.
నాగదుర్గ… ఖచ్చితంగా తెలుగు యూట్యూబ్ సూపర్ స్టార్… ఆమె పాట అంటే మినిమం మిలియన్ల వ్యూస్… ఆమె నాట్యంలో ఆ ఈజ్ ఉంటుంది… ప్రధానంగా ఫోక్… ఎక్కడా రోత స్టెప్పులు, బాడీ లాంగ్వేజ్ ఉండదు… హాయిగా ఫ్యామిలీ అంతా చూసేలా ఉంటుంది…
ఎస్, తెలుగు ఫోక్ యూట్యూబ్ విప్లవంలో రాను ముంబైకి రాను పాటకు ఎంత వాల్యూ ఉందో, నాగదుర్గ పాటలకూ అంతే వాల్యూ ఉంది… యూట్యూబ్ను కమ్మేసిన ఓ నృత్య కెరటం… కాపోళ్ల ఇంటికాడ, జిల్లేలమ్మ జిట్ట, తిన్నా తిరం పడ్తలేల నుంచి మొన్నమొన్నటి దారిపంటొత్తుండు దాకా… సూపర్ హిట్ కేరక్టర్ ఆమె… తెలుగు యూట్యూబ్ స్టార్ హీరోయిన్ ఆమె…
Ads
ఇప్పుడు ఆమె తమిళ హీరో ధనుష్ మేనల్లుడు పవీష్ హీరోగా నటించే ఓ తమిళ సినిమాలో హీరోయిన్… లవ్ ఓ లవ్… ఈ పవీష్ మనకు పరిచయమే… జాబిలమ్మ నీకు అంత కోపమా’ సినిమాతో తెలుగు ప్రేక్షకులకు తెలిసినవాడే… ఈ సినిమా విడుదలకు సిద్ధమైంది… అంతకుముందే కలివివనం అనే ఓ తెలుగు సినిమా కూడా చేసింది ఆమె… ప్రకృతి, పర్యావరణ పరిరక్షణ, అడవుల నరికివేత కాన్సెప్టుతో బాగానే ఉంది…
రొటీన్ సినిమా హీరోయిన్ల పాత్రలు అక్కర్లేదనీ, మంచి పాత్రలు దొరికితే తప్ప సినిమాల్లో చేయను అని గతంలో నాగదుర్గ చెప్పినట్టు గుర్తు… అలాగే ఏకంగా నాని సినిమా శ్యామ్ సింగరాయ్ పాత్ర కూడా వచ్చినట్టే వచ్చి పోయిందనీ వార్తలు చదివినట్టు యాది…
అలాంటిది నేరుగా ఓ తమిళ సినిమాలోకి, అదీ ధనుష్ క్యాంపులోకి ఎలా ఎంట్రీ ఇచ్చిందో గానీ ఇంట్రస్టింగు… అయితే చాలా వార్తలు వచ్చాయి… తమిళం వాళ్లు గుర్తించారు గానీ నాగదుర్గను తెలుగు ఇండస్ట్రీ గురించడం లేదు ఎందుకు అని..? కానీ తప్పు…
ఆమె రెండు తెలుగు సినిమాలు చేయబోతోంది… అవి రొటీన్ హీరోయిన్ పాత్రలా..? ఏమైనా విశేష ప్రాధాన్యముందా..? చూడాలిక… ఆమెకు కొన్ని చాన్సులు వచ్చీ ఆమె వద్దనుకుంది కదా, మరి ఈ పాత్రల కథలేమిటో ఆసక్తికరం…
కూచిపూడి, పేరిణి నేర్చుకున్న శాస్త్రీయ నృత్యకారిణి ఆమె… డాన్స్ స్కూల్ నడిపిస్తూ, డాన్స్లో పీహెచ్డీ కూడా చేస్తుందని సమాచారం… 1600 ప్రదర్శనలు, 70 వీడియో సాంగ్స్ చేసింది…
కాకపోతే తన పాపులర్ ఫోక్ స్టెప్పులకూ ఆ నాట్యాలకూ సంబంధం లేదు… దారపంటొత్తుండు పాటలో రెట్రో స్టయిల్ మేకప్పు, పోకడతో అదరగొట్టింది… అచ్చం సినిమా హీరోయిన్లలాగే… కొన్నిచోట్ల స్టేజ్ డాన్సులు కూడా చేసింది…
- వంశీరెడ్డి దర్శకత్వంలో ప్రియదర్శి హీరోగా ఓ సినిమా ఒప్పుకుంది ఆమె తాజాగా… బన్నీ వాసు, సుకుమార్ నిర్మాతలు…
- సంపత్ నంది నిర్మాతగా.. అశోక్ దర్శకత్వంలో రాజు వెడ్స్ రాంబాయి హీరో పక్కన నటిస్తుంది మరో సినిమాలో… ( ఈ రెండూ కట్టర్ తెలంగాణ సినిమాలే )
గుడ్ స్టార్ట్… ఏది పడితే అది చేయను అంటోంది, సాయిపల్లవిలాగే… ఆమెలాగే మంచి డాన్సర్, పైగా ఈమె ట్రెయిన్డ్… సాయిపల్లవి లుక్కన్నా బెటర్… కానీ నాట్యం సినిమాల్లో అప్రధానం, నటనే ముఖ్యం… అందులో సాయిపల్లవితో పోటీపడితే… తెలుగులో మంచి అవకాశాలున్నాయి… కాపోళ్ల ఇంటికాడ అంటూ దున్నేయడమే, ఆల్ ది బెస్ట్…
Share this Article