ఎవరయినా చూసారా ఈ సినిమాను !? NTR ఉన్నాడు కాబట్టి బహుశా ఓ అయిదారు వారాలు ఆడి ఉంటుంది . ఈ సినిమాకు కధ వ్రాసింది ఆరుద్ర . స్క్రీన్ ప్లే , దర్శకత్వం సి యస్ రావుది . కధ ఎక్కడకు పోతుందో , ఎందుకు తీసుకొని వెళుతున్నారో అర్థం కాదు . NTR , ANR వంటి మహానటులు కూడా మొహమాటం మీద కొన్ని సినిమాలను ఒప్పుకుంటారేమో అప్పుడప్పుడు .
NTR కు జోడీగా పద్మప్రియ నటించింది . మిగిలిన పాత్రల్లో కృష్ణంరాజు , రామకృష్ణ , ప్రభ , ప్రభాకరరెడ్డి , జి వరలక్ష్మి , నాగభూషణం , అల్లు రామలింగయ్య , శరత్ బాబు , జయమాలిని , సత్యనారాయణ ప్రభృతులు నటించారు . ఈ సినిమాలో జయమాలిని పాత్ర కేవలం ఐటెం డాన్సరుగా కాకుండా , చాలాసేపు ఉండే పాత్ర . అందంగా కూడా కనిపిస్తుంది . ఆంధ్రా హేమమాలిని పద్మప్రియ అందంగానే కనిపిస్తుంది కానీ డైలాగ్స్ డెలివరీ ఘోరం . స్వంత వాయిసో లేక డబ్బింగ్ వాయిసో తెలియదు .
యస్ రాజేశ్వరరావు సంగీత దర్శకత్వంలో కొన్ని పాటలు చాలా శ్రావ్యంగా ఉంటాయి . జయ జయ రామ హరే పాట చాలా బాగుంటుంది . కళ్ళతో రాసిందే కవిత పాట కూడా చాలా శ్రావ్యంగా ఉంటుంది . మిగిలిన పాటలు విరిసిన ఊహల పందిరిలో , చెక్కిలి నవ్వింది ఎంచక్కగ నవ్వింది శ్రావ్యంగానే ఉంటాయి . యల్ ఆర్ ఈశ్వరి పాడే పాట విప్పే మొనగాడు పాట జయమాలిని మీద . జయమాలిని డాన్స్ పాట ఎలా ఉండాలో అలాగే ఉంటుంది . ఉండాలి కదా !
Ads
సినిమా యూట్యూబులో ఉంది . NTR అభిమానులు చూడాలనుకుంటే చూడవచ్చు . అలాగే పద్మప్రియ అభిమానులు కూడా . ఈ సినిమా ఎందుకు బాగా తీయలేదో అధ్యనం చేయాలనే ఆసక్తి కలవారు కూడా చూడవచ్చు . కొత్తగా సినిమాలు తీద్దామనుకునే నిర్మాతలు తప్పక చూడాలి .
#తెలుగుసినిమాలసింహావలోకనం #తెలుగుసినిమాలు ( దోగిపర్తి సుబ్రహ్మణ్యం )
Share this Article