యవహారం అప్పట్లో బాగా చర్చనీయాంశమైంది. ఇద్దరి మధ్య సుమారు 15 ఏళ్ల వయసు తేడా ఉంది. విడిపోయినట్లు ప్రకటించిన తర్వాత కూడా వీరిద్దరూ స్నేహితులుగా కలిసి కనిపిస్తూనే ఉన్నారు.
ఇక్కడ ప్రశ్న ఒక్కటే. ప్రేమ, పెళ్లి అనేవి వ్యక్తిగత నిర్ణయాలైతే… బాలీవుడ్ సెలబ్రిటీల విషయంలో “వయసు అనేది కేవలం సంఖ్య మాత్రమే” అని చెప్పే నెటిజన్లు, అదే ప్రమాణాన్ని టాలీవుడ్ సెలబ్రిటీలకు ఎందుకు వర్తింపజేయడం లేదనే చర్చ వినిపిస్తోంది.
ఎవరినైనా అభిమానించడం, విమర్శించడం వ్యక్తిగత అభిప్రాయం కావచ్చు. కానీ ఒకే అంశంపై వ్యక్తిని బట్టి ఒక రకమైన తీర్పు, మరొకరికి మరో రకమైన తీర్పు ఇవ్వడం మాత్రం సోషల్ మీడియా డబుల్ స్టాండర్డ్గా కనిపిస్తోందని పలువురు అభిప్రాయపడుతున్నారు. వయసు తేడాను మాత్రమే ఆధారంగా చేసుకుని ట్రోలింగ్ చేయడం ఎంతవరకు సమంజసం అన్న ప్రశ్న కూడా ఈ సందర్భంగా ముందుకొస్తోంది.
ప్రేమ, వివాహంలో వయసు తేడా అనేది కొత్త విషయం కాదు. చరిత్రలో, పురాణాల్లో కూడా ఇలాంటి చర్చలు ఉన్నాయి. కొందరు పరిశోధకులు, వ్యాఖ్యాతలు “సీతాదేవి శ్రీరాముడి కంటే పెద్దది” అనే వాదనను కూడా వినిపిస్తుంటారు. అది అందరూ అంగీకరించిన నిర్ధారిత విషయం కాకపోయినా, ప్రేమకు వయసు అడ్డుకాదనే చర్చల్లో తరచూ ప్రస్తావనకు వస్తుంది. అందుకే ఈ రోజుల్లో ఇద్దరూ మేజర్లై, పరస్పర అంగీకారంతో బంధాన్ని కొనసాగిస్తున్నప్పుడు కేవలం వయసు తేడా ఆధారంగా మాత్రమే ట్రోలింగ్ చేయడం ఎంతవరకు సమంజసం అనే ప్రశ్న కూడా వినిపిస్తోంది.
Share this Article