మంచి సందేశం ఒక్కటే సరిపోదు… అది ప్రేక్షకుల బుర్రల్లోకి ఎక్కించాలి…

ఈ ద్వయం సందేశాత్మక చిత్రాలను తీయాలనే అభిలాషతో చక్రవర్తి చిత్ర అనే సంస్థను నెలకొల్పి మొదటి ప్రయత్నంగా సుడిగుండాలు తీసారు . రెండవది ఈ మరో ప్రపంచం సినిమా . నక్సలైట్ల మరో ప్రపంచం లాగానే ఈ మరో ప్రపంచం కూడా ఓ ఊహాజనిత , అసాధ్య ప్రపంచమే . అలాంటి ప్రపంచం వస్తే , ఉంటే అద్భుతం . కానీ , సాధ్యమా !!!

మహాత్మాగాంధీ శత జయంతి ఉత్సవాలలో పెద్దపెద్దోళ్ళు ఆడుతున్న అబధ్ధాలకు విసుగెత్తిన కొందరు యువతీయువకులు దేశంలో పిల్లల్ని ఎత్తుకుపోయి కుళ్ళు , కుతంత్రం , కులం , మతం , ప్రాంతం వంటి సంకుచిత భావాలు లేని మరో ప్రపంచంలో పెంచుతారు . పిల్లల కిడ్నాపుల సంచలనం నేపధ్యంలో ప్రభుత్వం ఒక సి బి ఐ ఆఫీసర్ని నియమిస్తుంది . ఆ సి బి ఐ ఆఫీసర్ ఆ ప్రపంచాన్ని చూసి వారిలో ఒకరయిపోతారు . చివరకు కోర్టు , ప్రభుత్వం ఆ మరో ప్రపంచం సృష్టిని సమర్ధించలేవు .

ANR , గుమ్మడి , సావిత్రి , జమున , అనిత , విజయచందర్ సాక్షి రంగారావు , సూరేకాంతం , రాధాకుమారి , మీనాకుమారి , మాడా ప్రభృతులు నటించారు . ఆదుర్తి దర్శకత్వం వహించిన ఈ సినిమాకు సంగీత దర్శకుడు కె వి మహదేవన్ . రెండు పాటలే ఉన్నాయి . ఒకటి విజయచందర్ , అనితల మీద తీసిన బుర్ర కధ . మరొకటి మహాత్ముడే కలల గన్న మరో ప్రపంచం , గాంధీ మహాత్ముడే కలలు గన్న మరో ప్రపంచం పాట .

ఆరోజుల్లో కధలకు , సినిమాలకు , సందేశాలకు , స్ఫూర్తిని ఇచ్చేందుకు గాంధీ తత్వాన్నే ప్రస్తావించేవారు . గాంధీ బొమ్మ సినిమాలో కానీ , న్యూస్ రీల్సులో కానీ కనిపిస్తే ఈలలతో , చప్పట్లతో థియేటర్లు మారుమోగిపోయేవి . చాప కింద నీళ్ళలాగా గాడ్సే భక్తులు గాంధీ మీద , ఆయన తత్వం మీద అవాస్తవాలు , ద్వేషం , శీల హననం వండి వార్చి జనం బుర్రల్ని కలుషితం చేసారు . ఇదంతా మరో గోల . నేను వయసులో ఉన్నప్పుడు ఈ గాడ్సే సైన్యం దుర్మార్గం తెలిసి ఉంటే , ఓ పెద్ద ఉద్యమాన్నే నడిపి ఉండేవాడిని . ఇప్పుడు వయసూ లేదు , ఓపికా లేదు , డబ్బులూ లేవు . అయినా , చేస్తాను . చేస్తున్నాను .