ఈ సీజన్ బిగ్‌బాస్ లాంచింగ్ షో రేటింగ్స్ ప్రస్తుతానికి వోకే… వాట్ నెక్స్ట్..?!

చెరువును ఆక్రమించి కట్టిన నాగార్జున ఎన్ కన్వెన్షన్ హాలును హైడ్రా కూల్చేయడంతో నాగార్జున బాగా నిరుత్సాహానికి గురయ్యాడనీ… ఒక్కసారిగా డిప్రెస్ అయిపోయాడనీ, ఈ ప్రభావం బిగ్‌బాస్ లాంచింగ్ ప్రోగ్రామ్ మీద, తన హోస్టింగ్ మీద నెగెటివ్‌గా ఉండబోతోందనీ అనుకున్నారు…

కానీ అదేమీ లేదు… తను నటుడు… మనసులో ఏమున్నా సరే, తనకు వ్యక్తిగతంగా, స్టూడియో అద్దెపరంగా మస్తు డబ్బు సంపాదించిపెడుతున్న బిగ్‌బాస్‌ను ఎందుకు ప్రభావితం కానిస్తాడు… కానివ్వలేదు… యధావిధిగా పాల్గొన్నాడు… ఎప్పటిలాగే కాస్త హుషారుగా, తనదైన స్టయిల్‌లో లాంచింగ్ హోస్ట్ చేశాడు…

ఈసారి కంటెస్టెంట్ల ఎంపిక దరిద్రంగా ఉన్నా సరే… లాంచింగ్ భారీగానే కలర్‌ఫుల్‌గా నిర్వహించారు… సాయంత్రం ఏడు గంటలకు మొదలుపెడితే మూడున్నర గంటలపాటు సాగింది… ప్రతి సీజన్ మొదట్లో చాలామంది సోషల్ మీడియాలో నెగెటివ్ పోస్టులు పెడుతూ ఉంటారు… అబ్బే, ఎవడు చూస్తున్నాడు ఈ బిగ్‌బాస్‌ను..? స్టార్ మాటీవీ వాడికి ఈ షో మీద ఎందుకు ఇంత అనురక్తి..? దిక్కుమాలిన షో అంటూ..!!

ఈ షో ఇప్పటికీ హైకోర్టులో విచారణలోనే ఉన్నట్టుంది కూడా… నిజానికి గత రెండుమూడు సీజన్లు చెత్తగా నడిచాయి… రేటింగ్స్ దారుణంగా ఉండేవి… జనం కూడా పెద్దగా ఆసక్తి చూపించలేదు… షో అయ్యాక శివాజీ శిష్యుడు పల్లవి ప్రశాంత్ టీమ్ ఏం నిర్వాకానికి పాల్పడిందో, చివరకు తను ఎలా మారాడో అదంతా వేరే సంగతి…

ప్రస్తుతానికి స్టార్ మాటీవీకి ఇదొక్కటే ప్రిస్టేజియస్ రియాలిటీ షో… టీమ్ మారిపోయింది… పాత టీమ్స్‌ను పంపించేశారు… ఈసారి ముంబై టీం దిగింది… కంటెస్టెంట్ల ఎంపికను అల్లాటప్పాగా నిర్వహించినా సరే, గేమ్ తీరు కాస్త మార్చారు… ఈ షో పట్ల జనాదరణను మళ్లీ తెచ్చుకుంటామని స్టార్ మా అనుకుంది… అనుకున్నట్టుగానే దీనికి మంచి రేటింగ్స్ వచ్చాయి…

హైదరాబాద్ బార్క్ కేటగిరీలోనే 8.54 టీఆర్పీలు వచ్చాయి… అంటే ఓవరాల్‌గా దాదాపు పది వరకూ… ఇప్పుడున్న సిట్యుయేషన్‌లో పెద్ద పెద్ద స్టార్ల సినిమాలకే అందులో సగం రేటింగ్స్ రావడం లేదు… అంటే బిగ్‌బాస్ లాంచింగ్ షో హిట్టయినట్టే… సరే, తరువాత షోను కంటెస్టెంట్లు తీవ్రంగా నిరాశపరుస్తున్నారు, ఇక ఈ రేటింగ్స్ ఎలా ఉంటాయో, ఫస్ట్ వీకెండ్ షోల రేటింగ్స్ ఎలా ఉంటాయో చూడాల్సి ఉంది…

సోమవారం 4.69, శుక్రవారం 4.24, గురువారం 3.91, బుధవారం 3.72, మంగళవారం 3.87 రేటింగ్స్ వున్నాయి… పర్లేదు… ఇప్పటివరకూ ఈ రేటింగ్స్ వోకే… ఇకపై ఏమిటి..? ఏమో, గతంలో శివాజీని, ఇప్పుడు విష్ణుప్రియను నెత్తికెత్తుకున్న ఓ సెక్షన్ మీడియా ఆల్రెడీ సోనియా మీద నెగెటివ్ ప్రాపగాండా స్టార్ట్ చేసింది కదా… షో ఇంకాస్త వేడి పుంజుకుంది… రేటింగ్స్ సంగతి చూడాలిక..!