.
. ( దోగిపర్తి సుబ్రహ్మణ్యం ) .. ….. కృష్ణ-కె యస్ ఆర్ దాస్ కాంబినేషన్లో వచ్చిన సినిమా . 1980 ఏప్రిల్లో విడుదలయిన ఈ మామా అల్లుళ్ళ సవాల్ సూపర్ హిట్ సినిమా . 12 కేంద్రాలలో వంద రోజులు ఆడింది . లాగించిన సినిమా కాదు ; ఆడిన సినిమా …
ముందుగా మెచ్చుకోవలసింది కధను , స్క్రీన్ ప్లేని తయారుచేసిన యం డి సుందరాన్ని … ఇద్దరు ప్రాణ స్నేహితులు . ఒకరు ధనవంతుడు , మరొకరు పేదవాడు . కాలేజీలో క్లాస్ మేట్స్ చేసిన ఓ కామెంటుతో పేద స్నేహితుడు ధనవంతుడైన స్నేహితుడిని వదిలి వెళ్ళిపోతాడు .
తర్వాత కాలంలో ధనవంతుడు లాయర్ అవుతాడు . బావ కూతురిని పెళ్ళి చేసుకుంటాడు . పేద స్నేహితుడు చనిపోతాడు . అతని తమ్ముడికి ఉద్యోగం ఇప్పిస్తాడు . అతను ఒక హత్య కేసులో ఇరికించబడతాడు . అతన్ని కాపాడుతానికి లాయర్ హీరో నడుం బిగిస్తాడు .
Ads
ఆ కేసుని హేండిల్ చేసేది హీరో బావ కం మామ పోలీసు ఆఫీసర్ సత్యనారాయణ . ఇద్దరూ పంతంగా తీసుకొని సవాళ్లు విసురుకుంటారు . చివరకు హీరో లాయర్ తన మిత్రుడి తమ్ముడిని కాపాడటంతో సినిమా ముగుస్తుంది .
రొటీన్ కధగా కాకుండా డిఫరెంట్ కధ . అందుకు తగ్గట్లుగా జంధ్యాల సంభాషణలు . ముఖ్యంగా మామా అల్లుళ్ళ మధ్య సవాళ్ళ డైలాగులు బాణాల్లాగా ఉంటాయి . వాళ్ళిద్దరివే కాదు , అందరి డైలాగులు చాలా పదునుగా ఉంటాయి . డైలాగులు సినిమాలో డ్రామాని బాగా మెయింటైన్ చేస్తాయి .
వీటికి తోడు చక్రవర్తి సంగీత దర్శకత్వంలో పాటలు . సినిమా ప్రారంభమే వేటూరి వ్రాసిన ఒక మంచి పాటతో ప్రారంభమవుతుంది . స్నేహితులు కృష్ణ , రంగనాధులు మోటార్ సైకిళ్ళ మీద షికారు కొడుతూ పాడే పాట . ఒక నాటిది కాదు వసంతం విడిపోనిది మా అనుబంధం పాట . బాలసుబ్రమణ్యం , ఆనందులు పాడారు . శ్రీదేవి బ్రాండ్ మార్క్ వానపాట కూడా ఉందండోయ్ . దీన్నీ వేటూరయ్య గారే వ్రాసారు . చిటుక్కు చిటుక్కు చిలికింది వాన .
వీటూరి వ్రాసిన బర్త్ డే పాట . చాలా శ్రావ్యంగా ఉంటుంది . మంచితనానికి మాయని మమతకు పుట్టినరోజు ఇది . అలాగే ఆయనే వ్రాసిన మరో పాట శ్రీదేవి వంటి చిట్టితల్లికి సీమంతం చేయరండి అని శ్రీదేవి మీదే ఉంటుంది . చాలా బాగుంటుంది . వీటూరిదే మరో పాట చక్కనమ్మ వచ్చింది ఒక్క నవ్వు నవ్వింది . బాగుంటుంది .
ఈ సినిమాలో రమాప్రభకు కృష్ణుడినే పెళ్లి చేసుకోవాలి అనుకునే పిచ్చి . ఆమెకు , తండ్రి అల్లుకు ఓ పాట ఉంది . సరదాగా సాగుతుంది . చక్కనైన మా కృష్ణయ్యని ఎక్కడైనా చూసారా అనే పాట . ఓ మండపేట మైనరు హేయ్ పిండి మిల్లు ఓనరూ జయమాలిని పాట ఇరగ ఉంటుంది . 1980 లో జయమాలిని కాస్త ఒళ్ళు చేసినట్లుగా ఉంటుంది . అయినా డాన్సు స్పీడులో ఏం తేడా ఉండదు .
30+ సినిమాలు కలిసి పనిచేసారు కృష్ణ- కె యస్ ఆర్ దాసులు . ఆల్మోస్ట్ అన్నీ సక్సెస్సే . ఈ సినిమా క్లైమాక్స్ దాస్ మార్కులోనే ఉంటుంది . ఈ సినిమా విజయానికి ఆయన దర్శకత్వం కూడా ముఖ్య కారణమే .
ఏక్షన్+సెంటిమెంట్+ఎమోషన్+డ్రామా . వెరశి ఈ సినిమా . అతిలోకసుందరి శ్రీదేవి గ్లామర్ ఉండనే ఉంది . ప్రత్యేకంగా అభినందించాల్సింది హీరో కృష్ణని . చాలా బాగా నటించారు .
ఇతర నటీనటులు అందరూ కూడా ఎవరికి వారు బాగా నటించారు . సత్యనారాయణ , జమున , నిర్మలమ్మలను ముందుగా చెప్పుకోవాలి . ఎమోషనల్ సీన్లను చాలా బాగా పండించారు .రంగనాధ్ , చంద్రమోహన్ , అల్లు , సారధి , ప్రభాకరరెడ్డి , సిలోన్ మనోహర్ , జమున , రమాప్రభ , అత్తిలి లక్ష్మి ప్రభృతులు నటించారు .
కృష్ణ , శ్రీదేవి , సత్యనారాయణ అభిమానులు ఇంతకుముందు చూసి ఉండకపోతే తప్పక చూడండి . యూట్యూబులో ఉంది . A watchable , emotion-filled sentimental , feel good , entertaining movie .
#తెలుగుసినిమాలసింహావలోకనం #తెలుగుసినిమాలు
Share this Article