ఓ బక్కపిల్ల… ఓ కుక్కపిల్ల..! బిగ్‌బాస్‌నే ఆడిస్తున్నది ఈ చిన్నబొమ్మ..!!

ఓ చిన్న కుక్కపిల్ల బొమ్మ… దాన్ని ఏదో సందర్భంలో అరియానా అనే కంటెస్టెంటుకు బహూకరించింది కూడా బిగ్‌బాసే… దానికి ఓ పేరు కూడా పెట్టారు… చింటూ…! ఆ బక్క పిల్ల ఈ కుక్కపిల్ల ప్రేమలో పడింది… అనగా బంధాన్ని పెంచుకుంది… పెట్స్ మాత్రమే కాదు, చాలామంది పెట్స్ పోలిన బొమ్మల్ని కూడా ఇష్టపడతారు… ముచ్చట్లు చెప్పుకుంటారు… తమలోని ఒత్తిడిని ఎగ్జాస్ట్ చేసుకునే మెథడ్ అది… అసంకల్పితంగానే అలా చేస్తుంటారు… ఆ అరియానా బొమ్మ ఇప్పుడు బిగ్‌బాస్‌లో చిచ్చు రేపుతోంది… ఆట చివరి ఓవర్లలో ఆ బొమ్మ ఆటకు కేంద్రకంగా మారింది… అదీ నవ్వొస్తున్న విషయం…

నవ్వొస్తున్నదీ అంటే మళ్లీ అరియానాతో తంటా… ఎందుకంటే..? తనను తిట్టినా, కొట్టినా, తన్నినా పడుతుంది… కానీ ఆ బొమ్మను ఏమీ అనొద్దు… అన్నందుకే, అంటున్నందుకే… అరియానాకు ఆ బొమ్మపై ఉన్న ప్రేమను ఆటకు వాడుకుంటున్నందుకే అన్నీ కొత్త తంటాలు… పంచాయితీలు… ఆ బొమ్మ తగాదాయే మోనాల్‌ను బ్యాడ్ చేసింది… వెక్కివెక్కి ఏడ్చేలా చేసింది… ఎందుకు..? ఏదో టాస్కులో అరియానాను ఎమోషన్‌కు గురిచేయడానికి మోనాల్ ఆ బొమ్మను టాప్ పైకి విసిరేసింది… ఆ తరువాత అరియానా ఇదే అంశం మీద మోనాల్‌ను అడ్డగోలుగా క్లాస్ పీకింది… మోనాల్ లోపలకు వెళ్లి శోకాలకు దిగింది… ఇది ఎపిసోడ్ వన్…

బ్యాడ్ అయినా సరే, మోనాల్‌కు నష్టం లేదు… ఆమెను ఆ బిగ్‌బాసుడు సదా రక్షిస్తూ ఉంటాడు… ఎటొచ్చీ సొహెల్ ఈ అనుకోని ఉచ్చులో పడిపోయాడు… ఈ బొమ్మ గురించే సొహెల్- అరియానా పంచాయితీ… మోనాల్‌ను కడిగేసినట్టుగానే అరియానా సొహెల్‌కూ క్లాస్ పీకింది… సొహెల్ ఊరుకునే రకం కాదు కదా… పైపైకి పోయాడు, తిట్టాడు, కసిరాడు, కళ్లురిమాడు… దాంతో టాప్ గేర్‌లో వెళ్తున్న సొహెల్ బండికి ఒక్కసారిగా బ్రేకులు పడ్డట్టయింది… ప్రేక్షకులు చీదరించుకున్నారు…

అరియానా నిన్న చేసిన రచ్చ అంతా ఇంతా కాదు… అదంతా బొమ్మతో తన ఎమోషనల్ బాండ్, దాన్ని బ్రేక్ చేస్తున్న సొహెల్, మోనాల్‌లపై అరియానా అదే ఎమోషనల్ దాడికి దిగింది… ఏడుస్తూ, కిందపడిపోతూ, బిగ్‌బాస్ మీద కూడా అరుస్తూ, ఫుల్ సింపతీ గెయిన్ చేసే ప్రయత్నం చేసింది… అఫ్ కోర్స్, సహజంగానే వచ్చి ఉంటుంది ఆ కోపం, బాధ… కానీ ఆమె దెబ్బకు బిగ్‌బాస్ సైతం కన్ఫెషన్ రూంలో మోనాల్‌ను, సొహెల్‌ను బుజ్జగించి, ఓదార్చాల్సి వచ్చింది… అదీ బొమ్మ ఎఫెక్ట్…

అసలే సొహెల్ కదా… మళ్లీ ఇవ్వాళ ఆ బొమ్మను ఒంటరిగా చూడగానే ఎక్కడో చర్రుమంది… అరియానాపై పరోక్షంగా పంచులు వేస్తూ… చింటూను వెక్కిరిస్తూ, నీవల్లే సమస్యలన్నీ వస్తున్నాయి అంటూ… కృత్రిమ కోపం ప్రదర్శించాడు… అఫ్ కోర్స్, సరదాగా ఉంది ఎపిసోడ్… సొహెల్ కోపం ఎంతటి తాటాకు మంటో, అది చల్లారగానే తనలోని ఓ జోవియల్ కేరక్టర్ ఎలా బయటికొస్తుందో చూపించాడు… గుడ్…

కానీ, హారికా, అభిజిత్… బీకేర్‌ఫుల్… ఈ బొమ్మ జోలికి పోకండి… దాని పవర్ చాలా ఉంది సుమా… అసలే క్రూషియల్ వీక్… తరువాత మీ ఇష్టం… మళ్లీ అరియానా చెలరేగిపోవడం, బిగ్‌బాస్ మిమ్మల్ని కూడా పిలిచి ఓదార్పు యాత్ర నిర్వహించడం అవసరమా..? ఏమంటారు..?

టైం టెస్ట్ టాస్కులో కూడా అరియనా గెలిచి, మరిన్ని మార్కులు దక్కించుకుంది… అఖిల్ గేమ్ స్పిరిట్ దాటి మోనాల్ కి సపోర్ట్ చేయబోయి ఫెయిల్ అయ్యాడు…