ఫాఫం… పూర్ణ ప్లేసులో కొత్త కేరక్టర్… సుధీర్, రష్మిలకు ఆల్టర్నేట్స్ లేరు..!

శేఖర్ మాస్టర్ వెళ్లి చాలారోజులైంది… జడ్జి ప్లేసు నుంచి పూర్ణను తరిమేశారు… టాప్ పెయిర్ సుధీర్, రష్మిలను వెళ్లగొట్టారు.., చూడచక్కగా ఉన్న దీపిక పిల్లికి పొగబెట్టారు… వెరసి ఈటీవీ వాడి ఢీ షో కళతప్పింది… అదే ప్రియమణి, అదే ప్రదీప్, ఆమధ్య కొత్తగా వచ్చిన గణేష్ మాస్టర్… ప్చ్, వెలిసిపోయినట్టుంది షో… ముందొచ్చిన చెవులకన్నా కొమ్ములు వాడి అన్నట్టుగా, ఎన్నాళ్లుగానో ఉన్న సుధీర్ అల్లం అయిపోయాడు… ఆమధ్య కొత్తగా చేరిన హైపర్ ఆది బెల్లం అయిపోయాడు… ఒక్కసారిగా ఈ షో మీద జనానికి ఆసక్తి పోయింది… సీజన్ 14 షోకు మొన్నటి బార్క్ రేటింగ్స్ ఎంతో తెలుసా..? జస్ట్, మూడున్నర (హైదరాబాద్ కేటగిరీ, బుధవారం 9.30 నుంచి 11 గంటల వరకు)… దీనికి డాన్సింగ్ ఐకన్ అని పేరు పెట్టారు…

ఇప్పుడు పూర్థ ప్లేసులో నందిత శ్వేతను పట్టుకొచ్చారు… మలయాళం హీరోయిన్, తెలుగులో కూడా ఓ సినిమా చేసింది… ఎక్కడికి పోతావు చిన్నవాడా అనే సినిమా… ఎవరో ఒకరు, కుర్చీ నిండుగా కనిపిస్తే చాలు… కానీ టీం లీడర్లు ఎవరు..? హైపర్ ఆది కొనసాగుతున్నాడు… మరి సుధీర్ ప్లేసు..? ఈ షో నిర్మాతలకు అంతుపట్టడం లేదు… సుధీర్ ప్లేసు భర్తీ అంత వీజీ కాదు… గత బిగ్‌బాస్ సీజన్ రన్నరప్ అఖిల్ సార్థక్‌ను తీసుకొచ్చారు… తేలిపోయాడు… ఇప్పుడిక మరో బిగ్‌బాస్ కేరక్టర్, టీవీ నటుడు రవిని పట్టుకొచ్చారు…

ప్చ్, ఎంతవరకు నెట్టుకొస్తారో చూడాలి… వీళ్లను నిజానికి ప్రయోగాత్మకంగా తీసుకున్నట్టుగా అనిపిస్తోంది… కొన్నాళ్లు చూసి, నచ్చితే కొనసాగిస్తారు, లేకపోతే ఢమాల్… మరి రష్మి ప్లేసులో ఎవరు..? ఇప్పటికి ఎవరూ లేరు… దొరకడం లేదు… సుధీర్‌ను, రష్మిని ఎందుకు తరిమేశారనే కారణాల జోలికి మళ్లీ మళ్లీ వెళ్లలేం గానీ… షో కళ తప్పిందనేది నిజం… ఇక బిగ్‌బాస్ నుంచి సన్నీ బయటికి వచ్చాడు కదా, శ్రీదేవి డ్రామా కంపెనీ షోలో కూడా సుధీర్ ప్లేసుకు ఎసరు పెట్టే ప్రమాదం కనిపిస్తోంది… జబర్దస్త్ షోలో మాత్రం సుధీర్, రష్మిలు ఇంకా కొనసాగుతున్నారని గమనించగలరు…!! ఎన్నాళ్లు అనేది మల్లెమాల శ్యాంరెడ్డి గారి దయ, ఈటీవీ ప్రేక్షకుల ప్రాప్తం..!!