Pooja Hegde…! ఈమె కాళ్ల మీదేనా అంతటి సిరివెన్నెల కలం పారేసుకున్నది..?!

మొన్నొక వార్త… స్టార్ హీరోయిన్ పూజా హెగ్డే మహేశ్ బాబు సినిమా ‘గుంటూరు కారం’ నుంచి తప్పుకుందనీ… తరువాత రవితేజ సినిమా ‘మిస్టర్ బచ్చన్’ నుంచి తీసివేయబడిందనీ…! తెలుగు సూపర్ స్టార్ మహేశ్ బాబు సినిమా 40 శాతం వరకూ పూర్తయ్యాక మరీ అంతటి పాపులర్ హీరోయిన్ తప్పుకుందనే సమాచారం ఆశ్చర్యపరిచింది…

సరే, ఏవో బలమైన కారణాలు ఉండే ఉంటాయి… అసలు గుంటూరు కారం సినిమా జర్నీయే అంత సజావుగా అనిపించడం లేదు… మరి రవితేజ సినిమా నుంచి ఎందుకు వెళ్లిపోయినట్టు..? అంటే… ఆమె సినిమాలు అంగీకరించడం, చేయడంలోనే ఏదో లోపం కనిపిస్తోంది… అది గతంలో లేదు, ఉంటే ఆ స్థాయికి ఎదిగేది కాదు… మరేమైంది ఆమెకు..?

నిజానికి ఆమెను ప్రభాస్ సినిమా ‘రాధేశ్యాం’లో చూస్తుంటే జాలేసింది… ఈమె కాళ్ల మీదేనా అంతటి సిరివెన్నెల సైతం ‘నీ కాళ్లను పట్టుకు వదలనన్నవి చూడే నా కళ్లు’ అంటూ దండకం రాసింది… ఆ కాళ్ల మీద తన కలం పారేసుకున్నది… ఈమేనా భారతీయ యువత కలల సామ్రాజ్ఙి అయిపోయింది… అలా విస్మయం అనిపించింది…

ఒకప్పుడు… ‘డీజే’ తర్వాత ‘అరవింద సమేత వీర రాఘవ’, ‘మహర్షి’, ‘గద్దలకొండ గణేశ్’, ‘అల వైకుంఠపురంలో’, ‘మోస్ట్ ఎలిజబుల్ బ్యాచిలర్’ ఇలా వరుసగా హిట్ల మీద హిట్లు కొట్టింది పూజా హెగ్దే… ఆ ‘రాధే శ్యామ్’ మూవీతోనే పూజా లక్ రివర్స్ కొట్టింది… బాక్సాఫీస్ దగ్గర ఈ ‘రాధే శ్యామ్’ భారీ డిజాస్టర్‌ కాగా, ఆ తర్వాత పూజా చేసిన ‘ఆచార్య’ అట్టర్ ఫ్లాప్ అయ్యింది…

పోనీ, హిందీకి వెళ్లి అక్కడేమైనా బావుకుందా..? అదీ లేదు… తెలుగు నుంచి హిందీకి వెళ్లి  ‘సర్కస్’, ‘కిసి కా భాయ్ కిసి కా జాన్’ సినిమాలు చేసింది పూజా హెగ్దే… ఈ రెండు సినిమాలు కూడా బాక్సాఫీస్ దగ్గర డిజాస్టర్లు… నిజానికి ఈమె త్రివిక్రమ్ శ్రీనివాస్‌కు ఫేవరెట్… అందుకే గుంటూరు కారం సినిమాలో హీరోయిన్‌గా ఎంపికైంది… అయితే దాదాపు 40 శాతం షూటింగ్ అయ్యాక, పూజా హెగ్దే ఈ ప్రాజెక్ట్ నుంచి తప్పుకుంది…

‘గుంటూర్ కారం’ సినిమాకు ఆమె ఇచ్చిన షాక్‌తో తెలుగులో ఇక పూజా హెగ్దేకి ఛాన్సులే రావని అనుకున్నారు… అయితే ‘డీజే’ మూవీతో పూజా లక్కు మార్చిన హరీశ్ శంకర్, రవితేజతో చేస్తున్న ‘మిస్టర్ బచ్చన్’ మూవీలో హీరోయిన్‌గా తొలుత ఆమెనే తీసుకోవాలని అనుకున్నాడు…