.
ఒకవైపు రణబీర్ కపూర్, యశ్, సాయి పల్లవి… మరోవైపు నమిత్ మల్హోత్రా, నితేష్ తివారీ… రామాయణం గురించి ఎక్కడ చూసినా వీళ్ల పేర్లే వినిపిస్తున్నాయి. దర్శకుడి విజన్, నిర్మాత భారీ పెట్టుబడి, నటీనటుల పాత్రలు, హాలీవుడ్ టెక్నీషియన్ల పనితనం… ఇలా ఎన్నో అంశాలపై కథనాలు వస్తున్నాయి. కానీ ఈ సినిమా వెనుక మరో ఆసక్తికరమైన వ్యక్తి ఉన్నారు. ఆమె పేరు అశ్విని అయ్యర్ తివారీ.
ఒకే ఇంట్లో ఇద్దరు దర్శకులు ఉంటే… ఒకరి విజయం మరొకరికి పోటీగా మారాల్సిన అవసరం లేదు. ఒకరి కలను మరొకరు తమ కలగా భావించి, ప్రోత్సహించుకోవచ్చు. నితేష్ తివారీ, అశ్విని అయ్యర్ తివారీ ప్రయాణం అలాంటిదే. ఇప్పుడు నితేష్ తెరకెక్కిస్తున్న రామాయణం భారతీయ సినీ చరిత్రలోనే అత్యంత భారీ ప్రాజెక్టుల్లో ఒకటిగా చర్చకు వస్తుంటే, ఆ ఇంట్లో మరో దర్శకురాలిగా అశ్విని పాత్ర కూడా ఆసక్తికరంగా కనిపిస్తుంది.
ప్రకటనల సంస్థలో మొదలైన పరిచయం… సినిమా రంగంలో రెండు స్వతంత్ర ప్రయాణాలు!
అశ్విని పేరు చెప్పగానే ముందుగా గుర్తొచ్చేది ‘నిల్ బట్టే సన్నాటా’. చదువుకోవాలనే ఆశ ఉన్నా ఆర్థిక పరిస్థితులు సహకరించని ఒక తల్లి, తన కూతురి కోసం మళ్లీ చదువుకోవాలని నిర్ణయించుకునే కథ అది. ఆ తర్వాత ‘బరేలీ కీ బర్ఫీ’, ‘పంగా’ చిత్రాలతో తనకంటూ ప్రత్యేకమైన గుర్తింపు తెచ్చుకుంది. మహిళల ఆకాంక్షలు, కుటుంబ సంబంధాలు, జీవితంలోని చిన్న చిన్న సంఘర్షణలను తెరపై సహజంగా చూపించడంలో ఆమెది ప్రత్యేకమైన శైలి.
Ads
అయితే అశ్విని సినిమా రంగంలోకి రావడానికి ముందు దాదాపు 14–16 ఏళ్లు ప్రకటనల రంగంలో పనిచేసింది. లియో బర్నెట్‌లో ట్రైనీగా మొదలై ఎగ్జిక్యూటివ్ క్రియేటివ్ డైరెక్టర్ స్థాయికి ఎదిగింది. కేవలం ప్రకటనలు రూపొందించడమే కాదు, ఎన్నో అవార్డులు అందుకున్న క్రియేటివ్ ప్రొఫెషనల్‌గా గుర్తింపు… కౌన్ బనేగా కరోడ్‌పతి వంటి కార్యక్రమాలకు సంబంధించిన ప్రకటనల రూపకల్పనలోనూ ఆమె కీలకం…
(nitesh tiwari and ashwini iyer)
నితేష్ తివారీతో ఆమె పరిచయం కూడా ఈ ప్రకటనల ప్రపంచంలోనే మొదలైంది. నితేష్ అప్పట్లో లోవ్ లింటాస్‌లో పనిచేస్తుండగా, ఉమ్మడి స్నేహితుల ద్వారా ఇద్దరికీ పరిచయం ఏర్పడింది. ఆ తర్వాత నితేష్ కూడా లియో బర్నెట్‌లో చేరాడు. సృజనాత్మక ఆలోచనలు కలిసిన ఈ ఇద్దరి మధ్య స్నేహం ప్రేమగా మారింది. 2004లో పెళ్లి చేసుకున్నారు.
ఈ జంట ప్రత్యేకత ఏమిటంటే… ఇద్దరూ ఒకే రంగంలో ఉన్నా ఒకరి నీడలో మరొకరు ఉండాలని ఎప్పుడూ అనుకోలేదు. నితేష్ దర్శకత్వం వహించిన ‘చిల్లర్ పార్టీ’, ‘భూత్‌నాథ్ రిటర్న్స్’, ‘దంగల్’, ‘ఛిచోరే’ సినిమాలు ఆయనకు దర్శకుడిగా గొప్ప గుర్తింపు తెచ్చిపెట్టాయి. మరోవైపు అశ్విని తనకు నచ్చిన కథలతో, తనదైన శైలిలో సినిమాలు తీస్తూ ముందుకు సాగింది.
