సముద్రంపై ఇల్లు..! ఇరాన్ యుద్దం సెగకు ‘క్రూయిజ్ ప్రాజెక్ట్’ కొలాప్స్ !!

.

సముద్రం మీదే శాశ్వత నివాసం.. జీవితకాలం క్రూయిజ్‌లోనే..! చివరకు ఇంధన ఖర్చులకు బలి

ఇల్లు కొనుక్కుంటే ఒకే చోట ఉండాలి.. క్రూయిజ్‌లో ఇల్లు కొనుక్కుంటే ప్రపంచమంతా తిరగొచ్చు! ఇదే ఓ అమెరికన్ వ్యాపారవేత్త ఆలోచన. జీవితాంతం ఓడలోనే నివసించే అవకాశం అంటూ భారీ ప్రచారం. లక్షల డాలర్లు పెట్టి క్యాబిన్లు కొనుక్కున్నవారు.. సొంత ఇళ్లు, కార్లు అమ్ముకుని క్రూయిజ్ ఎక్కినవారు..

కానీ రెండేళ్లు కూడా గడవకముందే ఆ కల కూలిపోయింది. ఇంధన ధరలు పెరిగాయని సంస్థ చేతులెత్తేసింది. వందలాది మంది ప్రయాణికులను మరో దేశంలో దించేసింది. సముద్రం మీద ఇల్లు కట్టుకున్నామని సంబరపడినవారికి చివరకు నిలువ నీడ లేకుండా చేసింది. ఇదీ అమెరికాలో సంచలనం సృష్టించిన Villa Vie Residences కథ!

క్రూయిజ్‌లో ఒక ఇల్లు కొనుక్కుంటే చాలు! సాధారణంగా క్రూయిజ్ ప్రయాణం అంటే నాలుగైదు రోజులు, వారం రోజులు లేదా నెల రోజుల విహారయాత్ర. టికెట్ కొనుక్కుని ఓడ ఎక్కడం, సముద్ర అందాలు ఆస్వాదించడం, వివిధ దేశాల్లో పర్యటించడం.. తిరిగి ఇంటికి రావడం. కానీ ఈ ఆలోచనకు పూర్తి భిన్నమైన వ్యాపార నమూనాను తెరపైకి తెచ్చింది అమెరికాకు చెందిన Villa Vie Residences.

ఒకసారి క్రూయిజ్ షిప్‌లో మీకంటూ ఓ క్యాబిన్ కొనుక్కోండి. ఆ తర్వాత హోటళ్లు వెతుక్కోవాల్సిన అవసరం లేదు. ఇల్లు శుభ్రం చేసుకోవాల్సిన పనిలేదు. వంట చేసుకోవాల్సిన అవసరం లేదు. భోజనం, గది నిర్వహణ, లాండ్రీ, వినోదం.. అన్నీ ఓడలోనే. పైగా ఒకే చోట ఉండిపోకుండా ప్రపంచంలోని అనేక దేశాలు చుట్టిరావచ్చు. మీ ఇల్లే ఓడ.. మీ వీధే సముద్రం.. మీ పొరుగువారే ప్రపంచంలోని వివిధ దేశాల నుంచి వచ్చిన ప్రయాణికులు!

ఇదేదో ఊహాజనితమైన ఆలోచన కాదు. సంస్థ నిజంగానే క్యాబిన్లను విక్రయించింది. సుమారు 1.2 లక్షల డాలర్ల నుంచి అత్యంత విలాసవంతమైన క్యాబిన్లకు 8.99 లక్షల డాలర్ల వరకు ధరలు నిర్ణయించింది. అంటే భారతీయ కరెన్సీలో దాదాపు రూ. కోటి నుంచి రూ. 8 కోట్ల వరకు. కొన్ని పథకాల్లో ఓడ జీవితకాలం పాటు నివాస హక్కులు, మరికొన్నింటిలో దీర్ఘకాలిక నివాస సదుపాయాలు కల్పిస్తామని ప్రకటించింది. కనీసం 15 ఏళ్ల నివాస హామీ కూడా కొన్ని ఒప్పందాల్లో ఉంది.

