మరి మా బతుకుల గోస ఎవరు వినాలె కేటీయార్ సార్..?

మా గోస వినుర్రి సర్..
గౌరవనీయ తెలంగాణ రాష్ట్ర మంత్రి కేటీఆర్ గారూ..
• తెలంగాణ విద్యుత్ శాఖలో ఆర్టిజన్లుగా పనిచేస్తున్న మా బతుకు గోసను జర వినుర్రి సర్.
• ఉద్యమాలతో పోరాడి సాధించుకున్న మన తెలంగాణ రాష్ట్రంలో.. మాలాంటి కింది స్థాయి కార్మికులు పడుతున్న కష్టాలను పెద్ద మనసుతో అర్థం చేసుకోర్రి సర్.

• తెలంగాణ రాంగనే ముఖ్యమంత్రి సారు మమ్మల్ని రెగ్యులర్ చేస్తామని చెబితే నమ్మినం సర్. కానీ రూల్స్ అడ్డుపడుతున్నయని మమ్మల్ని ఆర్టిజన్లుగా మార్చిండ్రు సర్.
• ప్రభుత్వమేమో మమ్మల్ని పర్మనెంట్ చేసినమని చెప్తుంటే.. మేమిప్పటికీ తాత్కాలిక ఉద్యోగులమేనని విద్యుత్ సంస్థలు అంటున్నయి సర్.
• ఈ గోసను మేమెవరికి చెప్పుకోవాలి సర్.

• ప్రాణాలకు తెగించి ఇరవై నాలుగ్గంటలు విధులు నిర్వహిస్తున్న మాపై ఎందుకు సర్ ఇంత చిన్నచూపు.
• తోటి కార్మికులు కరెంట్ స్తంభాలపై నుంచి కిందపడి ప్రాణాలు కోల్పోతుంటే, కొన్నిరోజుల వరకు మా గుండెలు ఎట్లా కొట్టుకుంటున్నయో తెలుసా సర్.

• పొద్దున ఆఫీసుకు పోతే, సాయంత్రం ఇంటికి క్షేమంగా వస్తామన్న గ్యారెంటీ లేని బతుకులు సర్ మావి.
• అలాంటి మాపై చిన్నచూపు ఎందుకు సర్.

• పెరుగుతున్న ఖర్చులకు మాకొచ్చే జీతాలు సరిపోక అవస్థలు పడుతున్నం సర్.
• ‘మీకేంది.. కరెంటోళ్లువయా.. మస్తు జీతాలు వస్తయ్’ అని అందరు అంటుంటే మా కష్టాలను ఇంకెవరికి చెప్పుకోవాలో అర్థం అయితలేదు సర్.
• మా బతుకుల్లో వెలుగునింపమని ఎవర్ని అడగాలి సర్.

• ఉద్యమాల గడ్డపై పుట్టిన మాకు ఉద్యమం చేసే అవకాశం, హక్కులు లేవా సర్.
• సమ్మె చేస్తామంటే ఉద్యోగాలే ఉండవని బెదిరిస్తున్నరు. ఇదెక్కడి అన్యాయం సర్.
• విద్యుత్ సంస్థల సీఎండీలతో కాకుండా.. ఒక్కసారి మా బతుకుల్లోకి తొంగిచూడుర్రి సర్. మాతో మాట్లాడుర్రి సర్. మా కష్టాన్ని కళ్లారా ఒక్కసారి చూడుర్రి సర్.

• ప్రాణాలకు తెగించి మేము చేస్తున్న పనికి.. మాకొచ్చే జీతాలను ఒక్కసారి పక్కపక్కన పెట్టి చూడుర్రి సర్. మా జీవితాల్లో వెలుగులు నింపుర్రి సర్.
ఇట్లు,
— ఆవేదనతో ఆర్టిజన్ కార్మికుడు.