కథానాయిక మొల్ల అంతిమరోజులపై సినిమాలో కొంత క్రియేటివ్ లిబర్టీ…

బద్వేలు వద్ద ఉన్న గోపవరం గ్రామంలో జన్మించిన మొల్ల శ్రీకృష్ణదేవరాయలు , తెనాలి రామలింగడు సమకాలీనురాలుగా చెపుతారు . తెలుగు సినిమా జర్నలిస్ట్ ఇంటూరి వెంకటేశ్వరరావు గారు వ్రాసిన మొల్ల జీవిత చరిత్ర ఆధారంగా ఈ సినిమా తీయబడింది .

ఈ సినిమాలో వాణిశ్రీ తర్వాత మెచ్చుకోవలసింది దేవదాసి పాత్రలో గీతాంజలి . నటన , నృత్యం అన్నీ చాలా గొప్పగా ఉంటాయి . రామలింగడుగా పద్మనాభం , దేవుడిగా హరనాథ్ , శ్రీకృష్ణదేవరాయలుగా సత్యనారాయణ , మొల్ల తండ్రిగా గుమ్మడి చక్కగా నటించారు . విలన్ & కోగా నాగభూషణం , అల్లు రామలింగయ్య , మిక్కిలినేని , విలన్ నాగభూషణం భార్యగా హేమలత , రాజబాబు బాగా నటించారు .

యస్ పి కోదండపాణి సంగీత దర్శకత్వంలో పాటలు ఈనాటికీ పాపులరే . జగమే రామమయం మనసే అగణిత తారక నామ మయం , మనిషిని బ్రహ్మయ్య మట్టితో చేసెనయా పాటలు బాగా హిట్టయ్యాయి . మరో గొప్ప పాట , నృత్యం రాయల వారి సభలో జ్యోతిలక్ష్మి నృత్యం . అయిదు భాషల్లో పాట , ఆయా ప్రాంతాల నృత్య దుస్తుల్లో జ్యోతిలక్ష్మి నృత్యం తప్పక చూడవలసిన నృత్యం . అలాగే గీతాంజలి నృత్యం తనువూ నీదే మనసూ నీదే కూడా చాలా గొప్పగా ఉంటుంది .‌వాణిశ్రీ అమ్మనురా పెద్దమ్మనురా అంటూ జంతుబలిని నిరసిస్తూ పాడే పాట , దొరవో ఎవరివో నా కొరకే దిగిన దేవరవో పాట బాగుంటాయి .

1970 సంవత్సరరానికి బంగారు నంది అవార్డును పొందింది . వాణిశ్రీ ప్రస్థానంలో ఆమెకు పేరు తెచ్చిన సినిమాలలో ఒకటి ఈ చారిత్రక , ఆధ్యాత్మిక సినిమా . గోదా కల్యాణం , విష్ణువు నవ అవతారాల చిత్రరీకరణ , ప్రస్తావన , తదితర పద్యాలు తప్పక చూడవలసినవి . యూట్యూబులో ఉంది . తప్పక చూడండి . నేను మా నరసరావుపేటలోనే చూసా . టి విలో కూడా చూసా .

ఈ సినిమాలో మొల్ల శ్రీరాముడిలో ఐక్యం ఆయినట్లు చూపారు . ఆమె జీవిత చరిత్రలో శ్రీశైలంలో చివరి రోజులు గడిపిందని చెప్పబడింది . ఇవన్నీ ఎలా ఉన్నా రంగనాధ , భాస్కర రామాయణాల తర్వాత మొల్ల రామాయణం తెలుగు వారి సాహిత్య సంపద . మన సాహిత్య , ఆధ్యాత్మిక , సామాజిక సంపద గురించి , వారసత్వం గురించి తెలుసుకోవటానికి ఈ తరం వారు తప్పక చూడాలి .