మంచు లక్ష్మి..! వచ్చింది, తనూ ఓ పార్టిసిపెంటు… అంతే, వెళ్లిపోయింది..!!‌

జీవాడు కాస్త ముందుగానే కూస్తున్నాడు ఈమధ్య… పండుగకన్నా రెండురోజుల ముందే ‘ఉమ్మడి కుటుంబంతో కమ్మటి భోజనం’ అని ఓ ఉగాది స్పెషల్ ప్రసారం చేసేశాడు… ఫాఫం, పండుగ రోజు ప్రసారం చేస్తే ఈటీవీ, మాటీవీ వాళ్ల పండుగ స్పెషల్స్‌తో పోటీపడాలి… రేటింగులు దొబ్బే ప్రమాదం ఉంది… దాంతో నాలుగు గంటల కమర్షియల్ కమ్ ఫెస్టివల్ స్పెషల్ షోను నిన్న ఉదయం కుమ్మేశాడు… అయిపోయింది… ఎటొచ్చీ అది చూస్తున్నంతసేపూ ఓ విశేషం కాస్త అబ్బురంగా అనిపించింది… మంచు లక్ష్మి… అవును, ఈ షోకు తన కూతురితోపాటు వచ్చింది… అందులో విశేషం ఏముంది అంటారా..? ఉంది…

ఈ షోలో వరలక్ష్మి శరత్ కుమార్ కనిపించింది కాసేపు… అంజలి ఉంది… ఇద్దరూ కలిసి చిన్న పర్‌ఫామెన్స్ ఏదో చేశారు పచ్చడి గురించి… ఇలాంటి పండుగ స్పెషల్ షోలు అంటేనే ఇవి కదా… చిన్న చిన్న సరదా అంశాలన్నీ ఒకేచోట దండలా గుచ్చేసి ఎంజాయ్ చేయడం… సో, సేమ్, అలాగే విష్వక్సేన్, ఎప్పటిలాగే జానీ మాస్టర్… మరీ సహజంగానే సద్దాం అండ్ కో కామెడీ స్కిట్… చమ్మక్ చంద్ర స్కిట్… ఫార్టీ ఇయర్స్ ఇండస్ట్రీ పృథ్వి… వకీల్ సాబ్ హీరోయిన్ అనన్య… మొత్తానికి కలర్ ఫుల్… అన్నింటికీ మించి జీవాడి స్పెషల్ అనగానే నాగబాబు అండ్ నీహారిక వస్తారు కదా… వచ్చారు…

మొత్తం షోలో బాగా రక్తికట్టింది శేఖర్ మాస్టర్ బిడ్డ సాహితి చేసిన డాన్స్… లవ్ స్టోరీలో రీసెంట్ పాపులర్ సాంగ్ ఉందిగా, సాయిపల్లవి దుమ్మురేపిన సారంగదరియా పాట… దానికి సేమ్, అవే స్టెప్స్ వేస్తూ సాహితి మంచి ఈజ్‌ కనబరిచింది… ఆ స్టెప్స్ కంపోజ్ చేసింది శేఖర్ మాస్టరే… సరే, ఏదో నాలుగు గంటల పాటు ఏదో షో నడిపించారు వోకే… కానీ నాగబాబు, నీహారిక చీఫ్ గెస్టుల తరహాలో ఎప్పటిలాగే… సహజంగానే నాగబాబూ ఆహా, నీహారిక ఓహో అన్నట్టుగా కొంత అతి ఉంటుంది కదా… ఇప్పుడూ ఉంది… జీటీవీ వాడు మారడు కదా… పోనీలే, వాడి టీవీ వాడిష్టం అంటారా..? సరే… అయితే విశేషంగా అనిపించింది ఏమిటంటే..?

సాధారణంగా మంచు, మెగా క్యాంపుల నడుమ కాస్త హెల్దీ రిలేషన్స్ కనిపించవు కదా… అప్పుడెప్పుడో టాలీవుడ్ స్వర్ణోత్సవాలు- టైమ్ క్యాప్సూల్ ఎపిసోడ్ సందర్భంగా తలెత్తిన లెజెండ్, సెలెబ్రిటీ వివాదం గుర్తుంది కదా… ఈమధ్య అక్కడక్కడా మోహన్‌బాబు, చిరంజీవి నవ్వుకుంటూ, తుళ్లుకుంటూ కనిపించినా… ఎవరి రిజర్వేషన్స్ వాళ్లకుంటయ్… ఉన్నయ్… మామూలుగా నిర్మాత కమ్ హీరోయిన్ కమ్ టీవీ ప్రజెంటర్ కమ్ డాటరాఫ్ మోహన్‌బాబు ఎట్సెట్రా క్వాలిఫికేషన్స్ ఉన్న మంచు లక్ష్మి ఏదైనా షోకు వస్తే ఆమె డామినేషన్ కనిపిస్తూ ఉండేది… కానీ ఈ ఉగాది స్పెషల్ షోలో జస్ట్, తనూ అందరిలాగే ఓ చిన్న పార్టిసిపెంటుగా వచ్చింది… కూతురితో కలిసి ఓ చిన్న పర్‌ఫామెన్స్ ఇచ్చింది… (లక్ష్మి కూతురు ముద్దుముద్దుగా బాగా చేసింది)… ఒకవైపు షో అంతా నాగబాబు, నీహారికకు అంకితం అనే తరహాలో సాగుతున్నా సరే… లక్ష్మి ఏ రియాక్షనూ లేకుండా… హుందాగా తన పాత్ర ఏమిటో తను పోషించి వెళ్లిపోయింది… బాగుంది… పరిణతి కనిపించింది…!!