.
Subramanyam Dogiparthi ….. కృష్ణ- పరుచూరి బ్రదర్స్ మరో ప్రభంజనం ఈ ప్రజారాజ్యం సినిమా . మరో ఈనాడు సినిమా అని చెప్పవచ్చు . దాని కన్నా బాగుంటుందేమో ! అందులో హీరోయిన్ , డ్యూయెట్లు లేవు . ఇందులో పుష్కలం .
ఈనాడు ప్రజాస్వామ్యం , పార్టీ ఫిరాయింపులు వంటి అంశాల మీదయితే ఈ ప్రజారాజ్యం గ్రామీణ నేపధ్యంలో రైతు సమస్యలు , గిట్టుబాటు ధరలు , సమిష్టి వ్యవసాయం , రైతు కూలీల ఇక్కట్లు , బూర్జువాలు వ్యాపారస్తుల కుమ్మక్కులు వంటి సమస్యలతో ఉమ్మడి కుటుంబాల అపార్ధాలు అనర్ధాలను మిళితం చేసి కృష్ణ కోసమే కధను నేసారు పరుచూరి బ్రదర్స్ . కధకు , కృష్ణకు తగ్గట్టుగా డైలాగ్సుని సానబెట్టారు .
Ads
కృష్ణ అమ్మ గారి పేరు మీద తీసిన ఈ సినిమా ఘన విజయానికి ముఖ్య కారణం పరుచూరి బ్రదర్సే . కృష్ణ సోదరుడు హనుమంతరావు స్క్రీన్ ప్లేని తయారు చేసారు . యం మల్లిఖార్జునరావు దర్శకుడు . జె రాఘవులు సంగీత దర్శకత్వంలో పాటలన్నీ సూపర్ హిట్ .
పాటల కన్నా గొప్పగా చెప్పుకోవలసింది నృత్య దర్శకుడు శ్రీనివాస్ గురించి . కృష్ణ , జయప్రదల డ్యూయెట్లలో వాళ్ళిద్దరి డాన్సుల్ని కృష్ణ అభిమానులు కేరింతలు కొట్టేలా కంపోజ్ చేసాడు .
జయప్రద , కృష్ణల డ్యూయెట్లు చూస్తుంటే యన్టీఆర్, జయప్రదల యమగోల గుర్తుకొస్తుంది . జయప్రదకు యన్టీఆర్ సినిమా రంగంలో లేని లోటును కృష్ణ భర్తీ చేసాడు . డ్యూయెట్ల షూటింగ్ అయిపోయాక ఇంటికెళ్ళి కాపు పెట్టించుకుని ఉంటుంది బిడ్డ .
వేటూరి పాటలు కదా ! అలాగే ఉంటుంది . ఒంటరి తుంటరి కుర్రదానా , అమ్మాయీ అమ్మాయీ కోకంతా గొడవాయె రెయికంతా బిగువాయె పాటల్లో ఇద్దరు విజృంభించారు .
ప్రత్యేకంగా చెప్పుకోవలసిన గ్రూప్ డాన్స్ ఒకటుంది . గోపాలుడొస్తే గోపమ్మె నవ్వె రేపల్లె వీధుల్లో పాట . రాఘవేంద్రరావు తీసాడా అనే అనుమానం వస్తుంది . డా నెల్లుట్ల వ్రాసిన ఎర్ర పాట కదలండి కదలండి క్లైమాక్సులో బాగుంటుంది .
ఈ సినిమాలో దొంగల దోపిడి అని ఒక సన్నివేశం ఉంటుంది . చాలామందికి తెలియదు . దేవాలయాల్లో ఉత్సవాలప్పుడు అర్చక స్వాములు , తిరుణాళ్ళల్లో గ్రామాల్లో వరసయిన వాళ్ళు ఆడుతుంటారు . దాన్ని ఈ సినిమాలో పెట్టాలనే ఆలోచన వచ్చినందుకు పరుచూరి బ్రదర్సుని అభినందించాలి .
ఇదే కాదు . చాలా మౌలికమైన ఆర్ధిక రంగ అంశాలను కూడా లేవనెత్తారు . Mechanisation vs Manpower . ఇండియాను అమెరికా , రష్యాల జనాభా విస్తీర్ణాలతో పోలుస్తూ కృష్ణ డైలాగ్స్ ఆలోచింప చేస్తాయి . ఆ రోజులకు సూటయ్యే డైలాగులు .
ఉమ్మడి కుటుంబాల అపార్ధాల మీద ఎన్ని సినిమాలు వచ్చాయో లెక్కే లేదు . ఈ సినిమాలో మనసుకు హత్తుకు పోయేలా చూపించారు . రామలక్ష్మణులు లాంటి అన్నదమ్ములుగా సత్యనారాయణ , ప్రభాకరరెడ్డిలు , వాళ్ళ సంతానంగా శ్రీధర్ , కృష్ణ , సత్యకళ , గిరిబాబు , రాజ్యలక్ష్మిలు నటించారు . సత్యనారాయణ నటనను మెచ్చుకోవాలి . ప్రభాకరరెడ్డి భార్యగా అన్నపూర్ణ నటించింది .
వీళ్ళకు బావగా , ఫ్యూడలిస్టుగా , విలనాసురుడిగా రావు గోపాలరావు నటన గురించి చెప్పాల్సిన అవసరం లేదు . ఆయన భార్యగా కాకినాడ శ్యామల , సంతానంగా నూతన్ ప్రసాద్ , ప్రతాప్ పోతన్ , జయప్రదలు నటించారు . కోడలిగా కె విజయి నటించింది . ఊరికి శకునిగా అల్లు రామలింగయ్య , ఇతర పాత్రల్లో రమణమూర్తి , చలపతిరావు , రాజా ప్రభృతులు నటించారు .
విజయలలిత , జయమాలినిల డాన్సులు బాగుంటాయి . చాలా గేప్ తర్వాత విజయలలిత కనిపిస్తుంది ఈ సినిమాలో అప్పట్లో కూడా . ఫుల్ గరం మసాలా ఎర్ర సినిమా 1983 సెప్టెంబర్లో వచ్చిన ఈ ప్రజారాజ్యం సినిమా యూట్యూబులో ఉంది .
ఇంతకుముందు చూసి ఉన్నా మళ్ళా చూడొచ్చు . అస్సలు బోరించదు . జయప్రద , కృష్ణల జోడీ చాలా అందంగా ఉంటుంది . పాటల్ని అస్సలు మిస్ కాకండి . #తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article