దిక్కుమాలిన పాత్రికేయం… మన ‘‘గొప్ప’’ టీవీ యాంకర్లు నయమేమో..!!

.

అయిపోయింది … భారత జర్నలిజంలో అతిపెద్ద పేర్లలో ఒకరైన రాజ్‌దీప్ సర్దేశాయ్‌ను ఇండియాటుడే యాజమాన్యం పీకిపారేసింది, లేెకపోతే ఏమిటా పిచ్చి కూతలు..? అని మొన్నటి నుంచీ సోషల్ మీడియాలో చాలా పోస్టులు కనిపించాయి…

నిజంగా ఇండియాటుడే ఆ పనిచేసిందా…? చేయలేదు… అంటే డిడ్ నాట్, కెనాట్… అందుకే తన పేరు ఇంకా కనిపిస్తూనే ఉంది, పనిచేస్తూనే ఉన్నాడు… అంత బలహీనమైన యాజమాన్యమా..? ఇప్పుడిది మరో చర్చ…

అసలే ఉద్రిక్తతల వేళ, గతంలో ఏవో తప్పుడు సమాచారం ఇచ్చినందుకు రెండు వారాలు పక్కన పెట్టింది మేనేజ్‌మెంట్… ఓ నెల జీతం కోసేసింది… తరువాత అంతా వోకే… ఆయనకు వేరే దిక్కు లేదు, వాళ్లకూ ఆయన తప్ప వేరే దిక్కులేదు…

నిజానికి తాజాగా తనేమన్నాడు..? నిజంగానే పిచ్చి కూతలు… వీళ్లా మన జర్నలిజాన్ని శాసిస్తున్న తోపులు అని మనమీద మనమే జాలిపడేలా… అటు రిపబ్లిక్ ఆర్నబ్ ఒక ఎక్స్‌ట్రీమ్ అనుకుంటే ఇది మరీ ఎక్స్‌ట్రీమ్…

‘‘పీవోకేను పాకిస్థాన్‌కు ఇచ్చేయాలి… అదే శాశ్వత పరిష్కారం… ఇప్పటి వాస్తవాధీన రేఖనే అధికారికం చేసేయాలి… పాకిస్థాన్ ఆయుధ సంపత్తిని తక్కువ అంచనా వేయొద్దు.,. అసలే అణ్వస్త్ర దేశం అది…’’ అన్నాడు…

సోషల్ మీడియా విరుచుకుపడింది… ఇదా నీ జర్నలిజం అంటూ ఇండియాటుడే యాజమాన్యాన్ని కూడా తిట్టిపోసింది… ఇంత జరుగుతున్నా, తన వ్యక్తిగత మూర్ఖ అభిప్రాయాల్ని రుద్దుతున్నా ఆ సంస్థ నుంచి ఓ వివరణో, దిద్దుబాటో కూడా జరగలేదు…

ఒకవైపు దేశమంతా పాకిస్థాన్ దుశ్చర్యల మీద రగిలిపోతున్న వేళ… దాన్ని తక్కువ అంచనా వేయొద్దు, అది చెప్పినట్టు విందాం అని హితబోధకు దిగాడు ఆయన… పాకిస్థాన్ మొత్తం కశ్మీరాన్ని అడుగుతోంది, అది ఇండియా మీద మతయుద్ధం చేస్తుందనే కామన్ సెన్స్ కూడా లేకుండా పోయింది ఆ జర్నలిస్టుకు..?

ఇచ్చేద్దామా..? చైనా లడఖ్, అరుణాచల్ ప్రదేశ్ కావాలంటోంది, ఇచ్చేద్దామా..? దాని ఆయుధ సంపత్తి మరీ పెద్దది… ఇదెక్కడి వాదన..? రేప్పొద్దున ఖలిస్థానీ శక్తులు పంజాబ్, హర్యానా, ఢిల్లీ సహా కావాలంటారు… ఇచ్చేద్దామా..? చివరకు బంగ్లాదేశ్ కూడా పశ్చిమ బెంగాల్ మాదే అంటే..? ఇచ్చేద్దామా..?

దిలీప్ సర్దేశాయ్ అనే మాజీ క్రికెటర్ కొడుకు తను… ఇంత సుదీర్ఘ పాత్రికేయంలో తను నేర్చుకున్నది ఇదేనా..? తన భార్య సాగరిక ఘోష్ మరో ఎక్స్‌ట్రీమ్… తనూ జర్నలిస్టే… పెద్ద పెద్ద మీడియా సంస్థల్లో చేసింది… చివరకు మమత బెనర్జీ క్యాంపులో చేరి, రాజ్యసభ సభ్యురాలయింది… ఆమె కూడా సేమ్ భర్తలాగే, తన బాస్ మమతలాగే మాట్లాడుతుంది…

ఆమె ఉన్నత విద్యావంతుల కుటుంబం నుంచే వచ్చింది… తండ్రి ఐఏఎస్… దూరదర్శన్ మాజీ డీజీ… ఇద్దరు అత్తల్లో ఒకరు మాజీ రాయబారి, దౌత్యవేత్త… మరొకరు సుప్రీంకోర్టు మాజీ జడ్జి… కొడుకు డాక్టర్, బిడ్డ లాయర్… అంతటి విద్యావంతుల కుటుంబానికి చెందిన ఆమెకు, భర్తకు మాత్రం తమ నాలుకలపై మాత్రం అదుపు లేదు… ఫాఫం…!