.
నమ్మశక్యం కాని రియల్ కథలు కొన్ని ఉంటాయి… ఇదీ అదే… ఇది సైన్స్, ఆధ్యాత్మికతల సరిహద్దుల్లో… సైన్స్ ప్రపంచాన్ని సైతం విస్మయానికి గురిచేసిన ఒక అద్భుతమైన నిజ జీవిత ఘటన ఆధారంగా రాసిన కథనం…
ఆమె పేరు ఆబ్రే స్కూన్మాకర్ (Aubrey Schoonmaker)… వయసు 34 ఏళ్లు… బ్రిటన్కు చెందిన ఈమె 2019 శీతాకాలంలో తన భర్తతో కలిసి స్పానిష్ పర్వతాల్లో ట్రెకింగ్కు వెళ్లారు… హఠాత్తుగా వచ్చిన మంచు తుఫానులో చిక్కుకుని, తీవ్రమైన చలికి (Hypothermia) గురై ఆమె అక్కడికక్కడే కుప్పకూలిపోయారు… భర్త సహాయం కోసం కేకలు వేసేలోపే ఆబ్రే శ్వాస ఆగిపోయింది… గుండె కొట్టుకోవడం ఆగిపోయింది…
Ads
సరిగ్గా అక్కడి నుంచే… సైన్స్ చరిత్రలోనే అత్యంత అరుదైన, దాదాపు అసాధ్యమైన ఒక ‘మృత్యుంజయ’ పోరాటం మొదలైంది…
ఆగిపోయిన కాలం… గడ్డకట్టిన శరీరం
రెస్క్యూ టీమ్ ఆమెను హెలికాప్టర్ ద్వారా బార్సిలోనాలోని హాస్పిటల్కు తరలించేసరికి ఆమె శరీరం మంచు ముక్కలా గడ్డకట్టిపోయింది… శరీర ఉష్ణోగ్రత సాధారణంగా ఉండాల్సిన 37∘ C నుండి ఏకంగా 18∘ C కి పడిపోయింది… వైద్యులు పరీక్షించి చూశారు:
నాడి (Pulse) లేదు.
శ్వాస (Respiration) లేదు.
గుండె చలనం లేదు.
మెదడు సంకేతాలు (Brain activity) శూన్యం.
సాధారణంగా గుండె ఆగిపోయిన 5 నుండి 10 నిమిషాల్లో మెదడు కణాలు చనిపోతాయి… కానీ ఆబ్రే విషయంలో గుండె ఆగి అప్పటికే గంటలు గడిచిపోయింది… సాంకేతికంగా ఆమె మరణించింది… కానీ, అక్కడున్న వైద్య బృందం ఆశ వదల్లేదు… చలి కాలమే ఆమె ప్రాణాన్ని తీసిందా? లేక ఆ చలిలోనే ఏదైనా రహస్యం దాగుందా? అనే కోణంలో సరికొత్త చికిత్సకు శ్రీకారం చుట్టారు…
6 గంటల సుదీర్ఘ మృత్యుపోరాటం
డాక్టర్ ఎడ్వర్డ్ అర్గుడో నేతృత్వంలోని వైద్య బృందం ఆమెను ECMO (Extracorporeal Membrane Oxygenation) యంత్రానికి అనుసంధానించారు… ఈ మిషన్ ఏం చేస్తుందంటే… శరీరం నుండి రక్తాన్ని బయటకు తీసి, దానికి ఆక్సిజన్ను అందించి, మళ్లీ వెచ్చగా చేసి శరీరంలోకి పంపుతుంది… (ఎస్పీ బాలు చికిత్స వార్తలు గుర్తున్నాయి కదా…)
వైద్యులు ఆమె రక్త ఉష్ణోగ్రతను నెమ్మదిగా పెంచడం ప్రారంభించారు… గంటలు గడుస్తున్నాయి… నిశ్శబ్దం అలుముకుంది… సరిగ్గా ఆమె గుండె ఆగిపోయిన 6 గంటల తర్వాత, శరీర ఉష్ణోగ్రత 30∘C కి చేరినప్పుడు… వైద్యులు ఆమె గుండెకు ఒక చిన్న ఎలక్ట్రిక్ షాక్ (Defibrillation) ఇచ్చారు…
