.
Subramanyam Dogiparthi …… అనగనగా లంకానగరం అనే రాజ్యం , ఆ రాజ్యానికి రావణుడు రావు గోపాలరావు . అతనికో శకుని లాంటి అనుచరుడు అల్లు రామలింగయ్య . చాలా సినిమాల్లో లాగానే ఊరిని , గుడిని , జనాన్ని దోచేసుకుంటూ ఉంటాడు రావణుడు .
ఎవరో వస్తారని , ఊరిని రక్షిస్తాడని జనం ఎదురు చూస్తూ ఉంటారు . కోటీశ్వరుడు అయిన తండ్రి మీద శపధం చేసి తన శక్తిని నిరూపించుకోవటానికి హీరో కృష్ణ గారు భీమరాజు పేరుతో దిగిపోయి దుష్టశిక్షణ , శిష్టరక్షణ చేస్తాడు .
Ads
100% కోదండరామిరెడ్డి మార్క్ మాస్ మసాలా ఎంటర్టయినర్ . ఎనిమిది కేంద్రాలలో వంద రోజులు ఆడి హిట్టయిన ఈ సినిమా 1983 జూలై ఇరవై ఎనిమిదిన విడుదలయింది . సినిమా పేరు రామరాజ్యంలో భీమరాజు .
వసుంధర కలం పేరుతో జొన్నలగడ్డ రాజగోపాలరావు , రామలక్ష్మి దంపతులు వ్రాసిన నవల ఆధారం . సినిమానుకూలంగా కూర్పులు , చేర్పులు , మార్పులు చేసారు కోదండరామిరెడ్డి . సత్యానంద్ డైలాగుల కర్త .
చక్రవర్తి సంగీత దర్శకత్వంలో పాటలన్నీ హిట్టయ్యాయి .
కృష్ణ , అతిలోకసుందరి డ్యూయెట్లు అభిమానులకు హుషారు ఎత్తిస్తాయి . తటపట తడిసిన కోక , ఏనాడో నీకూ నాకూ వ్రాసిపెట్టాడు దేవుడు , చూపుతోనే చూడకుండా డ్యూయెట్లు బాగుంటాయి . అతిలోకసుందరిని ఇంకా అందంగా చూపారు కోదండరామిరెడ్డి . కృష్ణ కూడా చాలా హుషారుగా డాన్సులు వేసారు . చేయించాడు నృత్య దర్శకుడు సలీం .
డ్యూయెట్లు కాకపోయినా హిట్టయిన మరో రెండు పాటలు ఉన్నాయి . ఒకటి పిల్లలతో కృష్ణ పాడే పాట . కధ చెపుతాను ఊ కొడతారా ఉలిక్కిపడతారా . బాగా చిత్రీకరించబడింది . రెండోది శ్రీదేవి తన స్నేహితులతో పాడే పాట . కాబోయే శ్రీమతీ రాబోయే నీ పతీ పాట . అదీ బాగా చిత్రీకరించబడింది .
పాటలన్నీ వేటూరే వ్రాసారు . రాజ్యలక్ష్మి ఆర్ట్ పిక్చర్స్ బేనరుపై మిద్దె రామారావు నిర్మించిన ఈ సినిమాలో రావు గోపాలరావు , సత్యనారాయణ , అల్లు రామలింగయ్య , జగ్గయ్య , రాజేంద్రప్రసాద్ , చంద్రమోహన్ , సంగీత , నిర్మలమ్మ , సుత్తి జంట , చలపతిరావు , రాళ్ళపల్లి , వడివుక్కరసి , ప్రభృతులు నటించారు .
అప్పుడప్పుడే నిలదొక్కుకుంటానికి తిప్పలు పడుతున్న రాజేంద్రప్రసాదుకి మాయాబజార్లో లక్ష్మణ కుమారుడు వంటి పాత్ర లభించింది ఈ సినిమాలో . బాగానే ఉపయోగించుకున్నాడు . చంద్రమోహన్ పాత్ర అంత ప్రాధాన్యత ఉన్నది కాదు . ఆరో వేలు లాంటిది .
ఫుల్ కమర్షియల్ ఎంటర్టయినర్ అయిన ఈ సినిమా కృష్ణ అభిమానులకు , సినిమా ప్రియులకు , అతిలోకసుందరి అభిమానులను బాగా అలరిస్తుంది . ఇంతకుముందు చూసి ఉండకపోతే యూట్యూబులో ఉంది . చూడవచ్చు . #తెలుగుసినిమాలసింహావలోకనం #తెలుగుసినిమాలు #సినిమాకబుర్లు
Share this Article