బ్రిటన్‌లో ఓ గుడి కాంప్లెక్స్‌ను మసీదు కోసం అమ్మేశారు!

.

బ్రిటన్, పీటర్‌బరోలో హిందూ ఆలయ భవనాన్ని ముస్లిం సంస్థకు విక్రయించిన వివాదం…: కోర్టుకెక్కిన వ్యవహారం

బ్రిటన్‌లోని పీటర్‌బరో నగరంలో దశాబ్దాలుగా ఉన్న ఏకైక హిందూ ఆలయానికి చెందిన కాంప్లెక్స్‌ను, స్థానిక ముస్లిం సంస్థకు విక్రయించాలని నగర కౌన్సిల్ తీసుకున్న నిర్ణయం తీవ్ర వివాదాస్పదమైంది. ఈ వ్యవహారంపై దాఖలైన పిటిషన్‌ను పీటర్‌బరో సిటీ కౌన్సిల్ హైకోర్టులో సమర్థించుకుంది.

వివాదం ఏమిటి? పీటర్‌బరోలోని ‘న్యూ ఇంగ్లాండ్ కాంప్లెక్స్’లో 1986 నుండి ‘భారత్ హిందూ సమాజ్’ (BHS) ఆలయాన్ని నిర్వహిస్తోంది. అయితే, ఈ స్థలాన్ని ‘యుకె ఇస్లామిక్ మిషన్’ (UKIM)కు విక్రయించి, అక్కడ మసీదు, ఇస్లామిక్ సెంటర్‌ను నిర్మించాలని ఈ ఏడాది ఫిబ్రవరిలో కౌన్సిల్ నిర్ణయం తీసుకుంది. దీనిని హిందూ సంఘం తీవ్రంగా వ్యతిరేకిస్తోంది.

కౌన్సిల్ వాదన: హైకోర్టులో కౌన్సిల్ తరపున వాదించిన బారిస్టర్ కేథరీన్ రోలాండ్స్ మాట్లాడుతూ, ఈ నిర్ణయం కేవలం ఆర్థిక, చట్టపరమైన కారణాలతోనే తీసుకున్నామని, ఇందులో వివక్ష లేదని స్పష్టం చేశారు.

• “35 మైళ్ల పరిధిలో వారికి ఉన్న ఏకైక ఆలయం కోల్పోతున్నారనే కారణంతో కౌన్సిల్ నిర్ణయం చట్టవిరుద్ధం కాబోదు” అని ఆమె వాదించారు.

• మతపరమైన కమ్యూనిటీల ప్రయోజనాలను పరిగణనలోకి తీసుకోవాల్సిందే తప్ప, అవే నిర్ణయాధికారాన్ని శాసించవని ఆమె పేర్కొన్నారు.

• ఆర్థిక ఇబ్బందుల్లో ఉన్న కౌన్సిల్‌కు నిధుల అవసరం ఉందని, అందువల్లే అత్యధిక బిడ్ వేసిన సంస్థకు విక్రయించామని వివరించారు.

ఆర్థిక అంశాలు: సుమారు పదేళ్లుగా ఆ భవనాన్ని కొనుగోలు చేయడానికి భారత్ హిందూ సమాజ్ ప్రయత్నిస్తోంది. వేలం ప్రక్రియలో UKIM సంస్థ 1.4 మిలియన్ పౌండ్లు (సుమారు రూ. 18 కోట్లు) చెల్లించేందుకు ముందుకు రాగా, భారత్ హిందూ సమాజ్ 9 లక్షల పౌండ్లు, సామాజిక సేవల ప్యాకేజీని ఆఫర్ చేసింది. ఎక్కువ డబ్బు రావడంతో కౌన్సిల్ UKIM వైపు మొగ్గు చూపింది.

కోర్టులో హిందూ సంఘం: ఈ నిర్ణయాన్ని సవాలు చేస్తూ భారత్ హిందూ సమాజ్ ‘జ్యుడీషియల్ రివ్యూ’ కోరింది. ఆ ఆలయాన్ని కోల్పోతే వేలాది మంది హిందువులు ఆరాధనా స్థలాన్ని, కమ్యూనిటీ కేంద్రాన్ని కోల్పోతారని ఆవేదన వ్యక్తం చేస్తోంది. తమ ఆలయ భవనాన్ని కాపాడుకునేందుకు న్యాయపోరాటం చేస్తోంది.

.

(ఈ భవనం కౌన్సిల్ వారిదే. ‘భారత్ హిందూ సమాజ్’ (BHS) దశాబ్దాలుగా దీనిని అద్దెకు తీసుకుని ఆలయంగా నిర్వహిస్తోంది… భారత్ హిందూ సమాజ్ దీనిని వ్యతిరేకిస్తూ కోర్టులో జ్యుడీషియల్ రివ్యూ కోరడంతో, ఈ విక్రయ ప్రక్రియ ప్రస్తుతం కోర్టు పరిధిలో ఉంది…జ)

Source :: https://www.news18.com/world/not-unlawful-uk-council-defends-sale-of-temple-site-to-muslim-group-for-mosque-ws-l-10209463.html