.
రెండు ప్లేట్ల చోలే భటూరే.. ఒక ఇన్‌స్టా పోస్టు మార్చేసిన జీవితాలు
ఒక చిన్న హోటల్‌… మూడు టేబుళ్లు… తొమ్మిది కుర్చీలు… నెలకు లక్ష రూపాయల టర్నోవర్‌ కూడా కష్టమే. వ్యాపారం సాగడం లేదు. అప్పులు మాత్రం పెరిగిపోతున్నాయి. ఏకంగా రూ.18 లక్షల అప్పు. ఇక ఈ షాపును నడపడం కంటే మూసేయడమే మంచిదనుకునే పరిస్థితి.
Ads
కానీ అదే హోటల్‌కు ఒకరోజు వచ్చిన ఆర్డర్‌.. ఆ తర్వాత వచ్చిన ఒక ఇన్‌స్టాగ్రామ్‌ పోస్టు.. ఇద్దరు సోదరుల జీవితాన్నే మార్చేసింది.
ముంబై చెంబూర్‌లో జస్పాల్‌సింగ్‌ ఖల్సా, మహేందర్‌సింగ్‌ ఖల్సా సోదరులు 2021లో ‘ఢిల్లీ సే’ పేరుతో చోలే భటూరే షాపు పెట్టారు. పేరులో ఢిల్లీ ఉన్నా.. ముంబైలో ఆ రుచి నిలబెట్టుకోవడం అంత సులభం కాలేదు. కస్టమర్లు పెద్దగా రావడం లేదు. వ్యాపారం నష్టాల్లోకి వెళ్లింది. చివరకు షాపును మూసేయాలనే ఆలోచనకు వచ్చేశారు.
అప్పుడొచ్చాడు స్టాండప్‌ కమెడియన్‌ అభిషేక్‌ ఉపమన్యు. ఆయన ఆ షాపులో చోలే భటూరే తిన్నాడు. నచ్చింది. ఇన్‌స్టాగ్రామ్‌లో పోస్టు చేశాడు. అంతే.. ఆ పోస్టును చూసిన వాళ్లలో ఒకరు అనుష్క శర్మ. ఆమెకు చోలే భటూరే అంటే ఇష్టపడే భర్త ఉన్నాడు. తనే కింగ్ విరాట్‌ కోహ్లీ…
జూహులోని కోహ్లీ– అనుష్క ఇంటి నుంచి ‘రెండు ప్లేట్ల చోలే భటూరే పంపగలరా?’ అంటూ ఢిల్లీ సేకు ఫోన్‌ వెళ్లింది. అది సాధారణ ఆర్డర్‌ కాదు. తమ హోటల్‌కు ఫోన్‌ చేసింది విరాట్‌ కోహ్లీ ఇంటి నుంచి అని తెలిసిన ఆ సోదరులు ఒక్కసారిగా షాక్‌ అయ్యారు. చివరకు 2022 అక్టోబర్‌ 5న స్వయంగా వెళ్లి ఆ రెండు ప్లేట్లను డెలివరీ చేశారు.
అక్కడితో కథ అయిపోలేదు. అసలు కథ అప్పుడే మొదలైంది. అనుష్క శర్మ ఆ చోలే భటూరేను ప్రశంసిస్తూ ఇన్‌స్టాగ్రామ్‌లో పోస్టు చేసింది. ఢిల్లీ రుచిని ముంబైలో గుర్తు చేశారంటూ ‘ఢిల్లీ సే’ను ట్యాగ్‌ చేసింది.
ఒక సెలబ్రిటీకి అది చాలా చిన్న పోస్టు. కానీ ఆ ఇద్దరు సోదరులకు?
అది జీవితాన్ని మార్చేసిన పోస్టు. పోస్టు వచ్చిన కొద్దిసేపటికే హోటల్‌ ముందు కస్టమర్ల క్యూ మొదలైంది. నిన్నటివరకు ఎనిమిది కిలోల శెనగలతో రోజును నెట్టుకొచ్చే పరిస్థితి ఉంటే.. డిమాండ్‌ ఒక్కసారిగా వంద కిలోలకు చేరింది.
