రేహాన్, మిరియా… ఆ కుటుంబం నుంచి అయిదో తరం కూడా రెడీ…

అయిదో తరం… ఈ దేశాన్ని సుదీర్ఘంగా ఓ హక్కులా పాలిస్తున్న కుటుంబం నుంచి అయిదో తరం రెడీ… పేరుకు గాంధీ కుటుంబంలా చెలామణీ… కానీ గాంధీలు కారు… నిజానికి నెహ్రూ కుటుంబం, ఆ పేరుతో అస్సలు చెలామణీ కారు… వాద్రా కుటుంబంగా ఎవరూ పిలవరు… గాంధీ పేరుకు భారత రాజకీయాల్లో ఉన్న డిమాండ్ అది…

ఒక నెహ్రూ… కశ్మీరీ పండిట్, హిందూ… సరే, మతం కేవలం వ్యక్తిగతం, అదేమీ వారసత్వం కాదు అనుకుందాం… ఆయన కూతురు ఇందిర ఓ పార్శీని పెళ్లిచేసుకుంది… ఆయన పెళ్లికి ముందు హిందూ మతంలోకి మారాడని అంటారు… మనది పితృస్వామ్యమే అయినా ఇందిర తను గాంధీ ఇంటిపేరుతోనే చెలామణీ అయ్యింది… తోడుగా భర్త పేరుకు కూడా గాంధీ అనే పదం వచ్చి చేరింది విచిత్రంగా… సరే, ఇదీ ఆమె వ్యక్తిగత ఇష్టమనుకుందాం…

కొడుకు పేరు రాజీవ్ గాంధీ… కానీ పెళ్లిచేసుకుంది ఓ విదేశీయురాల్ని, క్రిస్టియన్… సరే, ఆమె ఈ దేశానికి వచ్చి ఓ కోడలిగానే ఉండిపోయింది కాబట్టి మన మహిళే… కాకపోతే ఆమెకూ గాంధీ అనే పదం వచ్చి చేరింది… అనివార్యంగా, ఓ అవసరంగా… అత్త, భర్త ఉగ్రవాదానికి బలైపోయారు, విషాదమే… కానీ వారసత్వం ఆమె కొడుకు రాహుల్‌కు వచ్చి ఆలింగనం చేసుకుంది… వద్దంటే పార్టీ ఊరుకోదు, వేరే నాయకత్వమూ లేదు… ఉండనివ్వరు…

సరే, రాహుల్ మాటలు, అడుగులు, చేష్టలు ఓ ఖడ్గతిక్కన తరహా… పెళ్లి లేదు, పిల్లల్లేరు, ఏ జంఝాటమూ లేదు… మరి ఈ వారసత్వ పగ్గాల్ని అందుకుని ఉరకలు వేసేదెవరు..? పార్టీ వారికి వారసత్వ సంపదే కదా… దీనికి సమాధానం ప్రియాంక గాంధీ కాదు, వాళ్ల పిల్లలు రేహాన్, మిరాయా… నిజానికి ఆమె వాద్రా కుటుంబ కోడలు… ఐతేనేం, ఆమెకూ గాంధీ అనే ఇంటిపేరే స్థిరపరిచారు… అవసరం, అనివార్యం…

సరే, ఈ గాంధీ-నెహ్రూ-వాద్రా కుటుంబ వారసుడు రేహాన్… హిందూ, పార్శీ, క్రిస్టియన్ మతాల కలయిక తను… తనకు సంబంధించిన వార్తో, ఫోటో కనిపిస్తే సహజంగానే పాత్రికేయ ప్రాధాన్యం ఉంటుంది, జనానికి ఆసక్తికరంగానూ ఉంటుంది… శనివారం రేహాన్, మిరాయా శనివారం వోటు హక్కు వినియోగించుకున్నారు… అలా తెర మీదకు వచ్చారు… వోటేసి బయటకు రాగానే విలేఖర్ల ప్రశ్నలకు క్లుప్తంగా జవాబిచ్చాడు… ‘రాజ్యాంగాన్ని రక్షించుకోవడమే ఈ ఎన్నికల్లో ప్రధానాంశం. అందరూ బాధ్యతగా ఓటేయాలి..’ అన్నాడు… గుడ్, క్లుప్తంగా, స్ట్రెయిట్‌గా, తమ కుటుంబం కమ్ పార్టీ ప్రధాన ప్రచారాంశాన్నే తనూ ఔపోసన పట్టినట్టుగా ముక్తసరిగా చెప్పేశాడు…

అవునూ, తను ఏం చదివాడు..? యూనివర్సిటీ ఆఫ్‌ లండన్‌ లోని స్కూల్‌ ఆఫ్‌ ఓరియంటల్‌ అండ్‌ ఆఫ్రికన్‌ స్టడీస్‌ (ఎస్వోఏఎస్‌)లో ఎంఏ రాజనీతి చదివాడు… సో, రాజకీయాల్లోకి వస్తే రాజకీయాల్ని చదువుకుని ఎంటర్ కావడమే, అల్లాటప్పాగా రాడన్నమాట… గుడ్… మోడీ 2047 దాకా కలలు కంటుండవచ్చుగాక… పర్లేదు, కననివ్వండి, కానీ రేహాన్‌కు ఇప్పుడు 23 ఏళ్లే… పొలముంది, పొద్దుంది, ఉరికేంత మైదానం ఉంది… తొందరేమీ లేదు…

క్రికెట్‌ ఆడుతుండగా జరిగిన ప్రమాదంలో ఒక కంటి (ఎడమ) చూపు పోగొట్టుకున్న రేహాన్‌ కు ఫోటోగ్రఫీ మీద ఆసక్తి ఎక్కువ… సోషల్ మీడియాలో ఉన్నాడు… రాజకీయాలంటే ఆసక్తి లేదనే చెబుతుంటాడు… కానీ ఏమో ఏ అవసరం ఎలా ముంచుకొస్తుందో… రాజీవ్ గాంధీ కూడా రాజకీయాల పట్ల విముఖంగా ఉండేవాడు కదా మొదట్లో… తన కంటి చూపు గురించి రేహాన్ మంచి పరిణతితో మాట్లాడాడు ఓసారి…

‘‘ఫోటోగ్రాఫర్‌ కు ఓ కన్నుపోయినా నష్టం లేదని తర్వాత తెలుసుకున్నా… ఈ దుర్ఘటన తర్వాత ఇది నా జీవితంలో అత్యంత ముఖ్య ఘటన అని గుర్తించా… కారు నడిపేటప్పుడు కాస్త ఎక్కువ పక్కకు తిరిగి చూడాలి… రోడ్డు దాటేప్పుడు కూడా ఎక్కువ జాగ్రత్తగా ఉండాలి… అంతే… ఒక కన్నుతోనే చూసే శక్తి ఉన్నవారికి అంతకన్నా ఇబ్బంది ఏమీ ఉండదు…’’ అంటూ తాను తీసిన ఛాయాచిత్రాల ప్రదర్శన (2021 లో) సందర్భంగా రేహాన్‌ రాజీవ్‌ చెప్పాడు. (అప్పుడప్పుడూ ఈ విషయంలోనే ప్రియాంక హైదరాబాద్‌లోని ప్రముఖ ఎల్వీ ప్రసాద్ కంటి ఆసుపత్రిని సందర్శిస్తుంది… ప్యూర్ పర్సనల్… ఏ నాయకుడినీ కలవదు…)