అయితే క్యాబిన్ కొనుగోలుతోనే ఖర్చు అయిపోదు. ఆహారం, నిర్వహణ, ఇతర సేవలకు నెలవారీ ఫీజులు కూడా చెల్లించాలి. ఇద్దరు వ్యక్తులకు కొన్ని పథకాలలో నెలకు సుమారు 5 వేల నుంచి 6 వేల డాలర్ల వరకు ఖర్చయ్యేది.

ఇళ్లు అమ్ముకుని మరీ ఓడ ఎక్కారు! ఈ ఆలోచనకు మంచి స్పందనే వచ్చింది. పదవీ విరమణ చేసినవారు, ప్రపంచాన్ని చుట్టిరావాలని కలలు కనేవారు, ఒకే చోట స్థిరపడకుండా ప్రయాణిస్తూ జీవించాలనుకునేవారు ఈ ప్రాజెక్టుపై ఆసక్తి చూపించారు. కొందరు తమ ఇళ్లు, కార్లు, ఇతర ఆస్తులు అమ్ముకుని మరీ ఈ క్రూయిజ్‌లోకి వచ్చారు.

MV Odyssey అనే 485 క్యాబిన్ల నౌకను సంస్థ కొనుగోలు చేసి ఆధునీకరించింది. 2024 అక్టోబరులో ప్రపంచ యాత్ర ప్రారంభించింది. మూడు నుంచి మూడున్నరేళ్లలో ప్రపంచాన్ని చుట్టివచ్చి, ఆ తర్వాత కూడా నిరంతరంగా వివిధ దేశాల మధ్య ప్రయాణాలు కొనసాగించడం దీని ప్రణాళిక.

సముద్రం మీదే శాశ్వత నివాసం అనే కాన్సెప్ట్‌కు ఇది ఒక ప్రయోగం. సాధారణ పర్యాటకులకు క్రూయిజ్ అంటే విలాసవంతమైన విహారం. కానీ Villa Vie దాన్ని ఒక జీవనశైలిగా మార్చాలనుకుంది. పదవీ విరమణ తర్వాత సొంత ఇంట్లో ఒంటరిగా ఉండేకంటే, ప్రపంచమంతా తిరుగుతూ కొత్త స్నేహాలు చేసుకుంటూ జీవించవచ్చని ప్రచారం చేసింది.

మొదటి నుంచీ ఆర్థిక కష్టాలే! అయితే ఈ ప్రయాణం మొదలైనప్పటి నుంచీ అంతా సజావుగా సాగలేదు. ఓడ మరమ్మతులు, సర్టిఫికేషన్లు, ఇతర సాంకేతిక సమస్యల కారణంగా ప్రయాణం ప్రారంభం కావడంలోనే నెలల ఆలస్యం జరిగింది. ఆ తర్వాత కూడా ప్రణాళికలోని అనేక పర్యాటక ప్రాంతాలను చేరుకోలేకపోయింది. కొన్ని పోర్టులను రద్దు చేసుకుంది. ఇంధనం ఆదా చేయడానికి ప్రయాణ వేగాన్ని తగ్గించింది. కొన్ని చోట్ల ఎక్కువ రోజులు నిలిచిపోయింది.

మరోవైపు సంస్థ ఆర్థిక పరిస్థితి కూడా క్రమంగా దిగజారింది. ఓడ నిర్వహణ, సిబ్బంది జీతాలు, ఆహార సరఫరా, పోర్టు చార్జీలు, ఇంధనం.. ఇలా ప్రతి అంశానికీ భారీగా ఖర్చవుతుంది. క్యాబిన్లన్నీ అమ్ముడుపోకపోవడం, అదనపు పెట్టుబడులు సమకూరకపోవడం సమస్యను మరింత పెంచాయి.

కొన్ని సందర్భాల్లో ప్రయాణికులనే అదనపు డబ్బు సమకూర్చాలని సంస్థ కోరినట్లు అంతర్జాతీయ మీడియా కథనాలు వెల్లడించాయి. ఓడకు ఇంధనం కొనుగోలు చేయడానికి కూడా కొందరు ప్రయాణికులు తమ జేబుల్లోంచి డబ్బులు చెల్లించాల్సిన పరిస్థితి వచ్చింది.

