పేరుకే హీరో కృష్ణ అఖండుడు… కానీ రియల్ హీరో మాత్రం ఓ పాము…

పహిల్వాన్లుగా సుపరిచితులు నెల్లూరి కాంతారావు , యస్. హెచ్. హుస్సేన్ నిర్మాతలు . కృష్ణ చాలా సినిమాలకు దర్శకత్వం వహించిన వి. రామచంద్రరావు ఈ సినిమాకు దర్శకుడు .ఈ సినిమాలో హీరో కృష్ణ అయితే , సెకండ్ హీరో పాము . అనగనగా ఓ కోటీశ్వరురాలు . ఎవరూ ఉండరు . చుట్టాలంతా బంగళాలోకి చేరి , ఆమె ఎప్పుడు పోతుందా , ఆస్తి వాటాలేసుకొందామా అని ఎదురు చూస్తుంటారు . ఈలోపు ఎప్పుడో ప్రేమ కోసం ఇల్లు వదలి వెళ్ళిపోయిన కూతురి పోలికలతో ఓ నాటకాలమ్మాయి కనపడటం , మనుమరాలిగా గుర్తించి ఇంటికి తెచ్చుకుందామని అనుకోవటం , ఈలోపు చుట్టాలు ముసలమ్మని చంపేయటం , హీరోయిన్ని కూడా చంపాలని అనుకోవటం , ఆమెను పాము కాపాడుతూ ఉండటం , ఇంతలో ముసలమ్మ మరిది కొడుకు హీరో రంగప్రవేశం , చుట్టాలనందరినీ ఆ పామే చంపటం , హీరో హీరోయిన్లు పెళ్ళి చేసుకోవటం టూకీగా కధ .

 

సినిమా ఆరోజుల్లో బాగానే ఆడింది . కృష్ణకు అభిమానులను పెంచింది . కధను సి. యస్. రావు అందిస్తే మాటలను మహారధి అందించారు . టి. చలపతిరావు సంగీత దర్శకత్వంలో పాటలన్నీ థియేటర్లో శ్రావ్యంగా ఉన్నా బయట పెద్దగా హిట్ కాలేదు .సినిమా ప్రారంభంలోనే హీరోయిన్ భారతి నాగకన్య నృత్య గీతం చంద్రశేఖరా రారా చాలా బాగుంటుంది . ఇతర పాటలు ఓ హంస నడకల దానా అందాల కనులదానా , ఓయమ్మో ఇంత కోపం ఎలా ఎలా తిరిగి చూడవే ఇలా , నా పేరు మల్లెమొగ్గ నాకున్నది రోజా బుగ్గ , రారా రమ్మంటే రావేల శ్రావ్యంగా ఉంటాయి . కిటికీలో నిలబడి చూసేవు న్యాయమా అనే పాటను యక్షగానం స్టైల్లో రాజబాబు , రమాప్రభలపై నాటక కంపెనీ ట్రూపుతో వెరైటీగా బాగుంటుంది . ఈ ప్రయోగానికి సంగీత దర్శకుడిని అభినందించాల్సిందే .

మాలతి , ప్రభాకరరెడ్డి , గీతాంజలి , ముక్కామల , ఛాయాదేవి , నెల్లూరి కాంతారావు , అల్లు రామలింగయ్య , కాకరాల , విజయలలిత , ఆర్జా జనార్ధనరావు ప్రభృతులు నటించారు . అప్పటికి ఇంకా టేకాఫ్ కాని రావు గోపాలరావు ఓ చిన్న పాత్రలో కాసేపు కనిపిస్తారు .

మా నరసరావుపేటలో వెంకటేశ్వర పిక్చర్ పేలసులో చూసా . టివిలో కూడా వచ్చింది . యూట్యూబులో ఉంది . చూడబుల్ సినిమాయే . కృష్ణ రాత్రింబవళ్లు కష్టపడుతున్న రోజుల్లో వచ్చిన సినిమా … #తెలుగుసినిమాలసింహావలోకనం #తెలుగుసినిమాలు #telugureels