.
Subramanyam Dogiparthi …….. కొరికేస్తా కొరికేస్తా అనే బుల్లిరాజు డైలాగ్ ఇప్పుడు పాపులర్ అయింది . కొరుకుతా అనే డైలాగ్ ఈ సినిమాలో 1981 లోనే జయప్రద చేత పలికించారు . ఊళ్ళో పెంకిఘటంగా ఇష్టారాజ్యంగా ప్రవర్తించే ఊరు మోతుబరి కూతురు జయప్రద ఊత పదం అది .
కృష్ణ- రాఘవేంద్రరావు కాంబినేషన్లో 1981 సంక్రాంతి సీజన్లో విడుదలయిన సూపర్ హిట్ మూవీ ఈ ఊరుకి మొనగాడు . రొటీన్ కక్షసాధింపు కధ అయినా పూర్తి గ్రామీణ వాతావరణంలో బావామరదళ్ళ సవాళ్లు , సరదా ముచ్చట్లతో చక్కటి ఫీల్ గుడ్ మూవీగా మలిచారు రచయిత సత్యానంద్ , దర్శకుడు రాఘవేంద్రరావు .
Ads
1977 లో వచ్చిన దివిసీమ ఉప్పెనను , ఆనాటి ఫొటోలను సినిమాలో బాగా ఉపయోగించుకున్నారు . అలాగే చంద్రమోహన్ , అతని మరదలు రాజ్యలక్ష్మి ప్రేమాయణం , వరద బాధితుల సహాయ కార్యక్రమాలకు హీరోతో పాటు వెళ్ళి అక్కడ కలరా వచ్చి చనిపోవటం , తల్లి నిర్మలమ్మ అందుకు ఖిన్నురాలు కాకుండా , గర్వపడుతున్నానని చెప్పటం చాలా బాగా రక్తి కట్టించారు .
కృష్ణ- జయప్రద జోడీ కూడా బాగా వర్కవుట్ అయింది . ఇద్దరినీ రాఘవేంద్రరావు బాగా అందంగా చూపారు . ఇద్దరూ హుషారుగా , అల్లరల్లరిగా సందడి చేస్తారు . చక్రవర్తి సంగీత దర్శకత్వంలో పాటలన్నీ చాలా శ్రావ్యంగా ఉంటాయి . రాఘవేంద్రరావు పాటల చిత్రీకరణ తెలిసిందే కదా !
ఇదిగో తెల్లచీరె ఇవిగో మల్లెపూలు సూపర్ హిట్ సాంగ్ . వేటూరా మజాకా ! ఆరుద్ర వ్రాసిన కదలి రండి మనుషులైతే అంటూ సాగే ఉప్పెన విరాళాల సేకరణ , సహాయ కార్యక్రమాల పాట కూడా సినిమాకు హైలైటే .
మిగిలిన అన్ని పాటలు కూడా శ్రావ్యంగా ఉండటమే కాకుండా బయటా హిట్టయ్యాయి .
మొగ్గ పిందేసిందే పాటలో రాఘవేంద్రరావు మార్క్ కుండలు , ముద్దుగుమ్మల బృంద నృత్యం సాక్షాత్కరిస్తాయి . చాలా అందంగా ఉంటుంది ఈ పాట చిత్రీకరణ . జయప్రదతో పాటు సమానంగా కృష్ణ నృత్యించడానికి బాగా కష్టపడతాడు .
ఈ సినిమా అంతా రామచంద్రాపురం దగ్గరి ఊళ్ళ అనే గ్రామంలో షూట్ చేయబడింది . లొకేషన్ల అందం కూడా సినిమా విజయానికి దోహదపడ్డాయి . కృష్ణ , జయప్రద , గీత , ప్రసాద్ బాబు , చంద్రమోహన్ , రాజ్యలక్ష్మి , రావు గోపాలరావు , అల్లు రామలింగయ్య , కాంతారావు , పుష్పలత , ఝాన్సీ , మాడా , నిర్మలమ్మ , ఆనందమోహన్ , చలపతిరావు , గ్రామస్తులు నటించారు .
ఈ సినిమాలో అల్లు రామలింగయ్య డైలాగుల్లో ఆంధ్రప్రదేశ్ లోని చాలా ఊళ్ళ పేర్లను దూర్చారు . మా గుంటూరు జిల్లాలోని ఫిరంగిపురం , పల్నాడు జిల్లాలోని సత్తెనపల్లితో సహా .
పద్మాలయా బేనర్లో హిందీలో జితేంద్ర , శ్రీదేవిలతో హిమ్మత్ వాలా పేరుతో రాఘవేంద్రరావు దర్శకత్వంలోనే తీస్తే అక్కడా బాగా హిట్టయింది . శ్రీదేవి హిందీ ఫీల్డులో నిలదొక్కుకోవటానికి ఇది ఊతమిచ్చింది .
ఏడు సెంటర్లలో వంద రోజులు , షిఫ్టులతో కొన్ని సెంటర్లలో సిల్వర్ జూబిలీ , విజయవాడ , హైదరాబాద్ , వైజాగులలో రెండు వందల రోజులు ఆడింది . శ్రీదేవి తల్లి మా గుంటూరు జిల్లా రైట్సుని 3.2 లక్షలకు కొనుక్కుని మంచి లాభాలనే గడించిందట .
సినిమా యూట్యూబులో ఉంది . ఇంతకుముందు చూడని కృష్ణ , జయప్రదల అభిమానులు తప్పక చూడతగ్గ అందమైన సినిమా . A watchable , entertaining , neat , musical , feel good movie . #తెలుగుసినిమాలసింహావలోకనం #తెలుగుసినిమాలు
Share this Article