ఇంధనం ఖర్చు నాలుగు రెట్లు! ఇరాన్ యుద్ధం, దాని ప్రభావంతో చమురు మార్కెట్లలో వచ్చిన మార్పులు సంస్థను మరింత ఇబ్బందుల్లోకి నెట్టాయి. కంపెనీ వెల్లడించిన వివరాల ప్రకారం, ఒక్కో క్యాబిన్‌కు నెలవారీ ఇంధన వ్యయం గతంలో సగటున 1,800 డాలర్లు ఉండేది. అది ఆసియా ప్రాంతాల్లో 6 వేల నుంచి 8 వేల డాలర్లకు పెరిగింది.

అంటే ఒక్కో క్యాబిన్‌పైనే నెలకు అదనంగా వేల డాలర్ల భారం. ఓడలో వందల క్యాబిన్లు ఉన్నప్పుడు మొత్తం ఖర్చు ఎంత పెరుగుతుందో అర్థం చేసుకోవచ్చు.

కంపెనీ వ్యవస్థాపకుడు మైకేల్ పీటర్సన్ తెలిపిన వివరాల ప్రకారం, యుద్ధానికి ముందు టన్ను ఇంధనం సుమారు 700 డాలర్లు ఉండగా, ఆ తర్వాత 2 వేల నుంచి 3 వేల డాలర్లకు చేరింది. ఓడ నెలకు 700 నుంచి 800 టన్నుల ఇంధనం వినియోగించేది. నెలవారీ నిర్వహణ ఖర్చులు కూడా భారీగా పెరిగిపోయాయి.

ఇంధన ధరల పెరుగుదలను ప్రయాణికులపై మోపితే వారు భరించలేరు. కంపెనీ భరిస్తే నష్టాలు మరింత పెరుగుతాయి. చివరకు ఈ వ్యాపార నమూనా కొనసాగించడం సాధ్యం కాదని సంస్థ ప్రకటించింది.

కంబోడియాలో దింపేశారు.. సింగపూర్‌లోనూ చిక్కులు! 2026 అక్టోబరు 27న కంబోడియాలోని సిహనౌక్‌విల్లే పోర్టులో MV Odyssey ప్రయాణాన్ని నిలిపివేశారు. ఓడలో ఉన్న 200 మందికి పైగా ప్రయాణికులను కొద్ది గంటల్లోనే దిగిపోవాలని ఆదేశించారు. ప్రపంచాన్ని చుట్టిరావాలని బయలుదేరినవారు ఒక్కసారిగా మరో దేశంలో హోటళ్లు వెతుక్కోవాల్సిన పరిస్థితి ఏర్పడింది.

తమ జీవిత పొదుపులను ఈ ప్రాజెక్టులో పెట్టినవారికి ఇది పెద్ద షాక్. కొందరు తమ ఇళ్లను అమ్ముకున్నారు. మరికొందరు జీవితాంతం అక్కడే నివసించాలనే ఉద్దేశంతో లక్షల డాలర్లు చెల్లించారు. ఓడలో కేవలం 26 రోజులు మాత్రమే గడిపిన ఓ ప్రయాణికుడు 3.5 లక్షల డాలర్లు పెట్టుబడి పెట్టినట్లు ఒక నివేదిక వెల్లడించింది. లెక్కేస్తే ఒక్కో రోజు నివాసానికి 13,461 డాలర్లు చెల్లించినట్లవుతుంది!

కంపెనీ మాత్రం పునర్వ్యవస్థీకరణ, కొత్త పెట్టుబడుల సమీకరణకు ప్రయత్నిస్తామని ప్రకటించింది. కానీ ప్రయాణికులకు వారి డబ్బు తిరిగి వస్తుందా? వారు కొనుక్కున్న నివాస హక్కులకు ఏమవుతుంది? అన్న ప్రశ్నలకు స్పష్టమైన సమాధానం లేదు. నవంబర్‌లో ఓడ సింగపూర్‌లో ఇంధన బకాయిలకు సంబంధించిన న్యాయపరమైన చిక్కుల్లోనూ పడింది.

