బోనం అంటే..? తెలంగాణ విశిష్ట సంస్కృతికి ప్రతీక… ఇది చదివితే సమజైతది…

బోనం అంటే భువనం !

సకల ప్రాణికోటికి మూలస్థానం !!

బోనం అంటే వట్టి మట్టికుండే. కానీ అది నిండుకుండ.

బోనం ఒక పూర్ణకుంభం. బోనం ఒక బ్రహ్మాండబాండం.

బోనం ఒక ధాన్యాగారం. బోనం ఒక ధనాగారం.

బోనం సృష్టికి ప్రతిసృష్టిచేసే ఒక మాతృగర్భం… !!

పసుపన్నం కావచ్చు, పరమాన్నమే కావచ్చు,

బెల్లపునీళ్లో పసుపునీళ్లో నింపిన ఘటమో కావచ్చు

కానీ బోనమంటే ఆహారరూపంలోని ఒక సఫలతాశక్తి…!!

మన పచ్చని ప్రకృతి అర్థనారీశ్వరమయం !

తాండవమో లాస్యమో ఆదిదంపతులకు అదేకదా ప్రీతి.

అభినయంలో ప్రథమం ఆంగికం… ఇదేమరి భువనం.

భువనం అంటే దివారాత్రులు పుట్టిపెరిగేది కదా.

అనునిత్యం చలనంలో,గమనంలో ఉండేదికదా.

మరి అది ప్రకృతిపరమైన ఆది పరాశక్తే కదా.

ఏ శక్తికైనా మౌలికమైన బలం ఆహారమే కదా.

ఆహారమంటే ఒక ప్రపథమ సఫలతా శక్తేగదా.

సమస్త సఫలతా శక్తులకు—

మాతృశక్తి,, అన్నమేనని ప్రకటించే సందర్భం…

కొండంత ప్రకృతిశక్తికి – కుండంత కృతజ్ఞతే బోనం…!!

అమ్మ సర్వసాత్విక.. అందుకే పిల్లలతొట్లెలు.

అమ్మ ఆగ్రహరూపిణి.. అందుకే అంబల్లు, ఉల్లిగడ్డలు.

అమ్మ క్రిమినాశిని…అందుకే పసుపు, ఎల్లిగడ్డలు,వేపాకులు.

అమ్మ అన్నపూర్ణ… అందుకే ఆహారనివేదనలు.

అమ్మ శాకాంబరి… అందుకే పచ్చగూరలు,గుమ్మడికాయలు.

అమ్మ బలవర్ధకి… అందుకే పలారాలు, చమిలిముద్దలు.

అమ్మ కటాక్షప్రసాదిని… అందుకే వెయికండ్ల కుండలు.

అమ్మ వృద్ధికారిణి.. అందుకే రాట్నాల బహుమానాలు.

అమ్మ సకల చరాచరసృష్టికి సమస్తప్రసాదిని…

అందుకేగదా గండచిలుకలూ,చెంఢ్లూ, ఇండ్లూ, బండ్లూ…!!

ప్రకృతిలో ముడిబడ్డదే మన మౌలికమైన సంస్కృతి.

అర్థంచేసుకుంటే గనుక అనంతమైన విస్తృతి.

అపార్థమే గొప్పదనుకుంటె అంతులేని వికృతి.

ఇది కల్లాకపటం తెలియని వట్టి ఎడ్డిమాలోకం.

చేరదిస్తే చంకనెక్కుద్ది…దూరంకొడితే పారిపోద్ది

చేసుకున్నవాళ్లకు చేసుకున్నంత…!!

~~~~~~~••~~~~~~~

బోనంల ఏముంటదన్నది అందరికీ పెద్ధ ఆసక్తిగదా !

మాకు బోనం అంటె బెల్లంవేసి వండిన పరమాన్నమే.

వట్టి పసుపన్నం వండుతరు. పప్పులుగం వండుతరు.

వట్టి తెల్లన్నం వండుతరు. లేదంటే పసుపునీళ్లే నింపుతరు.

బోనంమీదికి కలెగలుపు అన్నితీర్ల కాయగూర వండుతరు.

కొందరు కలెగలుపుగ ఆకుకూరలేసి పచ్చగూర వండుతరు.

పచ్చిపులుసు చేస్తరు. ఉల్లిగడ్డలు మిరుపకాయ నివేదిస్తరు.

మా ఇండ్లల్ల బోనమంటే.. పరమాన్నమే ! ఇగో, అదే ఇది…!! — డా. మట్టా సంపత్కుమార్ రెడ్డి