ప్రతి సినిమా ప్రేమనగర్ కాదు… ప్రేమాభిషేకం కూడా కాలేదు…

.

Subramanyam Dogiparthi …… ఎయన్నార్- దాసరి- రామానాయుడు కాంబినేషన్లో 1981సెప్టెంబర్ 24 న వచ్చిన ఈ ప్రేమ మందిరం సినిమా ప్రేమనగర్ , ప్రేమాభిషేకం సినిమాల్లాగా బ్లాక్ బస్టర్లు కాకపోయినా వంద రోజులు ఆడింది .

అదృష్టవశాత్తూ సినిమాలో హీరోహీరోయిన్లను చంపలేదు . చంపి ఉంటే ఈ వంద రోజులు కూడా ఆడేదే కాదు . దాసరి మార్క్ సినిమా . యన్టీఆర్ మనుషులంతా ఒక్కటే ఛాయ కాస్త కనిపిస్తుంది . కధాంశం వేరు .

శుధ్ధోధన మహారాజు మనుషుల కష్టాలు తెలవకుండా ఉండటానికి సిద్దార్ధుడిని అంతఃపురానికే పరిమితం చేసినట్లు ఈ సినిమాలో జమీందారు గారు మనమడిని లోకంలోని ఆకర్షణలకు లోనుకాకుండా ఉండేందుకు దివాణం దాటనివ్వడు . బయట ప్రపంచాన్ని చూడాలని బయటపడ్డ హీరో దేవదాసి హీరోయిన్ అందానికి , నాట్య నైపుణ్యానికి ఫిదా అయిపోయి ప్రేమించేస్తాడు .

తాతను ఎదిరించి దేవదాసి మధురని పెళ్ళి చేసుకుంటాడు . తండ్రి దివాణానికి తీసుకుని వెళతాడు . కొత్త జంటను చంపేయమని జమీందారు ఆర్డర్ వేస్తాడు . హీరో తండ్రి కొత్త జంటకు ఇవ్వవలసిన విషాన్ని తాను , తన పెద్ద జమీందారు తండ్రి తాగే పాలల్లో కలుపుతాడు . హీరో తండ్రి , తాత చనిపోతారు . ఈ ముగింపును మాత్రం తప్పక మెచ్చుకోవాలి . ఏ బాలచందరో దాసరిని ఆవహించలేదు . రామానాయుడు ఒప్పుకోడనుకోండి . నవలలోని ముగింపునే మార్చాడు ప్రేమనగర్లో ఆయన .

మొత్తం మీద సినిమా బాగానే ఉంటుంది . ఎయన్నార్ తండ్రీకొడుకులుగా ద్విపాత్రాభినయం , జయప్రద అందాలు , నృత్యాలు , కె వి మహదేవన్ సంగీతం , దాసరి ఆఫ్ బీట్ ఫ్యూడల్ వ్యతిరేక ఆలోచనా విధానం సినిమాను గట్టెక్కించాయి . వేటూరి , సి నారాయణరెడ్డి , ఆరుద్ర వ్రాసిన పాటల్ని ప్రత్యేకంగా మెచ్చుకోవలసిందే .

చంద్రోదయం , ప్రేమ మందిరం ఇదే ప్రేమ మందిరం , తొలిసారి పలికెను హృదయం పాటల్లో జయప్రద నృత్యాలు సినిమాకు హైలైట్ . మొదటి రెండు పాటల్ని వేటూరి వ్రాస్తే , మూడో పాటను సి నారాయణరెడ్డి వ్రాసారు . వేటూరి వ్రాసిందే మరో పాట మా ఇంటి అల్లుడా మాపటేల గిల్లుడా అంటూ మూడు తరాల దేవదాసిలు నిర్మలమ్మ , సూర్యకాంతం , రాజసులోచనల డాన్స్ ప్రేక్షకులకు కాస్త ఎబ్బెట్టుగా సాగుతుంది.

దాసరి వ్రాసిన క్లైమాక్స్ సాంగ్ అమరం అమరం మన కధ అమరం బాగుంటుంది . ఎయన్నార్ , జయప్రదలు నటించిన సినిమా పేర్లతో సాగే పాట ‘ఎప్పుడో ఎక్కడో చూసినట్లు ఉన్నది’ సరదాగా ఉంటుంది . ఆరుద్ర వ్రాసారు .

వేటూరి వ్రాసిందే మరో పాట ఆటా తందానతాన పాటా ఎయన్నార్ , దాసరి అద్దాలమేడ సినిమా హీరోయిన్ అంబికల మీద కూడా బాగుంటుంది . ఈ సినిమా ఆడటానికి ముఖ్య కారణం పాటలు , సలీం నృత్య దర్శకత్వం అనే చెప్పాలి . మనుషులంతా ఒక్కటేలో కనిపించిన బెంగుళూరు పెలస్ మళ్ళా ఈ సినిమాలో కనిపిస్తుంది . బ్రిటిష్ ఇండియా కధ కాబట్టి ఈ పేలస్ అవసరమే .

గుమ్మడి , జగ్గయ్య , సత్యనారాయణ , అల్లు రామలింగయ్య , నగేష్ , చలం , పి జె శర్మ , రావి కొండలరావు , శ్రీధర్ , బాలకృష్ణ (అంజి గాడు) , గీత , రమాప్రభ ప్రభృతులు నటించారు . సినిమా , పాటల వీడియోలు యూట్యూబులో ఉన్నాయి . ఇంతకుముందు చూడని ఎయన్నార్ , జయప్రద అభిమానులు చూడవచ్చు . చూడబులే . #తెలుగుసినిమాలసింహావలోకనం #సినిమా_కబుర్లు #తెలుగుసినిమాలు