అసభ్య స్కిట్ల నడుమ… ఇకపై జబర్దస్త్‌ షోలో మసాలా డాన్సులు కూడా..!!

గత వారం హైదరాబాద్ బార్క్ రేటింగులు పరిశీలించినప్పుడు… ఈటీవీ జబర్దస్త్ షో రేటింగ్స్ 3.92 జీఆర్పీలు… ఎక్సట్రా జబర్దస్త్ రేటింగ్స్ 4.03… అసలు టాప్ 30 ప్రోగ్రామ్స్‌లో శ్రీదేవి డ్రామా కంపెనీ లేనే లేదు… డాన్స్ ప్రోగ్రాం ఢీ అయితే మరీ దారుణంగా 2.83… ఇక క్యాష్ షో 1.87… రియాలిటీ షోలన్నీ నేలచూపులు చూస్తుండటంతో ఈటీవీకి ఏం చేయాలో తోచడం లేదు… ఏదేదో చేసేస్తున్నారు…

పక్కా సినిమా ప్రమోషన్ల ప్రోగ్రాంగా మారిన సుమ షో క్యాష్‌ను రద్దు చేసిపారేశారు… ఆ స్థానంలో అదే సుమతో ‘సుమ అడ్డా’ అనే కొత్త షో స్టార్ట్ చేశారు… అదీ సేమ్, క్యాష్‌లాగే సుమ స్పాంటేనిటీ, హ్యూమర్ టైమింగు మీద ఆధారపడిన షో… కాస్త మసాలా కూడా కలుపుతున్నట్టున్నారు… డాన్స్ షో పరిస్థితి చూశారు కదా… అట్టర్ ఫ్లాప్ షో… డాన్సుల నడుమ జబర్దస్త్ తరహా కామెడీ తెలిసిందే కదా… దాన్ని మరింత పెంచేస్తున్నారు… అసలు డాన్సులకన్నా ఇదే ఎక్కువైపోతోంది… ఏమాటకామాట ఆహా ఓటీటీలో డాన్స్ షో బాగా ప్రజెంట్ చేశారు…

ఎక్సట్రా జబర్దస్త్ తాజా ప్రోమో చూస్తుంటే ఆశ్చర్యమేసింది… కామెడీ స్కిట్ల నడుమ హఠాత్తుగా తేజు డాన్స్… నేనో గ్లామర్ బండి, వచ్చేశా స్వర్గం నుండి అంటూ… శ్రీదేవి డ్రామా కంపెనీ పోకడను జబర్దస్త్‌లోకి తీసుకొచ్చారేమిటి..? బూతులు, అసభ్యత, అశ్లీలత అసలైన కేరక్టర్లుగా సాగే జబర్దస్త్ స్కిట్ల నడుమ ఇకపై ఈ మసాలా పాటలు కూడా చూడాలా..?

ఆలీతో సరదాగా షో అయిపోయింది… నిజానికి ప్రభుత్వ సలహాదారు అయినంతమాత్రాన టీవీ షో మానేయాల్సిన అవసరం లేదు… కానీ దానికీ రేటింగ్స్ పడిపోయాయి… మొనాటనీ వచ్చేసింది… దాంతో తాను గ్యాప్ తీసుకోవాలని అనుకుంటున్నట్టు చెప్పిన ఆలీ దానికి స్వస్తి చెప్పాడు… నిజానికి ఆలీతో సరదాగా చాట్ షో బాగానే ఉంటుంది… సుమ అడ్డా తరహాలోనే ఏదైనా కొత్త ఫార్మాట్ ఆలోచించి ఉండాల్సింది…

జబర్దస్త్ షోలో కొత్త యాంకర్ సౌమ్యారావు కుదురుకుంటోంది… సద్దాం, యాదమరాజు బ్యాచ్ వచ్చాక ఒకటీరెండు స్కిట్లు కాస్త నవ్విస్తున్నాయి… వాళ్లు మంచి టైమింగ్ ఉన్న కమెడియన్లే… ఎటొచ్చీ ఎక్సట్రా జబర్దస్త్‌లోనే ఈ డాన్సులు వంటి పిచ్చి ప్రయోగాలు మొదలుపెట్టినట్టున్నారు… ఈమధ్య శ్రీదేవి డ్రామా కంపెనీ కావచ్చు, ఎక్సట్రా జబర్దస్త్ కావచ్చు, స్పెషల్ షోలే కావచ్చు… పొట్టి నరేష్‌తోపాటు మరో ఇద్దరు కనిపిస్తున్నారు… వాళ్లు చెప్పేదేమిటో ఎవడికీ సరిగ్గా అర్థం కాదు… ఓవరాక్షన్… మరీ చికాకు పుట్టిస్తున్నారు… తాజా ప్రోమోలో ‘గాలి కొట్టడం’ బిట్ మరీ చిల్లరగా ఉంది…

నిజానికి జబర్దస్త్ లేదా ఎక్సట్రా జబర్దస్త్ షోలలో ఒకదాని ఫార్మాట్ మార్చి చూడాల్సింది… ఆహా ఓటీటీలో అనిల్ రావిపూడి, సుడిగాలి సుధీర్ డీల్ చేస్తున్న కామెడీ ఎక్స్‌చేంజ్ కొత్త ఫార్మాట్‌లో భిన్నంగా హాయిగా నవ్విస్తోంది… జబర్దస్త్ తాలూకు అసభ్య వాసనలు లేకుండా…!!