హిందీలో హిట్టయిన హమ్ దోనో సినిమా ఆధారంగా తెలుగులో 1975 లో వచ్చింది ఈ రాముని మించిన రాముడు సినిమా . రెండూ బ్లాక్ & వైట్ సినిమాలే . కలర్ సినిమాల విజృంభణ ప్రారంభం అయ్యాక కూడా అగ్ర నటుడు అయినప్పటికీ NTR బ్లాక్ & వైట్లో నటించటం గొప్పే . హిందీలో దేవానంద్ , నందా , సాధన నటించగా తెలుగులో NTR , వాణిశ్రీ , శ్రీవిద్య నటించారు .
హిందీ సినిమా 1961 లో తీసారు కాబట్టి రెండో ప్రపంచ యుధ్ధం నేపధ్యం తీసుకున్నారు . మనది 1974-75 సినిమా కాబట్టి భారత్-పాక్ యుధ్ధం నేపధ్యం తీసుకున్నారు . యం యస్ గోపీనాథ్ దర్శకత్వంలో వచ్చిన ఈ సినిమాకు టి చలపతిరావు సంగీత దర్శకత్వం వహించారు .
పాటలు చాలా బాగుంటాయి . దాశరధి వ్రాసిన ఇదేనా మన నీతి ఇదేనా మన సంస్కృతి పాటలో శ్రీవిద్య శాస్త్రీయ నృత్యం చాలా బాగుంటుంది . నాగేష్ మీద చిత్రీకరించబడిన ఇది నా పుట్టిన రోజు పాట కూడా బాగుంటుంది . సి నారాయణరెడ్డి వ్రాసారు . దాశరధి వ్రాసిన మరో పాట ప్రేమకు నీవే దేవుడవు రాముని మించిన రాముడివి పాట బయట కూడా హిట్టయింది .
Ads
సి నారాయణరెడ్డి వ్రాసిన ఏవో చుక్కల్లో , ఎవరిది ఈ విజయం నీదీ నాదీ మన అందరిదీ ఈ విజయం పాటలు , దాశరధే వ్రాసిన చిన్నారి నా రాణి పాటలు చాలా శ్రావ్యంగా ఉంటాయి . సుశీలమ్మ , బాలసుబ్రమణ్యం , రామకృష్ణ , మాధవపెద్ది రమేష్ పాడారు . డ్యూయెట్లని ఊటీలో షూట్ చేసారు . ఎవరిది ఈ విజయం పాట యుధ్ధరంగం నేపధ్యంలో యుధ్ధం గెలిచాక పాడే పాట . ఇద్దరు యన్టీఆర్ల మీద ఉంటుంది . బాగుంటుంది .
NTR కు ఇలాంటి సినిమాలు కొట్టిన పిండే . ద్విపాత్రాభినయం . వాణిశ్రీకి కూడా చిన్న పాత్రే . చాలా చలాకీగా నటిస్తుంది . శ్రీవిద్యకే గొప్ప అవకాశం . దర్శకుడు , ఫొటోగ్రాఫర్ బ్లాక్ & వైట్ అయినా ముగ్గురినీ చాలా అందంగా చూపించారు . సినిమా కొద్దిగా సిపాయి చిన్నయ్య లాగా ఉంటుంది . సిపాయి చిన్నయ్యలో విలన్లు ఉంటారు . ఈ సినిమాలో విధే విలన్ .
NTR , వాణిశ్రీ , శ్రీవిద్య , పండరీబాయి , త్యాగరాజు , ప్రభాకరరెడ్డి , రామదాసు , ధూళిపాళ , నాగేష్ , నిర్మలమ్మ , యస్ వరలక్ష్మి , జగ్గయ్య ప్రభృతులు నటించారు . మా నరసరావుపేటలో చూసా . టివిలో రెండు మూడు సార్లు వచ్చింది . NTR ద్విపాత్రాభినయం , వాణిశ్రీ ఉన్నది , అయినా వాళ్ళ రేంజిలో ఆడలేదు .
నిర్మాతకు , డిస్ట్రిబ్యూటర్లకు , సినిమా హాల్ వాళ్ళకీ అదృష్టం ఉండాలి . వీళ్ళల్లో ఎవరో ఒకరికి తినే రాత ఉన్నా అందరికీ డబ్బులు వస్తాయి . ఒక్కడికి లేకపోయినా అందరికీ రావు . మా చిన్నప్పుడు పెద్దోళ్ళు ఈ మాటల్ని చెపుతుండేవారు . సినిమా యూట్యూబులో ఉంది . NTR , వాణిశ్రీ అభిమానులు చూడనివారు ఎవరయినా ఉంటే చూసేయవచ్చు . చూడబులే . శ్రీవిద్య శాస్త్రీయ నృత్యం , ఇతర డ్యూయెట్లు బాగుంటాయి . #తెలుగుసినిమాలసింహావలోకనం #తెలుగుసినిమాలు……. By దోగిపర్తి సుబ్రహ్మణ్యం
Share this Article