ప్రిస్టేజియస్ స్కూల్… సీటు దొరకడం గగనం… పైరవీలు నడవవ్… ఓపూట అడ్మిషన్ల కోసం తల్లిదండ్రులు విరగబడ్డారు… ఇంటర్వ్యూలు సాగుతున్నయ్… పేరెంట్స్‌లో ఒకటే టెన్షన్…
ఒక అమ్మాయికి అసలే అర్థం కావడం లేదు, తనను ఇక్కడికి ఎందుకు తీసుకొచ్చారు అసలు అనుకుంటోంది.., ఆ హడావుడి, ఆ రద్దీని ఆసక్తిగా గమనిస్తోంది…
టీచర్, ప్రిన్సిపాల్ ఆ అమ్మాయి ఇంటర్వ్యూ ప్రారంభించారు… అదిలా సాగింది…
Ads
నీ పేరేమిటమ్మా..?
సీత…
నీకు తెలిసింది ఏమైనా చెప్పు..?
చాలా విషయాలు తెలుసు నాకు, మీకేం కావాలో అడగండి…
(ఈ పిల్ల దూకుడు చూసి పేరెంట్స్ తలపట్టుకున్నారు, అడ్మిషన్ అవకాశాలు ఇక గంగలో కలిసినట్టే అని భయం పట్టుకుంది… తల్లి ఏవో సైగలు చేస్తోంది కానీ ఆ అమ్మాయి అవేవీ పట్టించుకోలేదు… ప్రిన్సిపాల్ కూడా ఆ అమ్మాయిని మాట్లాడనివ్వండి అంటూ తల్లిని వారించాడు…)
నువ్వు చెప్పు తల్లీ, నీకు తెలిసిన ఏదైనా పద్యమో, కథో చెప్పు…
ఏదో ఒకటి అడగండి, పద్యం కావాలా..? కథ కావాలా..?
ఊఁ, సరే… కథ చెప్పు…
నేను చదివిన కథ చెప్పనా..? నేను రాసిన కథ చెప్పనా..?
(ఆ గదిలో నిశ్శబ్దం…)
ఓహ్, నువ్వు కథలు కూడా రాస్తావా..?
నేనెందుకు కథలు రాయకూడదు..? రాయలేనా..?
(ప్రిన్సిపాల్‌లో మరింత ఆసక్తి పెరిగింది…)
సరే, నువ్వు రాసిన కథే చెప్పు…
ఓరోజు రావణుడు సీతను కిడ్నాప్ చేశాడు, శ్రీలంకకు ఎత్తుకుపోయాడు… అప్పుడు రాముడు హనుమంతుడిని పిలిచి, సీతను కాపాడాల్సిందిగా చెప్పాడు… హనుమాన్ సరే అన్నాడు…
ఊఁ తరువాత..?
అప్పుడు హనుమాన్ తన దోస్త్ స్పైడర్ మ్యాన్‌ను పిలుస్తాడు…
మధ్యలో స్పైడర్ మ్యాన్ ఎందుకు వచ్చాడు తల్లీ..? ఎలాగా..?
ఎందుకంటే… ఇండియా, శ్రీలంక నడుమ చాలా ఎత్తయిన పర్వతాలు, సముద్రం ఉంటుంది కదా, స్పైడర్ మ్యాన్ అయితే తాళ్లు క్రియేట్ చేసి తీసుకుపోతాడు ఈజీగా… అందుకని హనుమాన్ పిలుస్తాడన్నమాట…
కాదమ్మా, హనుమాన్ స్వయంగా ఎగిరి వెళ్లిపోగలడు కదా…
నో, అప్పటికే హనుమాన్ ఒక చేత్తో సంజీవనీ పర్వతాన్ని మోస్తున్నాడు, ఆ బరువు మోస్తూ వేగంగా శ్రీలంకకు ఎగిరివెళ్లడం కష్టం కదా…
(మళ్లీ ఆ గదిలో సైలెన్స్…)
నన్ను కంటిన్యూ చేయమంటారా..? వద్దా..?
లేదు, లేదు… నువ్వు చెప్పమ్మా…
హనుమాన్, స్పైడర్ మ్యాన్ కలిసి వెళ్లి, సీతను రక్షిస్తారు, సీత వాళ్లిద్దరికీ థాంక్స్ చెబుతుంది…
‘ఎందుకు..?’
‘ఎవరైనా సాయం చేస్తే థాంక్స్ చెప్పాలి కదా మరి..? తరువాత సీత Hulk ను పిలవాల్సిందిగా హనుమాన్‌కు చెబుతుంది…
మధ్యలో ఈ హల్కుడు దేనికి..?
హనుమాన్, స్పైడర్ మ్యాన్, సీత ముగ్గురూ కలిసి శ్రీలంక నుంచి ఇండియాకు రావాలి కదా… అందుకన్నమాట…
హనుమంతుడు ఒక్కడే సీతను మోసుకురాగలడు కదమ్మా…
ఎలా పాజిబుల్..? ఒక చేతిలో సంజీవని పర్వతం, మరో చేతిలో స్పైడర్ మ్యాన్… సీతను మోసుకురావడానికి ఇంకెవరో కావాలి కదా…
ఓహో, తరువాత ఏమైంది..,?
హల్కుకు కూడా కష్టమే అనుకుని అక్షయ్‌ను అడుగుతారు…
మధ్యలో ఈ అక్షయ్ ఎవరు..?
నా ఫ్రెండ్, నా కథలోకి నేను ఏ కేరక్టరైనా తీసుకొస్తా… మీరు డిస్టర్బ్ చేయకండి, లేకపోతే అవతార్ హీరో శామ్ వర్తింగ్‌టన్‌ను తీసుకొస్తా… ఆ రెక్కల పక్షి భలే ఉంటుందిలే…
సరే, సరే, ఆ తరువాత..?
ఏముందీ… అందరూ కలిసి హైదరాబాద్ ఎంజీబీస్ బస్టాండుకు వచ్చేస్తారు…
అక్కడికి ఎందుకు..?
ఎందుకంటే, వాళ్లు తొవ్వ మరిచిపోతారు, అందుకే ఓ ఐడియా వచ్చి, డోరాను పిలుస్తారు…
ఓహో, ఈ కథలో డోరా కూడా ఉన్నాడన్నమాట… కానివ్వు కానివ్వు…
అయిపోయింది కథ, అందరూ కలిసి గౌలిగూడ బస్ డిపో వెనక కాలనీలో దిగుతారు…
అక్కడికే ఎందుకు వెళ్లారు..?
ఎందుకంటే..? సీత ఉండేది అక్కడే… నా పేరే సీత…
.
.
.
(స్కూల్‌లో సీట్ సంగతి తెలియదు గానీ… ఇప్పుడు ఆ అమ్మాయిని ఓం రౌత్ అదిపురుష్ సినిమాకు స్టోరీ రైటర్‌గా తీసుకున్నట్టు కలవచ్చింది…)
Share this Article