ఆ మరుసటి క్షణం… హాస్పిటల్ గదిలోని మానిటర్ “బీప్… బీప్…” మంటూ మోగింది… ఆరు గంటల పాటు నిశ్చలంగా ఉన్న ఆ గుండె మళ్లీ కొట్టుకోవడం ప్రారంభించింది! ఆబ్రే మళ్లీ శ్వాస తీసుకున్నారు…
సైన్స్ తేల్చిన రహస్యం: ‘సస్పెండెడ్ యానిమేషన్’
ఆరు గంటల పాటు గుండె ఆగిపోయినా ఆమె మెదడు ఎలా దెబ్బతినలేదు? ప్రాణం ఎలా తిరిగి వచ్చింది? అనేదానికి సైంటిస్టులు ఒక ఆశ్చర్యకరమైన వివరణ ఇచ్చారు…
తీవ్రమైన చలి వల్ల ఆమె శరీరం, మెదడు కణాలు ఏకకాలంలో గడ్డకట్టుకుపోయాయి… దీనివల్ల మెదడుకు ఆక్సిజన్ అవసరం దాదాపు సున్నాకి పడిపోయింది… అంటే, ఆమె శరీరం ఒక రకమైన ‘సస్పెండెడ్ యానిమేషన్’ (తాత్కాలిక జీవన నిలిపివేత) స్థితికి చేరుకుంది… చలి ఆమెను మరణ అంచుల్లోకి నెట్టినా… అదే చలి ఆమె మెదడు పాడవకుండా కాపాడింది…
మరణం అంచున ఏం చూశారు?
కోమా నుంచి కోలుకున్న ఆబ్రేను శాస్త్రవేత్తలు, మీడియా ప్రతినిధులు ఒకే ప్రశ్న అడిగారు—”ఆ 6 గంటల పాటు మీరు ఎక్కడున్నారు? ఏం చూశారు?” ఆబ్రే కూడా ఒక వింతైన అనుభూతిని పంచుకున్నారు…
“నాకు నొప్పి తెలియలేదు… భయం అస్సలు లేదు… నల్లటి చీకటి ప్రపంచంలో నేను నిలబడి ఉన్నట్లు, కానీ నా చుట్టూ ఏదో ఒక వెచ్చదనం నన్ను ఆవరించి ఉన్నట్లు అనిపించింది… నేను చనిపోతున్నాననే స్పృహ లేదు, బతికున్నాననే ఆలోచనా లేదు… కేవలం ఒక శూన్యంలో తేలుతున్న అనుభూతి…”
ఈ రోజు ఆబ్రే ఎటువంటి శారీరక, మానసిక లోపాలు లేకుండా సంపూర్ణ ఆరోగ్యంతో జీవిస్తున్నారు…
ఈ కథనం కేవలం ఒక వైద్య అద్భుతం మాత్రమే కాదు… మరణం, స్పృహ (Consciousness) అనే అంశాలపై సైన్స్ ఇంకా తెలుసుకోవాల్సింది ఎంతో ఉందనే వాస్తవానికి నిదర్శనం… ఒక పక్క ఇంగ్రిడ్ హొంకల లాంటి శాస్త్రవేత్తలు చైతన్యపు లోతులను వివరిస్తుంటే, మరోపక్క ఆబ్రే లాంటి వారి ఘటనలు జీవన రహస్యాలను సరికొత్తగా నిర్వచిస్తున్నాయి…
- మరణం అనేది ఒక ముగింపు గీత కాదు… సైన్స్ ఇంకా ఛేదించాల్సిన ఒక అనంతమైన పజిల్…! దీనికన్నా… ఎవరో క్రియేట్ చేసిన మనిషి శరీరం, మెదడు తర్కానికి కూడా కొన్నిసార్లు అందని అద్భుతం కదా..!!
Share this Article