ఒకే ఆలోచనతో రెండుసార్లు ప్రయోగం! ఈ కథలో మరో ఆసక్తికరమైన అంశం ఉంది. Villa Vie వ్యవస్థాపకుడు మైకేల్ పీటర్సన్ ఈ ఆలోచనను మొదటిసారి అమలు చేయాలని ప్రయత్నించింది 2022లో. Life at Sea Cruises పేరుతో మూడేళ్ల ప్రపంచ యాత్రకు ప్రణాళిక రూపొందించాడు. వందలాది క్యాబిన్లను బుక్ చేసుకున్నారు. కానీ ఓడ కొనుగోలు ఒప్పందం కుదరకపోవడంతో చివరకు ఆ ప్రయాణం రద్దయింది. అప్పటికే కొందరు ప్రయాణికులు తమ డబ్బులు తిరిగి పొందడానికి ఇబ్బందులు ఎదుర్కొన్నారు.

అయినా పీటర్సన్ తన ఆలోచనను వదులుకోలేదు. కొత్త సంస్థతో, కొత్త పేరుతో, కొత్త నౌకతో మళ్లీ రంగంలోకి దిగాడు. ఈసారి ఓడను సమకూర్చుకున్నాడు. ప్రయాణం కూడా ప్రారంభించాడు. కానీ ఆర్థిక నిర్వహణ, నిర్వహణ వ్యయాలు, ఇంధన ధరలు.. అన్నీ కలిసి రెండో ప్రయోగాన్నీ సంక్షోభంలోకి నెట్టాయి.

సముద్రం మీద ఇల్లు.. కానీ భద్రత ఎక్కడ? నిజానికి సముద్రం మీద నివాసం అనే ఆలోచనలో తప్పేమీ లేదు. ప్రపంచాన్ని చుట్టిరావాలనుకునేవారికి, పదవీ విరమణ తర్వాత కొత్త జీవితం కోరుకునేవారికి ఇది ఆకర్షణీయమైన అవకాశం. ప్రపంచంలో The World అనే మరో లగ్జరీ రెసిడెన్షియల్ క్రూయిజ్ కూడా రెండు దశాబ్దాలకు పైగా విజయవంతంగా నడుస్తోంది. అయితే అది అత్యంత సంపన్నుల కోసం రూపొందిన భిన్నమైన వ్యాపార నమూనా.

Villa Vie వైఫల్యం మాత్రం ఒక విషయం గుర్తు చేస్తోంది. ఇల్లు కొనుక్కుంటే దాని నిర్వహణ ఖర్చు ఉంటుంది. కానీ సముద్రం మీద ఇల్లు కొనుక్కుంటే ఇంధనం, సిబ్బంది, ఆహారం, పోర్టులు, మరమ్మతులు.. ఇలా ప్రతిదానికీ నిరంతర వ్యయం ఉంటుంది. ఓడను కదిలించడానికి ఇంధనం కావాలి. ఆ ఇంధనం ధరను నియంత్రించే శక్తి వ్యాపారవేత్తకు ఉండదు.

ఒకప్పుడు ఇల్లు అమ్ముకుని ఓడ ఎక్కినవారు ఇప్పుడు మళ్లీ భూమ్మీద ఇల్లు వెతుక్కోవాల్సి వచ్చింది. జీవితాంతం ప్రపంచమంతా తిరుగుతూ జీవించాలనుకున్నవారికి రెండేళ్లకే ప్రయాణం ముగిసింది.

భూమ్మీద ఇల్లు కొంటే స్థలం మారదు.. సముద్రం మీద ఇల్లు కొంటే ప్రపంచమంతా తిరగొచ్చు. కానీ ఆ ఓడను నడిపించే ఇంధనానికి డబ్బులు లేకపోతే.. ఇల్లే ఎక్కడికీ కదలదు!