నితేష్ తన భార్య సినిమాల షూటింగులకు వెళ్లకపోవడం, ఆమె పనిలో జోక్యం చేసుకోకపోవడం గురించి గతంలో ఒక ఇంటర్వ్యూలో చెప్పాడు. భార్య అనే కారణంతో తనకు ప్రత్యేకమైన ప్రాధాన్యం లభించిందనే అభిప్రాయం ఎవరికీ కలగకూడదన్నది ఆయన వృత్తిపరమైన వైఖరి. ఈ చిన్న విషయం కూడా వారి బంధంలోని పరస్పర గౌరవాన్ని తెలియజేస్తుంది.
ఇప్పుడు నితేష్ కల… అశ్విని ఆనందం!
ఇప్పుడు నితేష్ తివారీ కెరీర్‌లోనే అత్యంత ప్రతిష్ఠాత్మకమైన ప్రాజెక్టు ‘రామాయణం’. 8 రోజుల్లో 1000 కోట్ల వసూళ్లు… ఇండియన్ సినిమా వసూళ్ల చరిత్రను తిరగరాస్తోంది… ఈ ప్రయాణాన్ని నితేష్ ఒక్కడే సాధించలేదు. ఆయన ఎదుగుదలను దగ్గరగా చూసిన వ్యక్తి అశ్విని. ఇద్దరూ ప్రకటనల రంగంలో ఉన్న రోజులు, సినిమా రంగంలోకి అడుగుపెట్టిన తొలి రోజులు, పిల్లల పెంపకం, కెరీర్‌లో ఎదురైన ఒడిదుడుకులు… ఇలా ఎన్నో అనుభవాలు వారిద్దరికీ ఉమ్మడి జ్ఞాపకాలు. ఇప్పుడు నితేష్ ఒక ఇతిహాసాన్ని వెండితెరపై ఆవిష్కరించే స్థాయికి చేరుకోవడం అశ్వినికి కూడా ఒక గొప్ప భావోద్వేగ క్షణమే.
రామాయణం లాస్ ఏంజెలెస్‌లో ప్రత్యేక ప్రదర్శనకు చేరిన సందర్భంగా అశ్విని సోషల్ మీడియాలో స్పందించింది. ఈ స్థాయికి రావడానికి వెనుక ఉన్న ఏళ్ల తరబడి శ్రమ, త్యాగాలు, ప్రయాణాన్ని గుర్తుచేసుకుంటూ ‘ఇట్స్ కర్మ’ అంటూ తన ఆనందాన్ని పంచుకుంది. అంటే ఇది కేవలం భర్త సాధించిన విజయం మాత్రమే కాదు, ఇద్దరూ కలిసి సాగించిన సుదీర్ఘ ప్రయాణానికి దక్కిన గుర్తింపు కూడా.
అయితే అశ్విని తనకంటూ మరో ప్రయాణాన్ని కూడా కొనసాగిస్తుంది. తనను కేవలం మహిళా ప్రాధాన్య చిత్రాల దర్శకురాలిగా ముద్ర వేయడం ఆమెకు ఇష్టం లేదు. కథలో మహిళలు ప్రధానంగా ఉండే సినిమాలు తీసినంత మాత్రాన తన సృజనాత్మక పరిధి అక్కడితో ముగిసిపోదని, విభిన్నమైన కథలు, విభిన్నమైన సినిమా రూపాలను అన్వేషించాలని ఆమె భావిస్తున్నది.
ఇద్దరూ దర్శకులే. ఇద్దరికీ సినిమాలే ప్రపంచం. కానీ ఒకరి విజయం కోసం మరొకరు తమ గుర్తింపును పణంగా పెట్టుకోలేదు. కొన్నిసార్లు ఒక విజయానికి వెలుగులు ఒకరి మీద పడతాయి. ఆ వెలుగుల వెనుక ఆ ప్రయాణాన్ని అర్థం చేసుకుంటూ, ఆనందిస్తూ ఉండే మరో వ్యక్తి ఉంటారు. నితేష్ తివారీ రామాయణం ప్రయాణంలో అశ్విని అయ్యర్ తివారీ అలాంటి వ్యక్తి. అయితే ఆమెను కేవలం తెరవెనుక ఉన్న వ్యక్తిగా పరిమితం చేయలేం. ఎందుకంటే ఆమెకూ తనదైన కథ ఉంది. ఆ కథలోనూ ఎన్నో విజయాలున్నాయి!
ఇక్కడే మరో జంట గురించీ చెప్పాలి… ఆదిత్య ధర్ – యామీ గౌతమ్… రామాయణానికి దీటైన రికార్డులు దురంధర్‌వి… రెండు సినిమాలూ హాట్ టాపిక్స్… ఇండియన్ సినిమా రికార్డుల్ని బద్దలు కొట్టిన సినిమాలు… ఆ రెండు సినిమాలకూ సంబంధించి ఇప్పుడు ట్రెండింగులో ఉన్న జంటలు నితేష్- అశ్విన్ ఒకరైతే… మరొకరు ఆదిత్య- యామీ… కాకపోతే యామీ కేవలం నటి… ఈ రెండు సినిమాల్లో హీరోల పేర్లు ఒకటే… రణబీర్… ఒకరు కపూర్, మరొకరు సింగ్…!!
Share this Article