ఆ మూగజీవాలూ మన కుటుంబసభ్యులే… ఆ ఉద్వేగాల్ని పట్టించిన మూవీ…

పల్లెట్టూరి మనుషులకి పట్టణాల్లో ఉండే మనుషులకి తేడా ఏంటని అడిగితే అది కచ్చితంగా ఎమోషన్స్ అని అంటాను.. పచ్చని పంటపొలాలు , పశువులు, మట్టి లో బతికేసే పల్లె జనానికి కచ్చితంగా బావోద్వేగాలు ఎక్కువే .. ప్రేమ , ఆప్యాయతలు , అనురాగాలు ఎక్కువే.. అమ్మ , అన్న , నాన్న , బావ , బాబాయి , పెద్దనాన్న , తమ్ముడు , నాయనమ్మ , ఒధిన , తాత , మరదలు ఇలా వావి వరసలు, బాంధవ్యాలు ఈనాటికీ కనిపించేది కేవలం అక్కడ మాత్రమే..

మనుషులతోమాత్రమే కాదు పశువులతోనూ ఆ బంధం ఎక్కువే .. ఊరి మీద అదే రకమైన ప్రేమ మమకారం ఉంటాయి .. అందుకే సొంత ఊరిని , అక్కడి మనుషుల్ని, చెట్లని , ఇంటిని , ఇంట్లో కోళ్లని , పెంచుకునే కుక్కల్ని వదిలి రావాలంటే బాధపడిపోతుంటారు అక్కడి మట్టి మనుషులు.. వాటితో పెనవేసుకుపోయిన బంధం అలాంటిది ..

ఫీలింగ్స్ ని పుట్టించే , అలాంటి ఫీలింగ్స్ ని దాచిపెట్టి ఉంచే మెదడులో స్పేస్ ఉంటుంది.. అందుకే వాళ్ల దగ్గర అవి నిక్షిప్తంగా ఉంటాయి.. కానీ యాంత్రిక జీవనానికి అలవాటైన మన మెదడులో ఆ స్పేస్ తక్కువే .. ఇలాంటి పల్లెటూరి నుంచి వచ్చిన ఒక దర్శకుడు అరిసిల్ మూర్తి తనతొలి సినిమాకి ఈ కథని ఎంచుకున్నాడు.. నటుడు సూర్య , జ్యోతికలు ఈ సినిమాకి ప్రొడ్యూసర్లు..మిధున్ మాణిక్యం , రమ్య పాండ్యన్ లు పాత్రధారులు ..

ఇంట్లో కన్నబిడ్డల కంటే ఎక్కువగా చూసుకునే రెండు ఎద్దులు కనిపించకుండా పోతే ఆ దంపతులు పడే బాధ ఈ సినిమాకి కథావస్తువు.. రెండు మూగజీవాలకి ఇద్దరు మనుషులకి మధ్య ఉండే బంధం ఆశ్చర్యపరుస్తుంది .. పిజా హాట్లొ పరిచయం అయి బర్గర్ కింగ్ లో పెరిగి పెద్దదై యాపిల్ స్టోర్ లో పెనవేసుకుపోయి పబ్బులో బలపడిపోయి శరీరాలు కలిసిపోయి ఆ తర్వాత ఇన్ స్టా గ్రాంలో బ్రేక్ అప్ అనే మెసేజ్ తో విడిపోయే టైపు ప్రేమ , బంధం కాదు ఇది .. స్వచ్చమైనది .. వెలకట్టలేనిది .. అమూల్యమైనది ఈ పల్లెప్రేమ ..

ఎద్దులు ఆ ఇంటికి రావడం వారితోపాటే పెరిగి పెద్దవైపోవడం ,ఆ తర్వాత వాటిని ఎవరో ఎత్తుకుపోవడం , వాటికోసం భార్యాభర్తలిద్దరూ వెదకడం ఇదే సినిమా స్క్రీన్ ప్లే.. నిజానికి సినిమా చూస్తున్నంతసేపు ఏదో పల్లెటూరికి మనం వెళ్లి అక్కడ ఉన్న ఫీలింగ్ కలుగుతుంది.. ఆ మూగజీవాల కోసం మనకీ తెలీకుండానే మన కళ్లు ఎక్కడో ఒకచోట చెమ్మగిల్లుతాయి . ఆ జీవులు దొరికినప్పుడు మనకు తెలీకుండానే ఆనందంతో గుండె కొద్దివేగంతో కొట్టుకుంటుంది.. మెదడులోంచి సంతోషాన్ని పుట్టించె హార్మోన్లు స్రవిస్తూనే ఉంటాయి .. అమెజాన్ ప్రైం లో ఉందీ సినిమా.. చూడండి..సినిమాలో ఏ ఒక్క సన్నివేశం విసుగు పుట్టించదు ..ప్రేమ పుట్టిస్తుంది మన ఊరిమీద .. అశోక్ వేములపల్లి