జీవితంలో ఎవరి నుండయినా సహాయం పొందినా , వారి సాయంతో అభివృద్ధిలోకి వచ్చినా వారి సహాయాన్ని మరవకూడదు . ముఖ్యంగా ఆ సహాయం చేసినవారు దెబ్బతిని ఉంటే , అసలు మరవకూడదు . చేతనయినంత సహాయం చేయగలగాలి . అలా సహాయం చేసే మనస్తత్వం కలవాడు కృష్ణ అని అందరికీ తెలిసిందే .
తనను హీరోగా మొదటి పరిచయం చేసిన ఆదుర్తి సుబ్బారావు చేతులు కాల్చుకుని , మళ్ళా నిలదొక్కుకోవాలి అని ప్రయత్నం చేస్తున్న సమయంలో , కాల్ షీట్లు ఇచ్చి , కలర్ పిలిం ఇప్పించి , ఆర్థిక సహాయం చేసి కృష్ణ ఈ సినిమాలో నటించారు . ఇప్పటికీ ఇలాంటి మహానుభావులు మచ్చుకి అక్కడక్కడా ఉంటారు . వాళ్ళకు వంద దండాలు . మొహం తిప్పుకునే వారికి వెయ్యి దండాలు . ఆ చేతుల్నే నరికేసే వారికి కోటి దండాలు . ఇంక సినిమాలోకి వద్దాం .
1973 లో వచ్చిన ఈ మాయదారి మల్లిగాడు సినిమా బాగా ఉండటమే కాకుండా , ఓ సరికొత్త గెటప్పులో కనిపిస్తారు కృష్ణ . బొమ్మల లుంగీ , బనీను కనిపించే పల్చటి లాల్చీ , మెళ్ళో ఓ స్కార్ఫు అభిమానులకు బాగా నచ్చింది . కృష్ణకు జోడీగా మంజుల . బహుశా మెయిన్ హీరోయిన్ గా , కృష్ణ పక్కన హీరోయిన్ గా అమెకు ఇదే మొదటి సినిమా . ప్రధానంగా ఈ సినిమాలో చెప్పుకోవలసింది జయంతి . చక్కగా నటించింది . ఆవిడే షీరో . ఆ తర్వాత మెచ్చుకోవలసింది అంజలీదేవి నటన .
Ads
కె వి మహదేవన్ సంగీత దర్శకత్వం బ్రహ్మాండమైన హిట్ సాంగ్సుని ఇచ్చింది . నవ్వుతూ బతకాలిరా అనే పాట ఇప్పటికీ జనం నోట్లో నానుతూనే ఉంది . కొసరాజు వ్రాసారనుకుంటా . జైల్లో పాడే ఈ పాట బెంగళూరు సెంట్రల్ జైల్లో తీసినట్లుగా టైటిల్సులో పేర్కొన్నారు . ఆ తర్వాత అత్యంత శ్రావ్యమైన పాట ఆత్రేయ విరచిత మల్లె పందిరి నీడలోన జాబిల్లీ మంచమేసి ఉంచినాను జాబిల్లీ అనే పాట . తలకు నీళ్ళోసుకుని కురులారబెట్టుకుని , వస్తా వెళ్ళొస్తా పాటలు బాగుంటాయి .
నాగభూషణం , అంజలీదేవి , ప్రసన్నరాణి , పద్మనాభం , రాజబాబు , కాంతారావు , మాస్టర్ రాము , కె వి చలం ప్రభృతులు నటించారు . కమర్షియల్ గా కూడా సక్సస్ అయింది . నిర్మాతకు డబ్బులు కూడా వచ్చాయి . డైలాగ్ రైటర్ సత్యానంద్కూ ఇది తొలి సినిమా.
నేను ఈ సినిమాను మా నరసరావుపేటలో చూడలేదు . గుంటూరు విజయా టాకీసులో చూసా . ఈ థియేటర్ మా అక్కయ్య గారింటికి దగ్గరగా ఉండటం , థియేటర్ నిర్వహణ బాగా ఉండటం వలన ఈ థియేటర్లో చాలా సినిమాలే చూసా . ఈ థియేటర్లో పైన అటుఇటూ రెండు స్పెషల్ బాక్సులు ఉండేవి యంగ్ లవర్సుకి కన్వీనియంటుగా .
ఈమధ్యనే చూసా థియేటర్ పడేసారు . బహుశా ఏదయినా షాపింగ్ మాల్ వస్తుందేమో ! సినిమా యూట్యూబులో ఉంది . తప్పక చూడతగ్గ సినిమాయే . ముఖ్యంగా కృష్ణ అభిమానులకు బాగా నచ్చుతుంది . An entertaining , feel good , musical movie .
#తెలుగుసినిమాలసింహావలోకనం #తెలుగుసినిమాలు ……….. (By డోగిపర్తి సుబ్రహ్మణ్యం)
Share this Article