‘నూకరాజు ! గతం- మూలాలు మరిచిపోని స్వచ్ఛత ! కీపిటప్ !!

.

కొందరు ఆర్టిస్టులు… లేని భేషజాలకు, కృత్రిమ పోకడలకు దూరం… తమ మూలాలు మరిచిపోరు… తెలుగు టీవీ ఆర్టిస్టుల్లో అలాంటోళ్లు చాలామంది ఉన్నారు… పటాస్, జబర్దస్త్ తదితర టీవీ షోలతో బాగా పాపులరైన ఇమాన్యుయేల్, నూకరాజు అలాంటోళ్లే..! ఇప్పుడు పాపులర్ టీవీ కమెడియన్లు కమ్ ఆర్టిస్టులు…

తమ పేదరికపు మూలాల్ని దాచుకోరు, తమ కష్టాల గతాన్ని మరిచిపోరు… ఆర్టిస్ట్ వర్ష హోస్ట్ చేసే కిస్సిక్ షోలో కొందరి‌తో చాట్ బాగుంటుంది… నూకరాజుతో తాజాగా చిట్‌చాట్… బాగుంది… ప్రోమోనే కదిలించేలా ఉందంటే అసలు షో ఇంకాస్త బాగుంటుందేమో…

ఇమాన్యూయేల్ గత బిగ్‌బాస్ షోను నిజంగా రక్తికట్టించాడు… కల్యాణ్ పడాల పేరుకు విజేత, తనూజ ఒకరకంగా విజేత, కానీ వినోదం కోణంలో ఇమ్మూయే వాస్తవ విజేత… తను యాక్టివ్ అయిపోయాడు, నూకరాజు కూడా బహుశా బిగ్‌బాస్ 10 సీజన్‌లోకి వెళ్తాడేమో, స్పాంటేనియస్ పంచులకు ప్రసిద్ధి కదా, డెఫినిట్‌గా రాణిస్తాడు… తను మిమిక్రీ చేయగలడు, పాడగలడు…

ఓసారి ఏదో టీవీషోలో కాంతార సాంగ్ ప్రదర్శిస్తే… సదరు కాంతార హీరో బ్రదర్ స్వయంగా అభినందించాడని చెప్పుకున్నాడు… కరెక్టే… చాలా బాగా చేశాడు ఆ స్కిట్…

తను విజయవాడ పవర్ ప్లాంటులో పని మానేసి, హైదరాబాద్‌కు ఆర్టిస్టుగా రాణిద్దామని వచ్చాడు, మొదట్లో అనేక ఎదురుదెబ్బలు, చివరకు ఉప్పర పని కూడా చేశాడు… తను కిస్సిక్ షోలో చెబుతున్న విషయాలు… ‘‘అమ్మ యాపిల్స్ కొంటుందనే ఆశతో జ్వరం రావాలని కోరుకునేవాడిని… చిన్నప్పుడు చిన్న పాకలో ఉండేవాళ్లం, వర్షం వస్తే అది ఒకవైపు, మేం ఒకవైపు…

చికెన్ తినాలంటే రెండువారాలు ఎదురుచూసేవాళ్లం, సంక్రాంతి అందరికీ పండుగ, మేం పనికి వెళ్లేవాళ్లం… మా నాన్న మద్యానికి బానిస గాకుండా ఉంటే బాగుండేది, రోగమొచ్చినా నొప్పి వచ్చినా బంగారం తాకట్టే దిక్కు, లేకపోతే డబ్బుల్లేవు… మద్యం మా ఇంట్లోకి రానప్పుడు ఉన్న తిండే అందరమూ కలిసి ఆనందంగా తినేవాళ్లం, అది ప్రవేశించాక ముద్ద సరిగ్గా దిగట్లేదు…

వెన్నుపోటు అనే పదం వాడలేను గానీ, ఓ కోఆర్టిస్టు చెల్లికి బాగాలేదు అంటే కాగితం లేకుండా 13 లక్షలు ఇచ్చాను, తిరిగి ఇవ్వలేదు, సంపాదించిందంతా పోయింది… మత్స్యకారుల జీవితాలు ఎప్పుడూ ప్రమాదకరమే, 10, 15 కిలోమీటర్ల లోపల దాకా చేపల వేటకు వెళ్తే తిరిగి వస్తారో రారో అనేదీ డౌటే… రీసెంటుగా ఏడుగురు మరణించారు, సముద్రం మధ్యలో పడవ దెబ్బతిన్నా, ఫోన్ పనిచేయక… ప్రాణాంతకం…

తను ఏ మొహమాటం లేకుండా శ్రీదేవి డ్రామా కంపెనీలో భంగపాటు గురించీ చెప్పుకున్నాడు, రెగ్యులర్ అవుతున్నారనే సాకు గురించీ చెప్పాడు… కానీ అదే టీవీలో ఏళ్లుగా ఒకేరకం మొనాటనస్ ధోరణితో విసిగిస్తున్న ఓ స్టార్ ఆర్టిస్టుకు మాత్రం మూడు షోలలో ప్రాధాన్యం… అది చెప్పలేదు తను, కానీ తను శ్రీదేవి డ్రామా కంపెనీ అనుభవం  చెబుతుంటే ఇది గుర్తొచ్చింది… అంతేలే, ఐనవాళ్లకు ఆకుల్లో, కానివాళ్లకు కంచాల్లో…

కానీ ఏమాటకామాట… నూకరాజు, నువ్వు ఇలాగే ఉండు, స్వచ్ఛంగా… పాపులారిటీ వస్తుంది, పోతుంది, ఈ స్వచ్ఛత శాశ్వతం..!! ఆల్ ది బెస్ట్ !!