.
Subramanyam Dogiparthi …. 100% గరం మసాలా కమర్షియల్ ఎంటర్టైనర్ ఈ రౌడీ నంబర్ 1 సినిమా… కృష్ణ మార్క్ సినిమా . కృష్ణ ఇమేజికి సరిపడే లెవెల్లో ఉంటుంది . అలాగే వ్రాయబడింది కధ కూడా .
కధను వ్రాసింది యస్ లక్ష్మీ శాంతి . ఆమె గురించి వివరాలు తెలియవు నాకు . కృష్ణ పాత్రతో పాటు ధీటుగా ఉంటుంది SP శారద పాత్ర . శారద పాత్ర అనగానే డైలాగులను అదరగొట్టేస్తారు కదా పరుచూరి బ్రదర్స్ . ఇందులోనూ అంతే.
Ads
ఓ ముగ్గురు విలన్ల చేత పతిత బిడ్డ అని చేతి మీద వ్రాయించుకోబడ్డ పసివాడు అనాధాశ్రమంలో పెరిగి , బోస్టల్ స్కూల్లో చదువుకుని , నిజ జీవితంలో రాబిన్ హుడ్ అవుతాడు . ఆర్తులు దేవుడా అనగానే ప్రత్యక్షం అయి రక్షిస్తూ ఉంటాడు .
హీరో అన్నాక తన్నులు తింటానికి విలన్లతో పాటు డ్యూయెట్లు పాడటానికి ఓ అందమైన హీరోయిన్ కూడా ఉండాలి కదా ! ఆ హీరోయినే రాధ . అందరూ కలిసి సంఘ విద్రోహులయిన విలన్లను పోలీసులకు అప్పచెప్పి నంబర్ వన్ మంచోడు అయిపోవటంతో సినిమా సుఖాంతం అవుతుంది .
రొటీన్ పగ సాధింపు ఏక్షన్ సినిమాయే అయినా రాధ పోకిరి , గడసరితనం , అల్లరి సినిమాను హుషారు హుషారుగా నడిపిస్తుంది . సీరియస్ ట్రాక్ అంతా కృష్ణ , శారదలది అయితే సరదా ట్రాక్ అంతా రాధదే .
రాజ్-కోటి సంగీత దర్శకత్వంలో పాటలన్నీ చాలా హుషారుగా ఉంటాయి . కృష్ణ , రాధల మీద నాలుగు డ్యూయెట్లు ఉంటాయి .
జై బోలో శివశంకర్ నేనే యమ కింకర్ , అందమైన ఆడపిల్ల కళ్ళు చూస్తే లేడి పిల్ల , ఎందుకో చీమ కుట్టినట్లు ఉన్నది , ఏందయ్యో అంటూ సాగుతాయి ఆ నాలుగు డ్యూయెట్లు . (రాజ్ కోటి వీరు మొదట ఎక్కువగా కృష్ణ చిత్రాలకే సంగీత దర్శకత్వం చేసేవారు, వీరిద్దరి పట్టుదల- వేటూరి మధ్యవర్తిత్వం కారణంగానే కృష్ణ, బాలు కలయిక సాధ్యం అయింది)
జయమాలిని ఉంది కానీ సంసారి పాత్ర . అప్పుడప్పుడు దర్శకులు ఆమెకు ఆటవిడుపుగా సంసారి పాత్రలను ఇస్తూ ఉంటారు . ఆ అవకాశం ఆమెకు ఈ సినిమాలో కలిగింది . ఆమె హాట్ & మాస్ డాన్స్ మరో నటికి లభించింది . సరదా సొగసు ఉన్నదాన్ని అంటూ పాడుతుంది .
పాటలన్నీ వేటూరి వారే వ్రాసారు .బాలసుబ్రమణ్యం , జానకమ్మ , చిత్ర గాత్రించారు . సినిమాలో కృష్ణ ఎంట్రీ అదిరిపోతుంది . కృష్ణ అభిమానులకు పూనకమే . మరో అగ్ని సినిమాయే కృష్ణకు . ఇతర ప్రధాన పాత్రల్లో సత్యనారాయణ , గొల్లపూడి , నూతన్ ప్రసాద్ , త్యాగరాజు , సాక్షి రంగారావు , సుత్తి వీరభద్రరావు , జయమాలిని , నర్రా తదితరులు నటించారు .
కె వి వి సత్యనారాయణ నిర్మాత . యస్ యస్ రవిచంద్ర దర్శకుడు . చాలా బిర్రయిన స్క్రీన్ ప్లేని తయారు చేసుకోవడమే కాకుండా దర్శకత్వాన్ని కూడా అదే స్పీడ్ & స్పిరిట్లో లాగించాడు . 1988 జూన్లో రిలీజయిన ఈ రౌడీ నంబర్ 1 సినిమా యూట్యూబులో ఉంది . 100% వినోదం , కాలక్షేపం గ్యారంటీ . పైగా రాధ . చూడబులే .
నేను పరిచయం చేస్తున్న 1184 వ సినిమా . #తెలుగు_సినిమాల_సింహావలోకనం #తెలుగు_సినిమాలు #సినిమా_కబుర్లు #సినిమా_స్కూల్
Share this Article