మూసేయాలనుకున్న షాపు మూసుకోలేదు. మూడు టేబుళ్ల షాపు పెద్దదైంది. ఒక్కచోట ఉన్న వ్యాపారం నాలుగు బ్రాంచీలకు విస్తరించింది.
యజమానులు చెప్పిన లెక్కల ప్రకారం.. ఇప్పుడు రోజుకు 125 కిలోల వరకు శెనగలు ఉపయోగిస్తూ, 3,000కు పైగా ప్లేట్లు విక్రయిస్తున్నారు. ఒకప్పుడు నెలకు లక్ష రూపాయల టర్నోవర్‌ కూడా కష్టమైన వ్యాపారం.. ఇప్పుడు నెలకు సుమారు రూ.2 కోట్ల టర్నోవర్‌ చేస్తోందని వారు చెబుతున్నారు.
ఇదంతా కేవలం రెండు ప్లేట్ల చోలే భటూరే వల్ల జరిగిందని చెప్పడం కాదు. ఆ రెండు ప్లేట్లు తలుపు తట్టాయి. అనుష్క పెట్టిన పోస్టు ఆ తలుపును తెరిచింది. ఆ తర్వాత వచ్చిన వేలాది మంది కస్టమర్లను నిలబెట్టుకోవడం మాత్రం ఆ సోదరుల చోలే భటూరే రుచే చేసింది.
అందుకే ఈ కథలో అసలు హీరో చోలే భటూరేనా? అనుష్క శర్మనా? విరాట్‌ కోహ్లీనా? అభిషేక్‌ ఉపమన్యునా? అంటే.. ఒక్కరినే చెప్పలేం. కానీ ఒక విషయం మాత్రం స్పష్టంగా కనిపిస్తుంది.
ఈ రోజుల్లో సెలబ్రిటీ సోషల్ మీడియా ఖాతా కేవలం ఫొటోలు, ఫ్యాషన్‌, ఫాలోవర్ల కోసం ఉండే ఖాతా కాదు. అది ఒక చిన్న వ్యాపారానికి మార్కెటింగ్‌ యంత్రంగా మారగలదు.
ఒక లైక్‌ ఎవరికో ఆనందం ఇవ్వొచ్చు.
ఒక కామెంట్‌ ఎవరికో ఉత్సాహం ఇవ్వొచ్చు.
ఒక షేర్‌ ఒక కంటెంట్‌ను వైరల్‌ చేయొచ్చు.
కానీ ఒక సెలబ్రిటీ పెట్టే ఒక్క పోస్టు మాత్రం…
ఎక్కడో మూతపడే దశలో ఉన్న ఒక షాపుకు కొత్త తలుపులు తెరవొచ్చు.
ఇక్కడ ఇంకో ఆసక్తికరమైన విషయం ఉంది. అనుష్క శర్మ ఆ పోస్టు పెట్టినప్పుడు ఆమె ఒక వ్యాపార ప్రకటన చేయలేదు. తన భర్తకు నచ్చిన చోలే భటూరే ఎక్కడ దొరికిందో చెప్పాలనుకుంది. కానీ ఆమె పేరు, ఆమె ఫాలోవర్లు, ఆమె పెట్టిన ఒక్క పోస్టు ఆ చిన్న వ్యాపారానికి చేరువైన ప్రచారం.. లక్షలు ఖర్చు పెట్టినా దొరకని ప్రచారంగా మారింది. ఇదే సోషల్ మీడియా అసలు పవర్‌.
సోషల్ మీడియాలో మనం పెట్టే ప్రతి పోస్ట్ ఎవరో ఒకరి జీవితాన్ని మార్చేస్తుందని కాదు… కానీ ఎవరి పోస్ట్ ఎప్పుడు ఎవరి జీవితాన్ని మార్చేస్తుందో మాత్రం మనకు తెలియదు…
Share this Article