కృష్ణ , శోభన్ బాబులు పోటాపోటీగా తమ నటనతో అదరకొట్టిన సినిమా 1973 లో వచ్చిన ఈ పుట్టినిల్లు మెట్టినిల్లు సినిమా . అసలు టైటిలే అదిరిపోయింది . ముఖ్యంగా మహిళల సెంటిమెంటును పురిగొల్పి , వాళ్ళ ఆదరణ పొందిన సినిమా . శోభన్ బాబు , కృష్ణలు కలిసి నటించిన ఆరో సినిమా ఇది .
టైటిల్సులో ఎవరి పేరు ముందు వేయాలి అనే తర్జనభర్జనలతో , పేర్లు వేయకుండా ఇద్దరి ఫొటోలు పెట్టేసారు . తమిళంలో సక్సెస్ అయిన పుగంద వీడు అనే సినిమాకు రీమేక్ మన తెలుగు సినిమా . చెల్లెలు సెంటిమెంటుతో శోభన్ బాబు , తల్లి సెంటిమెంటుతో కృష్ణ చాలా గొప్పగా నటించిన సినిమా . శుచి , శుభ్రతల obsession తో సతమతమయ్యే కలవారి అమ్మాయిగా లక్ష్మి , పేద కుటుంబంలో పుట్టి సర్దుకుపోయే మనస్తత్వం కల అమ్మాయిగా చంద్రకళ బాగా నటించారు .
శోభన్ బాబు తల్లిగా మహానటి సావిత్రి , కృష్ణ లక్ష్మిల తండ్రిగా , కుష్టు వ్యాధి మనిషిగా నాగయ్యల నటన చెప్పేదేముంది ! Veterans . కుండ మార్పిడి పెళ్ళిళ్ళు మా చిన్నప్పుడు బాగానే ఉండేవి . అప్పట్లో పెళ్ళిళ్ళు ఎక్కువగా బంధువుల మధ్యే జరుగుతుండేవి . మేనరికం వంటి ఆచారాలు , నమ్మకాలు ఉండటం వలన ఈ కుండ మార్పిడి పెళ్ళిళ్ళు విస్తృతంగా ఉండేవి .
Ads
అక్కడ మెగుడు కొడితే , ఇక్కడ మెగుడు కూడా కొట్టేవాడు . న్యూటన్స్ లా బాగా పనిచేస్తుండేది . ఇద్దరూ చక్కగా పెట్టె బేడా సర్దుకొని పుట్టిళ్ళకు చేరేవాళ్ళు . ఈ సినిమా కధ కూడా అదే , అంతే .
సత్యం సంగీత దర్శకత్వంలో బాల సుబ్రమణ్యం పాడిన ఇదే పాటా ప్రతీ చోటా ఇలాగే పాడుకుంటాను అనే పాట సూపర్ హిట్టయింది . అలాగే సిరిమల్లె సొగసూ జాబిల్లి మనసూ , చిన్నారి కన్నయ్యా నా ఆశ నీవయ్యా , అహా బోల్తా పడ్డావు బుజ్జి నాయనా పాటలు కూడా హిట్టయ్యాయి . సిరిమల్లె సొగసు పాట కూడా చాలా శ్రావ్యంగా ఉంటుంది .
ఈ సినిమాలో తప్పక మెచ్చుకోవలసింది యన్ ఆర్ నంది డైలాగ్స్ . చాలా పదునుగా , పొదుపుగా ఉంటాయి . యస్ పట్టు దర్శకత్వంలో ప్రతిష్టాత్మమైన AVM బేనర్లో వచ్చింది . మళయాళంలో సింధు అనే టైటిల్ తో రీమేక్ చేసారు . లక్ష్మి మూడు భాషల్లోనూ నటించగా , చంద్రకళ తెలుగు , తమిళ భాషల్లో నటించింది . వీరందరితో పాటు రాజబాబు , రమాప్రభ హాస్య జంట .
మా నరసరావుపేటలో వెంకటేశ్వర పిక్చర్ పేలసులో చూసా . రెండు మూడు సార్లు చూసినట్లు గుర్తు . యూట్యూబులో ఉంది . చక్కని సెంటిమెంటల్ , నీట్ , ఫీల్ గుడ్ మూవీ . చూసి ఉండకపోతే తప్పక చూడతగ్గ చక్కని సినిమా . బిర్రయిన స్క్రీన్ ప్లే , నీట్ డైరెక్షన్ , పదునైన మాటలు , శ్రావ్యమైన సంగీతం , తమ తమ పాత్రలకు 100% న్యాయం చేసిన నటులు , వెరశి మంచి సినిమా . #తెలుగుసినిమాలసింహావలోకనం #తెలుగుసినిమాలు……….. By డోగిపర్తి సుబ్రహ్మణ్యం
Share this Article